مەن قر ۇقك شق تۇركىستان وبلىستىق دەپارتامەنتى, سارىاعاش اۋدانى بويىنشا شەكارا باسقارماسىنىڭ وفيتسەرىمىن. شەنىم – مايور. بۇل قىزمەتكە كەزدەيسوق كەلگەن جوقپىن. بۇل – مەنىڭ سانالى تاڭداۋىم. سەبەبى شەكارا – جاي عانا گەوگرافيا ەمەس, ول – ەل مەن ەلدىڭ اراسى, تىنىشتىق پەن تۇراقتىلىقتىڭ شەبى, تاريحتىڭ قالىڭ تابى جاتقان قاسيەتتى شەك.
شەكارا – ءبىر عانا سىزىق ەمەس, مىڭداعان جاۋاپكەرشىلىك
بۇگىندە قازاقستاننىڭ مەملەكەتتىك شەكاراسى شامامەن 15 مىڭ شاقىرىمدى قۇرايدى. ونىڭ مىڭداعان شاقىرىمى تاۋلى, ورماندى, شولەيتتى, وزەن-كولدى اۋماقتاردى قيىپ وتەدى. بۇل – ءبىزدىڭ جۇمىستى كۇردەلەندىرە تۇسەدى. بىراق بىزگە ەشبىر اۋا رايى, ەشقانداي جەر بەدەرى توسقاۋىل ەمەس. سەبەبى, ەل الدىنداعى انت, ار الدىنداعى جاۋاپكەرشىلىك بىزگە ءبىر ءسات تە بوساڭسۋعا مۇمكىندىك بەرمەيدى. بۇل – ەل ىرگەسىنىڭ تىنىشتىعىن قامتاماسىز ەتۋ ءۇشىن اتقارىلاتىن اۋىر ءارى ابىرويلى ەڭبەك.
تىنىشتىق كۇزەتىندە – تەحنولوگيا مەن تاكتيكا
دامىعان زاماندا شەكارادا جاي عانا شولۋشى بولۋ جەتكىلىكسىز ەكەنى جاسىرىن ەمەس .شەكاراشى ساربازدار – تاعىلىمدى تەحنوكرات, سانالى ستراتەگ, پايىمدى پسيحولوگ جانە وتانشىل وفيتسەر بولا ءبىلۋى كەرەك. ءاربىر شەكاراشى – اقپارات جيناي الاتىن, قاۋىپتىڭ الدىن كورە بىلەتىن, توتەنشە جاعدايدا شەشىم قابىلدايتىن كاسىبي مامان بولۋى ءتيىس. بۇل ءۇشىن ءبىز اي سايىن وقۋ-جاتتىعۋلاردان, تاكتيكالىق دايىندىقتان, اتىس جانە فيزيكالىق دايىندىقتاردان وتەمىز. سونداي-اق قىزمەت بارىسىندا جەر سەرىكتىك باقىلاۋ جۇيەلەرىن, ۇشقىشسىز باسقارىلاتىن درونداردى, جەدەل ارەكەت ەتۋشى ءموبيلدى توپتاردى قولدانامىز.
حالىقپەن بايلانىس – شەكارا قاۋىپسىزدىگىنىڭ كەپىلى
شەكارا بويىنداعى ەلدى مەكەن تۇرعىندارى – ءبىزدىڭ سەنىمدى سەرىكتەستەرىمىز دەۋگە بولادى. سەبەبى كەيدە زاڭسىز كوشى-قون, شەكارانى بۇزۋ, ءتىپتى جايىلىمعا مالدىڭ ءوتىپ كەتۋى سەكىلدى جاعدايلار تۋىنداۋى مۇمكىن. مۇندايدا جەرگىلىكتى حالىقپەن ءتىل تابىسۋ, ءتۇسىندىرۋ جۇمىستارىن جۇرگىزۋ – كۇندەلىكتى تىرلىگىمىزدىڭ ءبىر بولىگىنە اينالعان دەسەك تە بولادى.
ءبىز ءۇشىن باستى ماقسات – قاۋىپتىڭ الدىن الۋ. كەي جاعدايلاردا اۋا رايى قولايسىز, كەيدە كورىنبەيتىن قاۋىپ كوپ بولادى. بىراق بىزگە جۇكتەلگەن مىندەت – ەلدىڭ تىنىشتىعىن ساقتاۋ, سوندىقتان ەشبىر كەدەرگىگە قاراماي جۇمىس ىستەيمىز.
جانۇيادان جوعارى بورىش بار
ارينە, شەكاراشىنىڭ وتباسىنا دا سالماق تۇسەدى. سەبەبى ءبىز كوپ جاعدايدا ۇيدە بولمايمىز. بالامىزدىڭ تۇساۋكەسەرىندە, جارىس كەزىندە نەمەسە تۋعان كۇنىندە قاسىنان تابىلا الماي قالۋ – ۇيرەنشىكتى جاعداي.
بىراق مەن بالالارىم مەن جۇبايىما ءاردايىم مىڭداعان وتباسىنىڭ قاۋىپسىزدىگىن كۇزەتىپ جۇرگەنىمىزدى تۇسىندىرەمىز. ءبىز, شەكاراشىلار قىراعى بولماساق, شەكارادا ءبىر ساتكە السىزدىك پايدا بولۋى مۇمكىن. بۇل – ەل ءۇشىن ۇلكەن قاۋىپ ەمەس پە؟ وسىنداي سوزدەر – مەنىڭ عانا ەمەس, بۇكىل اسكەري قىزمەتكەرلەردىڭ ىشكى ايقايى.
شەكارانى كۇزەتۋ – مەملەكەتتى ساقتاۋ
تاريحتا شەكارا كۇزەتىلمەگەن ەلدىڭ تاعدىرى نە بولعانىن بىلەمىز. قازىرگى زامان – گيبريدتى قاۋىپتەر كەزەڭى. سوندىقتان ءبىز تەك شەكارانى عانا ەمەس, اقپاراتتىق, كيبەر جانە ەكونوميكالىق قاۋىپسىزدىك شەكتەرىن دە ساقتاۋىمىز كەرەك. بۇل باعىتتا شەكاراشىلار – الدىڭعى شەپتەگى جاۋىنگەرلەر.
ءبىزدىڭ باستى ۇستانىم – "تىنىشتىقتىڭ باعاسى – قىراعىلىق". ارينە, ءبىز, شەكاراشىلاردىڭ قىزمەتىمىز وسى سەرتكە ادالدىقپەن ولشەنەدى.
ەلدىڭ ىرگەسى سوگىلمەسىن, شەكارامىز بەرىك بولسىن!
شاديار جۇماقۇلوۆ,
قر ۇقك شق تۇركىستان وبلىستىق دەپارتامەنتى,
سارىاعاش اۋدانى بويىنشا
شەكارا باسقارماسىنىڭ وفيتسەرى, مايور
