سۋرەتتى تۇسىرگەن – ەرلان ومار, «EQ»
ۇلىتاۋ ۇلتتىق تاريحي-مادەني جانە تابيعي مۋزەي-قورىعىنا قويىلعان ءاربىر جادىگەر, ءاربىر قۇجات – تاريحتىڭ ءتىرى كۋاسىندەي. مۋزەي قابىرعاسىنداعى ءۇنسىز جادىگەرلەر بابالار داۋىسى بولىپ ەستىلەدى: بىرىندە كونە ءداۋىر تىنىسى, بىرىندە جورىق كورگەن جاۋىنگەردىڭ ءجۇزى, ەندى بىرىندە حان كەڭەسىنىڭ ءۇنى بار.
ۇلىتاۋ مۋزەيىنە اياق باسقان ساتتەن-اق مەكەمەدەگى جۇمىستىڭ جۇيەلى, مازمۇندى ەكەنى بىردەن بايقالدى. مۋزەيدىڭ كورنەكى قۇرىلىمى, ەكسپوزيتسيالاردىڭ رەتى, تاقىرىپتىق مازمۇنى – بارلىعى دا كاسىبي شەبەرلىك پەن جاۋاپكەرشىلىكتىڭ ناتيجەسى. مۋزەي-قورىعىنىڭ باسشىسى الىبەك كۇزەرباەۆ مۇراجايدىڭ زاماناۋي فورماتتا دامىپ, جاس ۇرپاققا قىزىقتى ءارى تارتىمدى دۇنيەلەردى ۇسىنۋعا باعىت الىپ وتىرعانىن اتاپ ءوتتى. مۋزەيدىڭ عىلىمي قىزمەتكەرلەرى مەن ەكسكۋرسيا جەتەكشىلەرى ازات سابىرجان مەن ايبولات راحمانيا ءاربىر جادىگەر تۋرالى تاريحي دەرەك ايتىپ قانا قويماي, تىڭداۋشىنى سول داۋىرگە جەتەلەيتىندەي اسەرمەن اڭگىمەلەيدى.
ۇلىتاۋدىڭ كيەلى ورىندارى – ەجەلگى قازاق دالاسىنىڭ رۋحىن بويىنا سىڭىرگەن جوشى حان كەسەنەسى, الاشا حان مازارى, ەدىگە باتىردىڭ ەسكەرتكىشى, دومباۋىل مەن كەتبۇعا باباعا قاتىستى اڭىزعا تولى اڭگىمە تاريحي سانانى سىلكىنتپەي قويمايدى. ءار توبە مەن جوتا, ءار تاس پەن وزەن – ەل شەجىرەسىنىڭ ءبىر تاراۋى.
جالپى, كەز كەلگەن مۋزەي ۇجىمىن ناعىز رۋحاني مايداننىڭ ساربازدارى دەۋگە بولادى. ولاردىڭ ەڭبەگى كوزگە كورىنبەسە دە ۇلكەن مانگە يە. مادەني مۇراعا دەگەن ۇقىپتى كوزقاراس, جاس ۇرپاقتىڭ تاريحي ساناسىن وياتۋ جولىنداعى قاجىرلى ەڭبەكتەرى – ۇلت تاريحى ءۇشىن اسا قۇندى قىزمەت.
جانات بيسەنباەۆا,
Phd, قاۋىمداستىرىلعان پروفەسسور
