قىتايداعى FTC (FIRST Tech Challenge) جارىسى – V تساولۋ كۋبوگى: جاسوسپىرىمدەرگە ارنالعان روبوت جوبالاۋ جانە قۇراستىرۋ بويىنشا ۇيىمداستىرىلعان ءبىلىم بايگەسىندە جەتىسۋ وبلىسىنداعى دارىندى بالالارعا ارنالعان جىلاندى مامانداندىرىلعان ليتسەي-ينتەرناتىنىڭ WATER7 كومانداسى Connect Award ماراپاتىن يەلەندى. بۇل – جاسوسپىرىمدەردىڭ شىعارماشىلىعى مەن تەحنيكالىق قابىلەتتەرىن الەمدىك دەڭگەيدە تانىتۋعا بەرىلگەن تاماشا مۇمكىندىك. اۋىلدان شىققان جاس دارىنداردىڭ عىلىم مەن تەحنيكا الەمىندەگى زور جەتىستىگى.
ال وسى جەڭىس باسىندا تۇرعان – اۋىل مەكتەبىنىڭ وقۋشىلارىن حالىقارالىق دەڭگەيگە كوتەرىپ جۇرگەن مامان, روبوتتەحنيكا جاتتىقتىرۋشىسى ايدوس ورداباەۆتىڭ ەڭبەگىن اتاپ وتكەن ءجون. ءوز ماماندىعىنىڭ بىلگىرى ليتسەي-ينتەرناتىنا ارنايى شاقىرتۋمەن كەلىپ, ءبىر جىلدىڭ ىشىندە جىلاندى مەكتەبىندە روبوتتەحنيكا باعىتىن جاڭا بەلەسكە كوتەردى. ناتيجەسىندە, وقۋشىلار رەسپۋبليكالىق جانە حالىقارالىق دەڭگەيدە توپ جارىپ كەلەدى.
جىلاندى مەكتەبىندە روبوتتەحنيكا زەرتحاناسىنىڭ اشىلۋىنا دەمەۋشىلىك كورسەتىپ, اۋىل بالالارىنا ۇلكەن مۇمكىندىك سىيلاعان – اۋىل ازاماتى, مەتسەنات باۋىرجان كەڭەسبەك ۇلى. مۇنداي دەمەۋ مەن قولداۋ قابىلەتتى بالالاردىڭ جاڭا جەتىستىكتەرگە جەتۋىنە ۇلكەن سەرپىن بەرىپ وتىر.
وسىلايشا, حالىقارالىق جارىستا WATER7 كومانداسى قۇرامىنداعى 11 وقۋشى جارىس الاڭىندا قازاقتىڭ قارا دومبىراسىمەن كۇي شەرتىپ, كوك بايراعىمىزدى جەلبىرەتتى.
الماتى
