دەپۋتاتتىڭ ايتۋىنشا, زاڭ بويىنشا كەمىندە بەس جىلعا اۋىلعا بارعان دارىگەرلەرگە ەڭ تومەنگى جالاقىنىڭ ءجۇز ەسەلەنگەن مولشەرىندە كوتەرمەاقى تولەنۋى ءتيىس. الايدا 2024 جىلى 17 وبلىستىڭ 6-ىندا بۇل تولەم بەرىلمەگەن. ونىڭ باستى سەبەبى – جەرگىلىكتى اكىمدىكتەر اسا تاپشى مەديتسينالىق ماماندىقتار ءتىزىمىن ۋاقىتىندا بەكىتپەگەن.
«مىسالى, اباي وبلىسى, اياگوز اۋدانىنىڭ وركەن اۋىلىنا جۇمىس ىستەۋگە بارعان جالپى تاجىريبەلىك دارىگەر ايجان الپىسبايقىزى زاڭ بويىنشا 8,5 ميلليون تەڭگە الۋى كەرەك ەدى. بىراق بۇل ماماندىق وڭىردە اسا تاپشى دەپ تانىلماعاندىقتان, وعان تولەم بەرىلمەدى», دەيدى دەپۋتات.
ونىڭ ايتۋىنشا, دەنساۋلىق ساقتاۋ مينيسترلىگىنىڭ ستاندارتتارىنا سايكەس, ءبىر جالپى تاجىريبەلىك دارىگەرگە – 1700, ال ءبىر تەراپەۆتكە – 2200 ادامنان كەلۋى كەرەك. بىراق حالىق سانى از اۋىلداردا ءبىر عانا دارىگەر بارلىق تۇرعىنعا قىزمەت كورسەتىپ وتىر.
«ەگەر جالپى تاجىريبەلىك دارىگەر مەن تەراپەۆت ماماندىقتارى اسا تاپشى تىزىمىنە ەنگىزىلمەسە, اۋىلداعى دارىگەر تاپشىلىعى شەشىلمەيدى», دەيدى سابيليانوۆ.
اتالعان ماسەلە بويىنشا دەپۋتات ۇكىمەتكە ءۇش ناقتى ۇسىنىس جولدادى:
1. اسا تاپشى ماماندىقتار تىزىمىنە جالپى تاجىريبەلىك دارىگەر مەن تەراپەۆتتى قوسۋ;
2. اباي وبلىسى بويىنشا بۇل ءتىزىمدى شۇعىل بەكىتۋ;
3. اۋىلعا بارعان دارىگەرلەرگە 8,5 ملن تەڭگە كوتەرمەاقىنى تولىق تولەۋ.
«سىزدەن وسى ساۋالدى زاڭنامادا بەلگىلەنگەن مەرزىمدە قاراستىرىپ, ءتيىستى شارالاردى قابىلداۋدى سۇرايمىن», دەدى دەپۋتات.
جانەل تولەۋبەكوۆا, ەۇۋ 2 كۋرس ستۋدەنتى
