سۋرەت: facebook.com/mazhilis.kz
دەپۋتات ايدوس سارىمنىڭ توراعالىعىمەن وتكەن وتىرىسقا قوعامدىق پالاتا مۇشەلەرىمەن قاتار زاڭ جوبالارى جونىندەگى جۇمىس توبى, ءماجىلىس پەن بارلىق دەڭگەيدەگى ءماسليحات دەپۋتاتتارى, مۇددەلى مەملەكەتتىك ورگانداردىڭ, ادام قۇقىقتارى جونىندەگى ۇلتتىق ورتالىقتىڭ جانە ساراپشىلار قاۋىمداستىعىنىڭ وكىلدەرى قاتىستى.
جيىندا ايدوس سارىم قوعامدىق پالاتا ءوز جۇمىسى بارىسىندا قۇقىق بۇزۋشىلىقتىڭ الدىن الۋ تاقىرىبىن ءتۇرلى اسپەكتى بويىنشا, ونىڭ ىشىندە ەسىرتكى, ويىنعا تاۋەلدىلىك, تۇرمىستىق زورلىق-زومبىلىقتىڭ تارالۋىنا قارسى كۇرەسكە بايلانىستى بىرنەشە رەت تالقىلاعانىن اتاپ ءوتتى.
– مەملەكەت باسشىسى 2024 جىلعى 2 قىركۇيەكتەگى حالىققا جولداۋىندا بۇل ماسەلەلەردى بولشەكتەپ ەمەس, جۇيەلى تۇردە شەشۋ كەرەك ەكەنىن باسا ايتتى. بۇگىندە بۇل جۇمىستىڭ جۇرگىزىلۋىنە قاتىستى نەگىزگى شاعىمدار بار, سوندىقتان وسى زاڭ پايدا بولدى. الدا ءبىزدى ۇلكەن رەفورما كۇتىپ تۇر, – دەدى ا.سارىم.
ونىڭ ايتۋىنشا, رەسپۋبليكانىڭ قۇقىقتىق ساياساتىن 2030 جىلعا دەيىن دامىتۋ تۇجىرىمداماسىنا سايكەس, مەملەكەتتىك ساياساتتىڭ باسىم باعىتى – رەپرەسسيالىق شارالاردىڭ الدىن الۋعا ەكپىن بەرۋ.
ىشكى ىستەر ءمينيسترىنىڭ ورىنباسارى يگور لەپەحا جيىنعا قاتىسۋشىلاردى «قۇقىق بۇزۋشىلىقتىڭ پروفيلاكتيكاسى تۋرالى» زاڭ جوباسى مەن ىلەسپە تۇزەتۋلەردىڭ ەرەجەلەرىمەن تانىستىردى. نەگىزگى جوبا اياسىندا اكىمدىكتەرگە پروفيلاكتيكالىق ءىس-شارالاردى قولدانۋ قۇزىرەتىن بارلىق مەملەكەتتىك ورگانعا بەرۋ ارقىلى الدىن الۋ سالاسىندا ناقتى وكىلەتتىكتەر بەرۋ, قىلمىستىڭ الدىن الۋ جۇيەسىن وڭتايلاندىرۋ ۇسىنىلادى.
بۇل رەتتە جاڭا زاڭ قابىلدانعان كەزدە قولدانىستاعى بەس زاڭ كۇشىن جويادى. ولاردىڭ قاتارىندا «تۇرمىستىق زورلىق-زومبىلىقتىڭ پروفيلاكتيكاسى تۋرالى» زاڭ دا بار. Maqsut Narikbayev University قاۋىمداستىرىلعان پروفەسسورى, قوعامدىق پالاتا مۇشەسى ءمۇسىلىم حاسەنوۆ مۇنداي ءادىس بىلتىر قابىلدانعان ايەلدەر قۇقىقتارى مەن بالالاردىڭ قاۋىپسىزدىگى ماسەلەلەرى بويىنشا زاڭمەن نىعايتىلعان تۇرمىستىق زورلىق-زومبىلىققا قارسى كۇرەستىڭ ەلىمىزدە قالىپتاسقان جۇيەسىنە نۇقسان كەلتىرەتىنىن ايتىپ قالدى.
وتىرىس بارىسىندا ءماجىلىس دەپۋتاتتارى ماگەررام ماگەرراموۆ, ءۇنزيلا شاپاق, دەنساۋلىق ساقتاۋ ۆيتسە-ءمينيسترى ەرجان نۇرلىباەۆ, Maqsut Narikbayev University كونستيتۋتسيالىق جانە ساياسي زەرتتەۋلەر ينستيتۋتىنىڭ ديرەكتورى ءاليا ورازباەۆا, قازاقستاننىڭ كاسىبي الەۋمەتتىك قىزمەتكەرلەرىنىڭ ۇلتتىق اليانسىنىڭ اتقارۋشى ديرەكتورى دينارا ەسىموۆا, «پارلامەنتاريزم ينستيتۋتى» شجق» رمك اتقارۋشى ديرەكتورى الماس قاناتوۆ جانە باسقالار قۇقىق بۇزۋشىلىقتىڭ الدىن الۋ سالاسىنداعى زاڭناماعا قاتىستى ءوز كوزقاراستارىمەن ءبولىستى.
جيىن سوڭىندا ا.سارىم وتىرىس بارىسىندا ايتىلعان پىكىرلەر مەن ساراپتامالىق قورىتىندىلار قوعامدىق پالاتانىڭ قورىتىندى ۇسىنىمدارىندا جيناقتالىپ, زاڭ جوبالارىمەن ودان ءارى جۇمىس ىستەۋ ءۇشىن جۇمىس توبىنا بەرىلەتىنىن ايتتى.
