ماۋلەن اشىمباەۆ ءماسليحات دەپۋتاتتارىمەن جانە جۇرتشىلىقپەن كەزدەسۋدە وڭىرلەردى ناتيجەلى دامىتىپ, ازاماتتاردىڭ ءال-اۋقاتىن ارتتىرۋ ءۇشىن ەل پرەزيدەنتىنىڭ باستاماسىمەن قولعا الىنعان رەفورمالاردى ساپالى ىسكە اسىرۋدىڭ ماڭىزدى ەكەنىن ايتتى. وسىعان بايلانىستى ول زاڭنامالىق سالا بويىنشا الداعى بىرلەسكەن جۇمىستىڭ نەگىزگى باعىتتارىنا توقتالدى.
«پرەزيدەنت قاسىم-جومارت توقاەۆتىڭ باستاماسىمەن ەلىمىزدە كەشەندى رەفورمالار ىسكە اسىرىلىپ جاتىر. سونىڭ ىشىندە ەكونوميكانى ارتاراپتاندىرۋعا, وڭدەۋ ونەركاسىبى مەن اۋىل شارۋاشىلىعىن دامىتۋعا كوڭىل ءبولىنىپ جاتىر. ۇلتتىق قۇرىلتايدىڭ IV وتىرىسىندا ەلىمىزدىڭ الەۋمەتتىك-ەكونوميكالىق جانە ساياسي باعدارىنا قاتىستى باسىمدىقتار ايقىندالدى. مۇنىڭ ءبارى – ادىلەتتى, قاۋىپسىز, تازا, قۋاتتى قازاقستان قۇرۋ ءۇشىن قولعا الىنعان كەشەندى باستامالار. مەملەكەت باسشىسى بەلگىلەپ بەرگەن وسى مىندەتتەردى ىسكە اسىرۋ جولىندا سەناتورلار مەن ءماسليحات دەپۋتاتتارىنىڭ جۇيەلى ءوزارا ءىس-قيمىلى مەن بىرلەسكەن جۇمىسىن ءارى قاراي جالعاستىرۋدىڭ ماڭىزى زور», دەدى سەنات توراعاسى.
سونىمەن قاتار پالاتا سپيكەرى اقتوبە وبلىسىنىڭ جوعارى الەۋەتى مەن ەكونوميكالىق ءوسۋ قارقىنىنا نازار اۋداردى. كەزدەسۋگە قاتىسۋشىلار ايماقتىڭ ءوسىپ-وركەندەۋىنە جول اشاتىن جاڭا ءوندىرىس ورىندارىن دامىتۋ جانە وڭىرگە ينۆەستيتسيا تارتۋ ماسەلەلەرىن دە تالقىلادى.
سونداي-اق ءىس-شارا بارىسىندا قازاقستان حالقى اسسامبلەياسىنىڭ ءحححىV سەسسياسىندا مەملەكەت باسشىسى جۇكتەگەن ەتنوسارالىق قاتىناستاردى نىعايتۋ جونىندەگى مىندەتتەر مەن بيىل قىركۇيەك ايىندا استانادا وتەتىن الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق اياسىندا رۋحاني ديپلوماتيانى ىلگەرىلەتۋ تەتىكتەرى ءسوز بولدى.
ءوڭىردىڭ كرەاتيۆتى جاستارىمەن كەزدەسۋدە ءبىلىمدى جاس بۋىننىڭ ەلدى جاڭعىرتۋ ۇدەرىسىندەگى رولىنە, ولاردىڭ بويىنا جاسامپاز قۇندىلىقتار مەن ءورشىل يدەيالاردى ءسىڭىرۋدىڭ جانە وسكەلەڭ ۇرپاقتى جۇيەلى قولداۋدىڭ ماڭىزىنا باسا ءمان بەرىلدى. سونىڭ بارىسىندا «ۇلتتىق قور – بالالارعا», «بولاشاق», «جاستار», «كەلەشەك» مەملەكەتتىك ءبىلىم بەرۋ جيناقتاۋ جۇيەسى جانە باسقا دا دارىندى جاستاردىڭ الەۋەتىن ارتتىرۋعا تىڭ مۇمكىندىكتەر بەرەتىن ستراتەگيالىق باعدارلامالار مەن جەڭىلدىكتەر تۋرالى ايتىلدى.
«قازاقستان ادىلەت ۇستەمدىك قۇراتىن زاماناۋي ءارى قۋاتتى مەملەكەتكە اينالۋى كەرەك. بۇل ماقساتقا جاستاردىڭ قاتىسۋىنسىز قول جەتكىزۋ مۇمكىن ەمەس. سەبەبى دامۋ ءۇشىن تىڭ يدەيالار, جاڭا كوزقاراس پەن سارقىلماس كۇش-قايرات كەرەك. سوندىقتان جاس بۋىننىڭ تۇلعا بولىپ قالىپتاسۋىنا جاعداي جاساپ, ولاردىڭ بويىنا ءوزىن ءوزى دامىتۋ, ۇزدىكسىز ءبىلىم الۋ, تالداۋ جاساۋ, ەموتسيونالدىق ينتەللەكتى شىڭداۋ سياقتى قابىلەتتەردى دارىتۋ قاجەت. بۇل رەتتە دۇرىس قۇندىلىقتارعا جانە پرەزيدەنت قاسىم-جومارت توقاەۆ جاريالاعان «ادال ازامات» تۇجىرىمىنا تابان تىرەۋ ايرىقشا مانگە يە», دەگەن پالاتا سپيكەرى جاستارعا سەناتتىڭ زاڭ شىعارۋ قىزمەتى مەن ونىڭ نەگىزگى باعىتتارى تۋرالى ايتىپ بەردى.
ساپار بارىسىندا سەناتورلار سينگاپۋر جۇيەسى جانە باسقا دا وزىق ءبىلىم بەرۋ باعدارلامالارى بويىنشا وقىتاتىن «Aqbobek» دارىندى بالالارعا ارنالعان مەكتەپ-ينتەرناتىنا بارىپ, IT-كابينەت, «Comics Room», ونەر, ادەبيەت زالدارى مەن وزگە دە مامانداندىرىلعان الاڭداردىڭ جۇمىسىمەن تانىستى. بۇعان قوسا پارلامەنت دەپۋتاتتارى مۇگەدەكتىگى بار بالالارعا ارنالعان «قامقورلىق» وڭالتۋ ورتالىعىنىڭ جانە فارفوردان جاسالعان بۇيىمدار شىعاراتىن «زەردە-كەراميكا اقتوبە» زاۋىتىنىڭ ەڭبەك ۇجىمدارىمەن كەزدەستى.
