سۋرەتتى تۇسىرگەن – ولجاس قۇرماشەۆ
تاعىلىمى تەرەڭ ءىس-شارانى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى مەن تالدىقورعان قالاسى اكىمدىگىنىڭ قولداۋىمەن «مەيىرىم» مۇگەدەكتەردىڭ قوعامدىق بىرلەستىگى ۇيىمداستىرعان. مۇنداعى ماقسات – ونەر ارقىلى قوعامدا ينكليۋزيۆتىك سانانى قالىپتاستىرۋ جانە ەرەكشە قاجەتتىلىكتەرى بار ازاماتتاردىڭ الەۋەتىن كەڭىنەن تانىتۋ.
كورمەگە قازاقستانمەن قاتار رەسەي, تۇركيا, وزبەكستان سىندى شەت مەملەكەتتەردەن كەلگەن قولونەر شەبەرلەرى قاتىستى. قوناقتار قولدان جاساعان بىرەگەي بۇيىمدارىن تاماشالاپ, ءوز تاڭداۋلارى بويىنشا ساتىپ الدى. سونداي-اق شەبەرلىك ساباقتارىنا قاتىسىپ, تاجىريبە الماستى. ەرەكشە قاجەتتىلىگى بار ازاماتتار جاساعان تۋىندىلار كوپشىلىكتىڭ نازارىن وزىنە اۋداردى. ماسەلەن, ۇلتتىق ناقىشتاعى كەستەلى بۇيىمدار, زەرگەرلىك اشەكەيلەر, اعاشتان جاسالعان مۇسىندەر مەن تۇرمىستىق زاتتار كورەرمەندى ەلەڭ ەتكىزدى.
ء«بىز شىعارماشىلىقتىڭ شەكاراسى جوق ەكەنىن دالەلدەگىمىز كەلدى. مۇگەدەكتىگى بار جاندار تەك كورەرمەن عانا ەمەس, مادەني ديالوگتىڭ تولىققاندى قاتىسۋشىلارى بولا الادى. بۇل كورمە بىزگە وسىنى ايقىن تۇردە كورسەتۋگە جول اشتى. ءبىزدىڭ ماقسات – جاي عانا كورمە ۇيىمداستىرۋ ەمەس, شابىتتاندىراتىن, ءوزارا تۇسىنىستىك پەن جاڭا مۇمكىندىكتەرگە جول اشاتىن الاڭ قۇرۋ», دەدى «مەيىرىم» مۇگەدەكتەر قوعامدىق بىرلەستىگىنىڭ توراعاسى گۇلۆيرا تاۋبالدينوۆا.
ونىڭ ايتۋىنشا, قاتىسۋشىلار ءىس-شارا بارىسىندا جاڭا سەرىكتەستەر مەن تۇتىنۋشىلار تاۋىپ, بولاشاقتاعى جوسپارلارىن جۇزەگە اسىرۋعا مۇمكىندىك الدى.
بۇگىندە جەتىسۋ جەرىندە ينكليۋزيانى ىلگەرىلەتۋ باعىتىندا ناقتى قادامدار جاسالىپ جاتىر. مۇنداي باستامالار ءار ازاماتتىڭ ءوزىن قوعامنىڭ تەڭ مۇشەسى رەتىندە سەزىنۋىنە, ءوز قابىلەتىن دامىتۋعا زور مۇمكىندىك بەرەدى.
بۇل كورمە – اشىق ءارى تولەرانتتى قوعام قۇرۋ جولىنداعى ماڭىزدى قادام. ءتۇرلى كوزقاراس پەن مۇمكىندىكتەگى ادامداردى ءبىر ارناعا توعىستىرعان وسىنداي مادەني ءىس-شارالار ەل بىرلىگىنىڭ, رۋحاني تۇتاستىعىنىڭ ايقىن كورىنىسى.
جەتىسۋ وبلىسى
