سونىمەن بۇل كۇندەرى الماتىنىڭ يندۋستريالدى ايماعىندا ءۇش بىردەي جاڭا زاۋىت پايدالانۋعا بەرىلگەندىكتەن, وسىناۋ ىلكىمدى وقيعاعا وراي مەگاپوليستەگى باق وكىلدەرى جۇمىسى قىزا باستاعان جاڭا ءوندىرىس ورىندارىنا بارىپ, رادياتور, كابەل, كوسمەتيكالىق ونىمدەر شىعاراتىن كومپانيالاردىڭ تىنىس-تىرشىلىگىمەن تانىستى.
تالاي ادامعا تابىس كوزىن تاۋىپ بەرگەن زاۋىتتاردىڭ ىسكە قوسىلۋى – الماتىنىڭ يندۋستريالاندىرۋ مەن وندىرىستىك الەۋەتىن دامىتۋ باعدارلاماسىن ىسكە اسىرۋدىڭ كەزەكتى قادامى.
ماسەلەن, باق وكىلدەرىنىڭ جولى تۇسكەن «Valtherm» جشس اليۋميني جانە بيمەتالل جىلىتۋ رادياتورلارىن شىعاراتىن زاۋىتقا سالىنعان ينۆەستيتسيا كولەمى 10 ملرد تەڭگەدەن اسادى. زاۋىتتا كۇنىنە 10 مىڭعا دەيىن رادياتور بولىكتەرىن شىعاراتىن بەس قۇيۋ ماشيناسى ورناتىلعان. الداعى ۋاقىتتا كومپانيا قۇيۋ ماشينالارىنىڭ سانىن 12-گە دەيىن جەتكىزىپ, ءوندىرىس كولەمىن جىلىنا 15 ميلليون سەكتسياعا دەيىن ۇلعايتۋدى كوزدەپ وتىر.
ء«بىز قىتايدا 20 جىلدان استام رادياتور وندىرۋمەن اينالىسىپ كەلەمىز. قازىر بارلىق كەشەندى تاجىريبەنى قازاقستانعا كوشىرىپ, تولىققاندى ءوندىرىستى ىسكە قوستىق. ءبىز تەمىر سىنىقتارىن جيناپ, قايتا وڭدەپ, دايىن ءونىم – رادياتورلار جاسايمىز. قازىرگى تاڭدا كۇنىنە 10 000 سەكتسيا شىعارامىز جانە ودان ءارى كەڭەيتۋدى جوسپارلاپ وتىرمىز», دەدى «Valtherm» جشس ينۆەستورى يۋەن سي.
بۇل كاسىپورىندا اۆتوموبيلدەردەگىدەي انافورەزدى بوياۋ تەحنولوگياسى قولدانىلادى, ول بەرىك ءارى توت باسۋدان قورعايدى. بۇل تەحنولوگيا رادياتورلاردىڭ سىرتقى ءتۇرى مەن ساپاسىن 20 جىل بويى ساقتاۋعا مۇمكىندىك بەرەدى.
قازىردىڭ وزىندە «Valtherm» زاۋىتىنىڭ رەسەي, ازەربايجان, ۋكراينا ەلدەرىندە كليەنتتەر بازالارى بولسا, كەلەشەكتە قۇراستىرۋ ءوندىرىسىن الماتىعا ورنالاستىرۋدى قاراستىرىپ وتىر. ءوندىرىستىڭ جاڭا تۇرلەرى – گاز قازاندىقتارىن, پانەلدىك رادياتورلار, پروفيلدەر سىندى باسقا دا ءوندىرىس ورىندارىن قۇرۋ ءۇشىن 3 گەكتارعا قوسىمشا تسەح سالۋ جوسپارلانعان.
سول سياقتى 2024 جىلدىڭ اياعىندا, جەلتوقسان ايىندا يندۋستريالىق ايماقتا كابىل-سىم جەلىلەرىن شىعارۋعا ماماندانعان «Harmony Cable» جشس كاسىپورنى جۇمىسىن باستاعان بولاتىن. جوباعا سالىنعان ينۆەستيتسيا كولەمى شامامەن 2 ملرد تەڭگەنى قۇرادى. وسى زاۋىتتى ىسكە قوسۋدىڭ ارقاسىندا 50 ادام جۇمىس تاپقان. ءوندىرىس قۋاتتىلىعى ايىنا 100 تونناعا دەيىن مىس وڭدەپ, جىلىنا 8 ملرد تەڭگەدەن استام سوماعا 21 600 ملن مەترگە دەيىن كابىل مەن سىم شىعارۋعا مۇمكىندىك بەرەدى.
بۇگىنگى تاڭدا كاسىپورىن وتاندىق قۇرىلىس كومپانيالارىمەن, ەلەكتر تاۋارلارىن جەتكىزەتىن بولشەك ساۋدا ورىندارىمەن بەلسەندى جۇمىس ىستەيدى. تاۋارلاردىڭ نەگىزگى بولىگى ەل ىشىندە ساتىلادى, الايدا كومپانيا قىرعىزستان مەن تاجىكستانعا ەكسپورتقا شىعىپ, ەۋروپا ەلدەرىنە تاۋار تاسىمالداۋدى كەڭەيتۋدى جوسپارلاپ وتىر.
ء«بىز بالقاشتان ساتىپ الىناتىن وتاندىق مىستان كابىل شىعارامىز. قايتا وڭدەۋ كولەمى جىلىنا 1200 تونناعا جەتەدى. قازىر كاتانكادان سىم ءوندىرۋ جەلىسىن ىسكە قوسىپ, سونداي-اق كابىلدەرگە ارنالعان پلاستيكات – وقشاۋلاعىش ماتەريال ءوندىرۋ قۋاتىن كەڭەيتىپ جاتىرمىز», دەدى «Harmony Cable» جشس كوممەرتسيالىق ديرەكتورى ءمادي مۇحان ۇلى.
بۇگىندە قازاقستان مىسى كوبىنەسە تۇركياعا, سول جەردەن ەۋروپاعا ەكسپورتتالادى. كومپانيانىڭ ەندىگى ماقساتى – ارالىق تىزبەكتەردى اينالىپ ءوتىپ, ەۋروپالىق نارىققا شىعۋ.
ال ەندى جۋرناليستەردىڭ جولى تۇسكەن كەزەكتى كوسمەتيكالىق ونىمدەر مەن تۇرمىستىق حيميا وندىرىسىنە ماماندانعان «Telli Ondiris» جشس زاۋىتى 2024 جىلى قاڭتاردان باستاپ جۇمىس ىستەيدى. جوبانىڭ قۇنى 3 ملرد تەڭگە بولسا, ونىڭ 465 ملن تەڭگەسىن «الماتى قارجى» جشس نەسيەگە قارجىلاندىرىپ وتىر. كاسىپورىن اۋماعىندا وندىرىستىك جانە قويما ءۇي-جايلارى, سونداي-اق اككرەديتتەلگەن زەرتحانا ورنالاسقان.
كوسمەتيكالىق ءوندىرىس ورنى دا 49 ماماندى جۇمىسپەن قامتىپ وتىر. زاۋىت جۇمىسى جىلىنا 30 ملن بىرلىككە دەيىن ءونىم وندىرۋگە مۇمكىندىك بەرەدى. كاسىپورىن قىزمەتىنە كىرىسكەن العاشقى 10 ايىندا 380 مىڭنان استام ءونىم شىعارىلسا, ونىڭ ىشىندە سۋسابىن, شاش بالزامدارى, جۋىنۋعا ارنالعان گەل, سۇيىق سابىندار, لوسون, بەت سەرگىتەتىن سۇيىقتىقتار مەن ميتسەلليارلىق سۋ بار. كوسمەتيكالىق زاتتار «Asiya», «Telli», «Asia Professional» اتتى برەندتەرگە قوسا, ءىرى وتاندىق ساتۋشىلار ءۇشىن كەلىسىمشارت بويىنشا وندىرىلەدى. زاۋىت جاڭا ەكسپورتتىق نارىقتارعا شىعۋعا مۇمكىندىك بەرەتىن GMP ستاندارتىنىڭ فارماتسەۆتيكالىق تالاپتارىنا سايكەس سالىنعان.
ء«بىز كەلىسىمشارتتىق ءوندىرىس رەتىندە ءونىمدى كليەنتتىڭ ءوز برەندىمەن شىعارامىز. سونىمەن قاتار برەندتەرىمىزدى دامىتا باستادىق, ولاردىڭ قۇرامىندا 95% تابيعي كومپونەنت بار. كوسمەتيكالىق ونىمدەر شىعارۋ بارىسىندا جەرگىلىكتى شوپتەردى قولدانامىز, سىعىندىلاردى دا ءوز ەكستراكتورىمىزدا دايىندايمىز جانە جۋىردا اۆتورلىق شيكىزاتقا پاتەنتتەردى راسىمدەۋدى جوسپارلاپ وتىرمىز», دەيدى «Telli Ondiris» جشس ديرەكتورىنىڭ ورىنباسارى جاننا بايماعامبەتوۆا.
قورىتا كەلگەندە, جۇمىسى قىز-قىز قايناعان جاڭا ءوندىرىس ورىندارىنا باستاعان ءباسپاسوز ساپارى – الماتى يندۋستريالىق ايماعى – رەسپۋبليكالىق دەڭگەيدەگى ماڭىزدى جەتەكشى وندىرىستىك الاڭدار قاتارىندا ەكەنىن ايعاقتادى. قازىردىڭ وزىندە ونىڭ اۋماعىندا جالپى سوماسى 142,1 ملرد تەڭگەگە جەتكەن 41 جوبا ىسكە قوسىلىپ, 4 430 جۇمىس ورنى قۇرىلدى. ىسكە اسىرۋ ساتىسىندا 411,2 ملرد تەڭگە سوماسىنا 66 جوبا بار, وندا 7 453 جۇمىس ورنى قۇرىلادى.
«الماتىنىڭ يندۋستريالىق ايماعى» جشس باس مامانى دانا قالىقوۆا جۋرناليستەرگە بەرگەن سۇحباتىندا: ء«بىز تۇراقتى دامۋ ىرعاعى مەن ينۆەستورلار تاراپىنان جوعارى قىزىعۋشىلىقتى بايقاپ وتىرمىز. يندۋستريالىق ايماقتا مەملەكەتتىك قاراجات ەسەبىنەن تولىق ينجەنەرلىك ينفراقۇرىلىم, سونداي-اق ىڭعايلى كولىك لوگيستيكاسى مەن ءوزىنىڭ تەمىرجول ستانساسى بار», دەدى.
الماتى
