سول بەتتەگى تاعى ءبىر تارتىمدى ماقالانىڭ اۆتورى قانات بىرلىك ۇلى الاش كوسەمى ءالىمحان ەرمەكوۆ پەن ول كەزدە ستۋدەنت قوناەۆتىڭ پويىزدا كەزدەيسوق كەزدەسەتىن توسىن وقيعا جونىندە اڭگىمەلەيدى. ديمەكەڭ ومىرىندە تاڭعاجايىپ تىلسىم وقيعا جەتىپ ارتىلادى. قالامگەر, جۋرناليست رەتىندە ايتارىم, جاڭا شىققان كىتاپپەن وسى قىزىقتى دەرەكتى ۇيلەستىرىپ, ديمەكەڭە ارنايى بەت بەرگەن «ەگەمەنگە» ريزامىن. الەۋمەتتىك جەلىدەن جۇرت جابىلا وقىپ, ديمەكەڭ ءداۋىرىنىڭ ارداگەرلەرى ءبىر-بىرىنە ايتىپ جاتىر.
ديمەكەڭ تۋرالى جازىلعان كىتاپ جونىندە وي تولعاعان, كەمەڭگەردىڭ كوزىن كورگەن, وزىنە شاپاعاتى تيگەن ماحاڭا وتە كوپ حات جازعان اداممىن. شىندىعى سول, ارىپتەس زامانداسىمنان اۆتوردى قاناتتاندىراتىن, تىلەكتەس ەكەنىن سەزدىرەتىن اقجولتاي جاۋاپ حات كەلەتىن. كەيدە كىتاپ شىعارۋىما بايلانىستى كىمگە شىعۋ كەرەك ەكەنىن نۇسقايتىن.
2013 جىلى 9 جەلتوقساندا ماحاڭنىڭ ماعان جولداعان حاتىندا مىناداي جولدار بار. «قۇرمەتتى وراز دونەنباي ۇلى! جولداعان حاتىڭىز مەملەكەت باسشىسىنا تانىستىرىلدى. پرەزيدەنت حالقىمىزدىڭ ءبىرتۋار ۇلى پەرزەنتتەرىنىڭ ءبىرى د.قوناەۆتىڭ ەسىمىن ارداقتاپ, ءومىرى مەن اتقارعان ىستەرىن ناسيحاتتاپ جۇرگەن ەڭبەگىڭىز ءۇشىن سىزگە ءوزىنىڭ ريزاشىلىعىن جەتكىزۋدى تاپسىردى. م.قاسىمبەكوۆ».
بۇل ءوز الدىنا, ماحاڭنىڭ تىكەلەي وزىنە جولداعان حاتتارىم دا بار. ءبارى داناعايىپ ديمەكەڭدى دارىپتەۋدى, رۋحاني قازىنانى ۇرپاق ءۇشىن مەڭگەرۋدى مەڭزەيدى.
ءبىر نارسەنى ايتا كەتەيىن. كەيدە كەيبىرەۋلەر تۇڭعىش پرەزيدەنت قوناەۆتى قۇرمەتتەمەدى دەپ كىنا تاعادى. بۇل – ارتىق كەتكەندىك. استانانىڭ قاق ورتاسىنداعى قوناەۆ كوشەسى ەلباسىنىڭ كەزىندە اشىلدى عوي. مەن قازىر وسى كوشە بويىندا تۇرامىن.
ديمەكەڭدى 1972 جىلى الماتىدا قۇرىلىستا ىستەپ جۇرگەن كەزىمدە بريگاديرمەن سويلەسىپ تۇرعاندا كوردىم. ارادا كوپ وتپەي بۇرىنعى «سوتسياليستىك قازاقستان», قازىرگى «ەگەمەننىڭ» ءبىرىنشى بەتىندە العاش ەڭبەك ەرى اتاعىن العانداعى سۋرەتى كوز الدىمدا تۇر.تۋعان كۇنى 12 قاڭتار بولاتىن. ونىڭ بويىنداعى ون ەكى قاسيەتتى جازۋىما سانداردىڭ تىلسىم الەمى سەبەپ بولدى.
«ەگەمەنگە» شىققان ديمەكەڭنىڭ پاراساتتىلىعى جونىندە وي-تولعاۋ ءوز الدىنا, ەندى وقىرماندار ءوتىنىشىن ايتۋدىڭ رەتى كەلدى. وتكەندە الماتىداعى ديمەكەڭ مۋزەيىندەگى كەزدەسۋدە «قوناەۆتىڭ ون ەكى قاسيەتى» اتتى كىتاپشامدى بەلگىلى ۇستاز قالتاسىنا سالىپ, ستۋدەنت جاستارعا كورسەتىپ, ديمەكەڭنىڭ كەمەڭگەرلىگى جونىندە اڭگىمەلەيتىنىن ايتتى. ستۋدەنتتەر وسى ەڭبەكتىڭ الەۋمەتتىك جەلىدە بار ەكەنىن ايتىپ, ەندى تارالىمى كوپ بەلگىلى باسىلىمداردا جاريالانسا جاقسى بولار ەدى, كىتاپ, گازەت وقۋعا دەگەن قىزىعۋشىلىق ارتار ەدى دەدى. اتالعان ەڭبەك كەزىندە ءبىراز باسىلىمعا جاريالاندى. بۇل – قوناەۆقا دەگەن قۇرمەت, ارۋاققا دەگەن تاعزىم. بۇل ەڭبەك جەلىسى بويىنشا بەينەبايان ءتۇسىرىلدى. ەستەلىكتەرگە سىلتەمە جاسالادى. ولاي بولسا اقىلماننىڭ 12 قاسيەتىن ۇلگى ەتكەن ۇرپاق اتا جولىنان تايمايدى.
وراز قاۋعاباي
