وبلىستىق جاستار رەسۋرستىق ورتالىعى وكىلدەرىنىڭ ايتۋىنشا, اتالعان ءىس-شارا جۇمىسشى ماماندىقتار جىلىنا وراي ءوتىپ وتىر.
«جاس تۇلەكتەر ءۇشىن ماڭىزى زور بۇگىنگى ءىس-شارانى وبلىستىق قوعامدىق دامۋ باسقارماسى, جاستار رەسۋرستىق ورتالىعىنىڭ ۇيىمداستىردى. جۇزگە تارتا كاسىپورىن وكىلدەرى كەلىپ, جاستارعا ءۇش مىڭعا جۋىق بوس جۇمىس ورىندارىن ۇسىندى», دەيدى وبلىستىق جاستار رەسۋرستىق ورتالىعىنىڭ باسشىسى اباي دۇيسەكوۆ.
رەسۋرستىق ورتالىق باسشىسىنىڭ سوزىنشە, وڭىردەگى وقۋ ورىن تۇلەكتەرىنىڭ شامامەن 90 پايىزدان استامى ءوز ماماندىقتارى بويىنشا جۇمىسقا ورنالاسادى.
«بارلىعى بىردەي وسى جارمەڭكەدە جۇمىس تاۋىپ كەتەدى دەپ ايتا المايمىن. وقۋ ورىندارى ءوز ىشىنەن دە جارمەڭكە وتكىزىپ جاتادى. تۇلەكتەر وزدەرى قالاعان كاسىپورىنعا بارىپ, ورنالاسادى», دەيدى ا. دۇيسەكوۆ.
جۇمىس بەرۋشىلەر قاتارىندا «قازاقتەلەكوم» اق, «وتباسى بانك» اق, «قوستاناي مينەرالدارى» اق, ERG قۇرامىنا كىرەتىن «سسكوب» اق, «KIA Qazaqstan» اق, «Allur» اق, «بايان سۇلۋ» اق جانە ەكىنشى دەڭگەيلى بانكتەر مەن وزگە دە كومپانيالار بار.
بوس جۇمىس ورىندارى جارمەڭكەسى بارىسىندا ءبىرتالاي جاس تۇلەككە جۇمىس بەرۋشىدەن ناقتى ۇسىنىستار ءتۇستى. سونىڭ ءبىرى – قوستاناي پوليتەحنيكالىق جوعارى كوللەدجىنىڭ تۇلەگى مانسۇر مادياروۆ.
«مەن وندىرىستىك تەحنولوگيالارعا بۇرىننان قىزىعامىن. ماماندىعىم – تەحنيك-ەلەكترومەحانيك. وسى جارمەڭكە ارقىلى زاۋىت وكىلدەرىمەن تىكەلەي سويلەسۋگە مۇمكىندىك تۋدى. ولار ماعان جازعى تاعىلىمدامادان ءوتۋدى ۇسىندى. ءساتىن سالسا, تۇراقتى جۇمىسقا الۋى مۇمكىن», – دەيدى مانسۇر.
قوستاناي وبلىسى
