سوڭعى بىرنەشە كۇندە توپ سوڭعى بايانداۋ قۇرىلىمىندا باستى ءرول اتقاراتىن جانە بۇكىل وقيعانىڭ ەموتسيونالدى نۇكتەسىن بەلگىلەيتىن تۇنگى كورىنىستەرمەن جۇمىس ىستەدى.
جوبا تولىعىمەن قازاقستاندا تۇسىرىلگەن, ءحىىى عاسىر كەڭىستىگىنە ارنالعان, كينويندۋستريادا از زەرتتەلگەن العاشقى حالىقارالىق سەريال رەتىندە دايىندىق كەزەڭىندە نازارعا ىلىكتى.
ءتۇسىرىلىم 2025 جىلدىڭ 14 اقپانىندا باستالىپ, 11,5 اپتاعا سوزىلدى. جوبانىڭ بارلىق كەزەڭى قازاقستان اۋماعىندا جۇزەگە اسىرىلدى. نەگىزگى نۇكتەلەردىڭ قاتارىندا «قازاقفيلم» كينوستۋدياسى, تامعالى تاستىڭ كونە پەتروگليفتەرى, كوشپەندىلەر قالاسى, قيماسار مەن سۋىقتوبە شاتقالدارى, سونداي-اق ەسكەلدى بي اۋىلى بار. جوبانىڭ ۆيزۋالدى پاليتراسى تابيعي لاندشافتقا نەگىزدەلگەن ساندىق تەحنولوگيالارمەن فوندى الماستىرماۋ كوماندانىڭ ىرگەلى ۇستانىمىنا اينالدى.
تۋىندىنىڭ جارىققا شىعۋىمەن رەجيسسەر جانە شوۋراننەر ەمرە ساحين باسقارعان امەريكاندىق-تۇرىك Karga Seven Pictures كينوكومپانياسى اينالىسۋدا. ول كورەرمەندەرگە Rise of Empires: Ottoman and Testament: The Story of Moses سياقتى جوبالارىمەن تانىمال, ول الەمنىڭ 90 ەلىندە Netflix اعىندى پلاتفورماسىنىڭ توپ-10-نا كىردى. Karga SevenPictures «دارا» پرەزيدەنتتىك باستامالار قورىمەن بىرلەسە جوشى حان تۇسىنان باستاپ التىن وردا تاريحىن قايتا جانداندىرىپ, ەكرانعا شىعارۋدى قولعا الدى. ستسەناريدى ەمرە ساحين, كلەر مۋرسوم (زاڭنان تىس پاتشا) جانە اكادەميالىق دالدىك پەن درامانىڭ توعىسقان جەرىندەگى جۇمىستارىمەن تانىمال بريتاندىق تاريحشى دجاستين پوللارد (ۆيكينگتەر) جازعان.
تاريحي دەرەكتەردىڭ ناقتىلىعىن قامتاماسىز ەتۋ ءۇشىن التىن وردا تاريحى بويىنشا مامانداردىڭ حالىقارالىق كونسۋلتاتيۆتىك توبى جۇمىلدىرىلدى. ونىڭ قۇرامىنا قازاقستان, موڭعوليا, ۇلىبريتانيا, فرانتسيا, قىتاي جانە اقش ساراپشىلارى كىردى.
سەريالدىڭ شىعۋىنا بارلىعى 700-گە جۋىق مامان اتسالىستى. جۇمىس لوس-اندجەلەس, نيۋ-يورك, استانا, الماتى جانە ستامبۋلدان قاتار جۇرگىزىلدى. كوماندانىڭ باستى قۇرامى قازاقستاندىق كاسىپقويلاردان تۇردى (شامامەن 70%).
بۇكىل ءتۇسىرىلىم گەوگرافياسىن قامتۋ ءۇشىن ەمرە ساحين قازاقستاندىق جاس رەجيسسەر باسقارعان قوسىمشا ءتۇسىرۋ ءبولىمىن قۇرۋعا شەشىم قابىلدادى. بۇل كەستەنى بۇزباي, ساپانى ساقتاي وتىرىپ, بىردەن بىرنەشە جەردە تۇسىرۋگە مۇمكىندىك بەردى.
كاستينگكە الەمنىڭ تۇكپىر-تۇكپىرىنەن: اقش پەن ۇلىبريتانيادان موڭعوليا مەن ورتالىق ازيادان 4000-نان استام ءوتىنىم كەلىپ ءتۇستى. تىزىمگە ەمرە ءساحيننىڭ جەتەكشىلىگىمەن جەكە كاستينگتەن وتكەن 350 اكتەر كىردى. ونىڭ ىشىندە باستى رولدەردى سومداعان ون شاقتى ورىنداۋشى كىردى. ولاردىڭ كەيبىرەۋلەرى ءۇشىن «The Golden Empire» العاشقى ءىرى حالىقارالىق جۇمىسى بولماق. پروديۋسەرلىك توپتىڭ ايتۋىنشا, قازاقستاندىق اكتەرلەرمەن جۇمىس جاڭاشىلدىققا تولى بولدى. ولاردىڭ جانكەشتىلىگى, تارتىپتىلىگى جانە كەيىپكەرلەرىن تەرەڭ ءتۇسىنۋى كەيىپكەرلەردىڭ ەموتسيالىق رەڭكتەرىن, ىشكى قايشىلىقتارى مەن ۋاجدەرىن ءدال جەتكىزۋگە مۇمكىندىك بەردى.
قويىلىمدا جەكپە-جەك كورىنىستەرىنىڭ كۇردەلى حورەوگرافياسى ەرەكشە ورىن الدى. ولار ءۇشىن ورتالىق ازياداعى ەڭ تانىمال كاسكادەرلەردىڭ ءبىرى, فيلموگرافياسىندا Mulan (Disney), Marco Polo (Netflix), Vikings, The Last Duel جانە باسقا دا ءىرى جوبالاردى قامتيتىن Nomad Stunts كومانداسىجاۋاپ بەردى. مامانداردىڭ تاجىريبەسى سەريالعا 200 شاباندوزعا دەيىن قاتىساتىن كاسكادەرلىك كورىنىستەردى, سونداي-اق ۇيلەستىرىلگەن قاقتىعىستاردى كورسەتۋگە مۇمكىندىك بەردى.
«مەن ءارتۇرلى ەلدەردە كوپتەگەن ءتۇرلى جوبالاردى ءتۇسىردىم, بىراق بۇل جۇمىس مەنىڭ جۇرەگىمدە ەڭ كەرەمەت تۋىندىلاردىڭ ءبىرى رەتىندە ساقتالادى», - دەپ مويىندادى سەريالدىڭ رەجيسسەرى جانە شوۋ-جۇرگىزۋشىسى ەمرە ساحين. «قازاقستان – تاڭعاجايىپ ەل, تاڭعاجايىپ تابيعات, تالانتتى ادامدار جانە ءالى دە ايتىلۋىن كۇتىپ تۇرعان كوپتەگەن اڭگىمەلەر بار. قازاقستاندىق كوماندامەن جۇمىس ىستەۋ مەن ءۇشىن وتە ماڭىزدى تاجىريبە. بۇلار ناعىز تارتىلعان جانە مىقتى ماماندار بولدى, ولارمەن كەرەمەت فيلمدەر ءتۇسىرۋ وڭاي بولدى».
ءتۇسىرىلىمنىڭ سوڭعى كۇنى, ياعني 16 مامىردا جوبا الاڭىنا قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين باستاعان دەلەگاتسيا كەلدى. توپ قورىتىندى كورىنىستەردىڭ ءتۇسىرىلىم بارىسىمەن تانىسىپ, ەلىمىزدىڭ مادەني-تاريحي مازمۇنىن دامىتۋعا قوسقان ۇلەستەرى ءۇشىن بۇكىل جوبا توبىنا العىستارىن ءبىلدىردى.
ساپار قورىتىندىسى بويىنشا ول: «قازاقستان زاڭدى تۇردە بىرەگەي كوشپەلىلەر وركەنيەتى دامۋىنىڭ نەگىزگى ورتالىقتارىنىڭ ءبىرى بولىپ سانالادى جانە, سايىپ كەلگەندە, ءبىز ونى الەمدىك اۋديتورياعا لايىقتى تۇردە ۇسىنۋعا دايىن بولاتىن كەز كەلدى», دەپ اتاپ ءوتتى.
ءتۇسىرىلىم كەزەڭى اياقتالعانىمەن, سەريال بويىنشا جۇمىس جالعاسۋدا. الدا پوست-پروداكشن كەزەڭى: مونتاج, مۋزىكالىق وڭدەۋ, دىبىستىق, ۆيزۋالدى جانە گرافيكالىق ەففەكتىلەر. بۇعان دەيىن WaltDisney, Pixar, DreamWorks, Universal جانە Sony Pictures كومپانيالارىمەن جۇمىس ىستەگەن ستۋديالار جوبانىڭ كورنەكى بولىگىندە قازاقستاندىق كوماندامەن تىعىز بايلانىستا جۇمىس ىستەيتىن بولادى.
