ءىس-شاراعا وقۋ-اعارتۋ ءمينيسترى عاني بەيسەمباەۆ, ۇعا اكادەميكتەرى, جەتەكشى جاس عالىمدار, سونداي-اق ەلىمىز وڭىرلەرىنەن كەلگەن 400-دەن استام رەسپۋبليكالىق جانە حالىقارالىق كونكۋرستاردىڭ جەڭىمپازدارى مەن جۇلدەگەرلەرى, عىلىمي جەتەكشىلەرى قاتىستى.
جاس زەرتتەۋشىلەردىڭ عىلىمعا اتتاعان قادامىنا ءسات-ساپار تىلەپ, عىلىمي قاۋىمداستىقتىڭ ءاردايىم قولداۋ كورسەتۋگە ءازىر ەكەنىن اتاپ وتكەن پرەزيدەنت جانىنداعى ۇعا پرەزيدەنتى ا.كۇرىشباەۆ وقۋ-اعارتۋ مينيسترلىگىمەن بىرلەسىپ وتكىزىپ وتىرعان فورۋمنىڭ ماڭىزىن اتاپ ءوتتى. مەملەكەت باسشىسى قاسىم-جومارت توقاەۆتىڭ عىلىم مەن يننوۆاتسيانى دامىتۋ ماسەلەسىنە ايرىقشا كوڭىل ءبولىپ وتىرعانىن جەتكىزىپ, پرەزيدەنت تاپسىرماسىمەن عىلىم جۇيەسىن رەفورمالاۋ بويىنشا كەشەندى شارالاردىڭ ىسكە اسىپ جاتقانىن, سونىڭ نەگىزىندە عىلىمدى ەلىمىزدەگى مەملەكەتتىك جانە قوعامدىق دامۋدىڭ باستى قوزعاۋشى كۇشىنە اينالدىرۋ جۇمىستارى قارقىن العانىن اتاپ ءوتتى.
– بۇگىنگى شارا وسى رەفورمالاردىڭ ماڭىزدى قۇرامداس بولىگى عانا ەمەس, سونىمەن قاتار اعا بۋىن وكىلدەرىنىڭ وتاندىق عىلىمنىڭ بولاشاعىنا دەگەن قامقورلىعىنىڭ شىنايى كورىنىسى. سىزدەردى بولاشاقتا حالقىمىزدىڭ ءبىرتۋار ۇلى عالىمدارى – شوقان ءۋاليحانوۆ, قانىش ساتپاەۆ, الكەي مارعۇلان سىندى قايراتكەرلەردىڭ ىزگىلىكتى ءىسىن جالعاستىراتىن, الەمگە تانىمال عالىمدار قاتارىنان كورگىمىز كەلەدى. جاس تالانتتار – وتاندىق عىلىمنىڭ بولاشاعى! حالقىمىزدا «اسىل – تاستان, اقىل – جاستان» دەگەن دانا ءسوز بار. عىلىمنىڭ بولاشاعى – جاستاردىڭ قولىندا. ولاي بولسا, قابىلەتتى جاس تالانتتاردى تاۋىپ, ولاردى زامان تالابىنا ساي تاربيەلەپ, ءبىلىم دەڭگەيىن شىڭداۋ – ءبىزدىڭ قاسيەتتى مىندەتىمىز بولماق. جاس تالانتتاردى قولداۋداعى ۇلتتىق عىلىم اكادەمياسىنىڭ العاشقى قادامى – بىلتىر, تاۋەلسىزدىك جىلدارىندا تۇڭعىش رەت ۇلتتىق عىلىم اكادەمياسى جانىنان جاس عالىمدار كەڭەسىنىڭ قۇرىلۋىمەن بايلانىستى. كەلەسى جاساعان ماڭىزدى قادام – مەكتەپ قابىرعاسىنان باستاپ جاس دارىنداردى عىلىمعا تارتۋ. فورۋم – جاي عانا بىرجولعى باسقوسۋ نەمەسە ءسان ءۇشىن جاسالعان شارا ەمەس, بۇل – عىلىم سالاسىن كرەاتيۆتى ويلايتىن, قابىلەتتى جاستارمەن تولىقتىرۋعا باعىتتالعان ۇزاق مەرزىمدى ستراتەگيا, – دەپ اتاپ ءوتتى ۇعا پرەزيدەنتى.
فورۋم اياسىندا ۇعا جانىنان جاس زەرتتەۋشىلەر اكادەمياسى قۇرىلىپ, ونىڭ قۇرىلىمى مەن جۇمىس ورگاندارى جاساقتالدى.
عىلىمعا قىزىققان وقۋشىلاردىڭ بارلىعىن قولداۋ كەرەكتىگىن العا تارتقان ۇعا ۆيتسە-پرەزيدەنتى, اكادەميك اسقار جۇمادىلداەۆ:
– جوبالارمەن تانىسقاندا وقۋشىلاردىڭ عىلىمعا دەگەن ىنتاسىنىڭ جوعارى ەكەنىن بايقاپ وتىرمىز. فورۋمعا ءوز ايماعىندا بەلگىلى دارەجەدە جەتىستىك كورسەتىپ, عىلىمي زەرتتەۋلەردىڭ وزىق ۇلگىسىن كورسەتە بىلگەن وقۋشىلار جينالدى. جاساعان جوبالارى, ازىرلەمەلەرىنە قاراپ, جاس زەرتتەۋشىلەرگە قولداۋ قاجەت ەكەنىن كورىپ وتىرمىز. ۇلتتىق عىلىم اكادەمياسى عىلىمدى بالالار مەن جاستار اراسىندا ناسيحاتتاۋدى كۇشەيتە وتىرىپ, وسى فورۋم ۇلگىسىندەگى جوبالاردى الداعى ۋاقىتتا دا جالعاسىتىرا بەرەتىن بولادى. كورىپ وتىرعانىمىزداي, وقۋشىلاردىڭ ىنتا-جىگەرى بۇگىندە ادامزاتقا پايدالى, جاھاندىق ماسەلە تۋىنداتىپ وتىرعان تاقىرىپتارعا اۋىپ, ناقتى ءبىر سالادا ناتيجەلى جوبا ازىرلەر شىعۋعا بارىنشا تىرىسقان. بۇل جەردە عىلىمي جەتەكشىلەردىڭ دە قولداۋى ەرەكشە. ەندىگى كەزەكتە عىلىمعا تۇراقتى قولداۋ جوبالارىن جالعاستىرا بەرۋىمىز قاجەت, – دەپ اتاپ ءوتتى اكادەميك.
فورۋم وقۋشىلاردىڭ عىلىمي-زەرتتەۋ جوبالارى مەن ازىرلەمەلەرىن تانىستىرۋعا ارنالعان الاڭعا اينالادى. كورمەگە ۇسىنىلعان جوبالاردىڭ قاي-قايسىسىن الساق تا, ىزدەنىس پەن تاباندىلىقتان تۇرادى. جوبالاردىڭ ءبىرى عارىشپەن بايلانىستى بولسا, ەندى ءبىرى ەكولوگيانى جاقسارتۋعا باعىتتالعان. تابيعي ونىمدىلىك پەن تازا سۋدى ءتيىمدى پايدالانۋ, قوقىستاردى كادەگە جاراتۋ دا وسى زەرتتەۋلەرگە ارقاۋ بولىپ وتىر. مۇندا وقۋشىلاردىڭ دايىندىق دەڭگەيى باعالانىپ, جەتەكشى عالىمدار مەن ساراپشىلار تاراپىنان پىكىرلەر ايتىلىپ, ۇزدىك جاس زەرتتەۋشىلەر ماراپاتتالدى.
ۇزدىك عىلىمي ازىرلەمە اتالىمى بويىنشا:
1 دارەجەلى ديپلوممەن «بيونيكالىق پروتەز جانە ەكزوسكەلەت» جوباسى ءۇشىن الماز ۇلى ايبات, حاسەن سۇلتان, 2 دارەجەلى ديپلوممەن «KazZAI» عارىش تىك ۇشاعىنىڭ جەرگە پايداسى» جوباسى ءۇشىن جورابەك زايناب, 3 دارەجەلى ديپلوممەن «جوعارى دالدىكتەگى, ءورتتىڭ الدىن الاتىن روبوت-ماشينا» جوباسى ءۇشىن رايمجان اليمجان ماراپاتتالدى.
ۇزدىك بايانداماسى ءۇشىن:
1 دارەجەلى ديپلوممەن الماتى قالاسى, №178 مامانداندىرىلعان ليتسەيدىڭ 10 سىنىپ وقۋشىلارى قاجىكەلدى جۇمابەك, ەرالى امانجول, 2 دارەجەلى ديپلوممەن الماتى قالاسى, ى.التىنسارين اتىنداعى №159 گيمنازياسىنىڭ 10-سىنىپ وقۋشىسى دانيال مۇرات, الماتى قالاسى, №165 مامانداندىرىلعان ليتسەيدىڭ 9-سىنىپ وقۋشىسى ارۋجان ايدارحانوۆا, 3 دارەجەلى ديپلوممەن اقتوبە وبلىسىنان 11-سىنىپ وقۋشىسى جانسايا ناعاشىباەۆا, قوستاناي قالاسى № 1 مەكتەپ-ليتسەيىنىڭ 10 سىنىپ وقۋشىسى نيكيتا بەلاشوۆ, استانا قالاسى, سۇلتانبەك قوجانوۆ اتىنداعى №64 مەكتەپ-ليتسەيىنىڭ 10 د سىنىپ وقۋشىسى ازات جۇماش ماراپاتتالدى.
«زياتكەر» ءبىلىم بايگەسى بويىنشا №52 جالپى ءبىلىم بەرەتىن مەكتەپتىڭ, شوقان ءۋاليحانوۆ اتىنداعى №12 ماماندىرىلعان گيمنازياسىنىڭ وقۋشىلارى ماراپاتتالدى.
وقۋشىلار فورۋم اياسىندا اكادەميك ق.ي. ساتباەۆ, ارحەولوگيا جانە قازاقستان عىلىمى تاريحى مۋزەيلەرىنە ەكسكۋرسيا جاساپ, جەتەكشى جاس عالىمدار مەن اكادەميكتەردىڭ باياندامالارىن تىڭداپ, شەبەرلىك ساعاتتارىنا قاتىستى. فورۋم قاتىسۋشىلارىنا «قوجا – جاڭا ساياحات ءفيلمى كورسەتىلدى.
الماتى
