كورمەدەگى سۋرەت, گرافيكا جانە ءمۇسىن ونەرىندەگى شىعارمالار حالىقتىڭ باسىنداعى قيلى كەزەڭ مەن ەرلىككە تولى وقيعالاردى ءار ءتۇرلى بۋىنداعى سۋرەتشىلەردىڭ كوزىمەن شىنايى كورسەتەدى. سوعىس تاقىرىبىنا ارنالعان كورمەلەر مۋزەيدە جىل سايىن وتكىزىلەدى, سەبەبى بۇل – تاريح تىزبەگىندەگى تۇتاس ۇرپاق ءۇشىن ماڭىزىن جويمايتىن قۇندى ەستەلىك.
جوعارى كاسىبي دەڭگەيدە ورىندالعان تۋىندىلاردىڭ وزەگىندە جاندى ءومىر بار, ءار دەتال قاراپايىمدىلىق پەن شىنايىلىققا تولى, تراگيزممەن, پوەتيكالىق مازمۇنمەن ورىلگەن ونەر تۋىندىلارىنداعى ءتۇيىن بىرەۋ – ەرلىكتى كورسەتۋ. ولار وتان الدىنداعى پارىز تۋرالى, ەل باسىنا تونگەن قاۋىپ, وزبىر باسقىنشىنى جەڭگەن حالىقتىڭ جەڭىسى مەن سالتاناتى تۋرالى ايتادى.
ەكسپوزيتسيادا ۆ. انتوششەنكو-ولەنەۆ, ا.باقتىعاليەۆ, ر.ۆەليكانوۆا, ن.گاەۆ, ا.دروزدوۆ, پ.زالتسمان, ق.كامەتوۆ, ءا.قاستەەۆ, م.كيسامەدينوۆ جانە باسقا دا اۆتورلاردىڭ گرافيكالىق جۇمىستارى ماڭىزدى ورىن الادى. بۇل شىعارمالاردىڭ بىرقاتارى كوپشىلىككە العاش رەت ۇسىنىلىپ وتىر. م.كاليموۆ, ۆ.كيرەەۆ, ق.تەلجانوۆ, ە.تولەپباي, م.حيتاحۋنوۆ جانە باسقا دا سۋرەتشىلەردىڭ بۇرىننان بەلگىلى كەيبىر كەسكىندەمە جۇمىستارى گرافيكالىق پاراقتارمەن بىرىكتىرىلگەن.
ەكسپوزيتسيادا ەلىمىزدىڭ جەتەكشى مۇسىنشىلەرى — ە.مەرگەنوۆ پەن س.سەرگەباەۆتىڭ مۇسىندىك كومپوزيتسيالارى دا كورنەكى تۇستان كوز تارتادى. جوبانىڭ ورتالىق بولىگىندە ل.كاليموۆانىڭ «باتا» گوبەلەنى ورنالاسقان.
كورمەنىڭ مەديا ءبولىمى جەڭىس جولىندا جاۋىنگەرلىك رۋح پەن قايسارلىقتىڭ ۇلگىسىن كورسەتىپ, جاۋعا قارسى اتويلاپ شاپقان باتىرلار ەرلىگىن دارىپتەۋگە ارنالعان. وتتى جىلداردىڭ وشپەس شەجىرەسىن جازعانداردىڭ اراسىندا قازاقستان سۋرەتشىلەرىنىڭ ەسىمى دە قۇرمەتپەن اتالادى, اتاپ ايتقاندا, ءۇ.اجيەۆ, ن.الەكساندروۆ, پ.اندريۋك, پ.انتونەنكو, ك.بارانوۆ, ي.بوندارەنكو, ي.ۆينوگرادوۆ, ۆ.ۆوروبيحين, ا.گوروۆىح, پ.دانيلوۆ, ۆ.دميتريەۆ, ا.دروزدوۆ, ا.ەۆداكوۆ, د.ەلكين, ر.ەسىركەەۆ, ا.زاكوۆرياشين, گ.يلياەۆ, ا.يلين, د.كالاچەۆ, ج.قاناپيانوۆ, ي.كۆاچكو, ش.كەنجەباەۆ, ۆ.كولودەنكو, ۆ.كونستانتينوۆ, گ.ماكسيموۆ, پ.ماريكوۆسكي, ە.مولدانيازوۆ, ر.مەيىرمانوۆ, ن.ناسەدكين, ۆ.نەستەروۆ, ن.نۇرمۇحاممەدوۆ جانە تاعى باسقالارى بار.
ەكى بولىمنەن تۇراتىن مەدياەكسپوزيتسيا سوعىس قاھارماندارىنىڭ پورترەتتىك حرونيكاسىن, سوعىسقا قاتىسقان سۋرەتشىلەردىڭ ەرلىگىنە بايلانىستى سۇحباتتار مەن دەرەكتى فيلمدەردىڭ ترانسلياتسياسى — كورەرمەنگە الىستا قالعان جىلداردىڭ وقيعالارىن تەرەڭىرەك سەزىنۋگە مۇمكىندىك بەرەدى.
الماتى
