ءىس-شاراعا س.يماشەۆپەن بىرگە ەڭبەك ەتكەن بۇرىنعى ارىپتەستەرى, ءار جىلدارداعى پارلامەنت دەپۋتاتتارى, تانىمال مەملەكەت جانە قوعام قايراتكەرلەرى, سونداي-اق مەرەيتوي يەسىنىڭ تۋىستارى مەن جاقىندارى قاتىستى.
كونفەرەنتسيا بارىسىندا قاتىسۋشىلار س.يماشەۆتىڭ ساياسي مۇراسىن, مەملەكەتتىك قۇرىلىستىڭ, پارتيالىق جۇيەنىڭ دامۋىنا قوسقان ۇلەسىن, رەسپۋبليكانىڭ زاڭنامالىق نەگىزىن قالىپتاستىرۋداعى ءرولىن جانە ونىڭ قازىرگى زامان تالاپتارى اياسىنداعى ماڭىزدىلىعىن تالقىلاپ, ەستەلىكتەرىمەن ءبولىستى.
ايتا كەتسەك, ساتتار نۇرماش ۇلى 1925 جىلى قازىرگى اتىراۋ وبلىسىنىڭ قۇرمانعازى اۋدانى بىرلىك اۋىلىندا دۇنيەگە كەلگەن. 1944-45 جىلدارى ەكىنشى دۇنيەجۇزىلىك سوعىسقا قاتىسقان. ودان كەيىن مەملەكەتتىك قىزمەتتە ەڭبەك ەتتى. 1984 جىلى 22 اقپاندا الماتى قالاسىندا قايتىس بولدى.
جيىندا ءسوز العان ءماجىلىس دەپۋتاتى دۇيسەنباي تۇرعانوۆ س.يماشەۆتىڭ «تۇلعا» دەپ اتاۋعا لايىق ازامات بولعانىن اتاپ ءوتتى. «سەبەبى, وسىنداي كىسىلەر قاي جەردە قانداي قىزمەت اتقارسا دا, جاۋاپكەرشىلىگىمەن ادامگەرشىلىك, پاراساتتىلىق قاسيەتتەرىمەن تاريحتا ءوزىنىڭ ءىزىن قالدىرادى. ونىڭ ءومىر جولى – زاماننىڭ ايناسى. ول كەڭەستىك قازاقستاننىڭ اياققا تۇرۋىنا, بۇگىنگى تاۋەلسىز قازاقستاننىڭ نەگىزى بولعان ىرگەتاستى قالىپتاستىرۋعا زور ۇلەس قوستى» دەدى ول.
ەلىنە ولشەۋسىز ەڭبەك ەتكەن قايراتكەردىڭ وزگە دە جەتىستىكتەرىن ەسكە سالعان دەپۋتات الماتى قالاسىنداعى ءوزى تۇرعان ۇيدە ءالى كۇنگە ەسكەرتكىش تاقتا ورناتىلماعانىن قىنجىلا جەتكىزدى. مۇنداي ءىرى تۇلعانىڭ ۇمىتىلىپ كەتۋىنە جول بەرمەۋىمىز كەرەك ەكەنىن ايتتى.
كونفەرەنتسيا قورىتىندىسى بويىنشا قاتىسۋشىلار قارار قابىلدادى. وندا ۇكىمەتكە س.يماشەۆتىڭ عىلىمي جانە ساياسي مۇراسىن زەردەلەۋدى جانە ناسيحاتتاۋ, عىلىمي ەڭبەكتەرى مەن ول تۋرالى ەستەلىكتەر جيناعىن, مۇراعاتتىق قۇجاتتار جيناعىن شىعارۋ, ونىڭ قىزمەتى تۋرالى ماتەريالداردى قازاقستان تاريحى بويىنشا ءبىلىم باعدارلاماسىنا ەنگىزۋ, اتىراۋ وبلىسى قۇرمانعازى اۋدانىنداعى بىرلىك اۋىلىن س.يماشەۆتىڭ ەسىمىمەن قايتا اتاۋ, استانا مەن الماتى قالالارىنداعى ءبىر-ءبىر كوشەگە ونىڭ ەسىمىن بەرۋ, سونداي-اق وسى قالالارداعى ءبىر-ءبىر مەكتەپكە دە ەسىمىن بەرۋ, ەلىمىزدىڭ بىرقاتار ۋنيۆەرسيتەتىنىڭ تاريح فاكۋلتەتى ستۋدەنتتەرى ءۇشىن س.يماشەۆ اتىنداعى مەملەكەتتىك ستيپەنديالاردى قۇرۋ جانە الماتىداعى ءوزى تۇرعان ۇيگە ەسكەرتكىش تاقتا ورناتۋ تۋرالى ۇسىنىستار ايتىلعان.
