اقمارال سپورتتى 5 جاسىنان تاڭداپ, ۇيىنە جاقىن سپورت مەكتەبىنە بارادى. بىراق باپكەر شىناشاقتاي قىزدىڭ نازىك بەينەسىن قومسىنادى. سپورتپەن شۇعىلدانۋعا تىم ەرتە ەكەنىن ايتىپ, مەكتەپكە وقۋعا قابىلدانعاندا كەلىڭدەر دەيدى. ارادا ءبىر جىل وتكەندە سپورت مەكتەبىنە قايتا بارادى. باپكەر ءسوزىن جۇتپاي, اقمارالدى كاراتە ۇيىرمەسىنە جازادى. كىلەڭ ەر بالالارمەن بىرگە جالعىز قىز جاتتىعۋدى باستايدى. كوپ ۇزاماي وتباسى قالاعا قونىس اۋدارادى دا, بۇل سپورت تۇرىنەن قول ۇزەدى. 6-سىنىپتان باستاپ استانا قالاسىندا وقي ءجۇرىپ, دزيۋدو كۇرەسىنىڭ قىر-سىرىن مەڭگەرىپ, بىلىكتىلىگىن شىڭدايدى. وسىدان كەيىن اقمارالدى قالىڭ جانكۇيەر دزيۋدو كۇرەسىنەن تانىدى. تالانتتى سپورتشى قارشادايىنان-اق ءوزىنىڭ تەگەۋرىندى ەكەنىن بايقاتىپ, ءتۇرلى سايىستا ولجا سالدى. 17 جاسىنا دەيىن جاسوسپىرىمدەر مەن جاستار اراسىنداعى ءتۇرلى دەڭگەيدەگى دودالارعا توپ جارىپ, ەسىمى اۋىزعا ىلىكتى. وكىنىشكە قاراي, كولدەنەڭ كيلىككەن كەسەل بارلىعىن باسقاشا ءوربىتتى. كوزىنىڭ كورۋ قابىلەتى بىردەن كۇرت ناشارلادى. دارىگەرلەردىڭ تەكسەرىسىنەن كەيىن سپورتتى دوعارۋ قاجەتتىگى ايتىلدى. بىراق قايسار قىز بۇعان كەلىسكەن جوق. جاتتىعۋدى جالعاستىرعانىمەن, كوزى قاراۋىتىپ, كىناراتى كولدەنەڭدەي بەردى...
اقىرى الدىندا ەكى تاڭداۋ تۇردى: نە سپورتتى مۇلدە دوعارۋ بولماسا پارادزيۋدو كۇرەسىمەن شۇعىلدانۋ. التى ايداي سپورتتان الىستاپ, ۇيدە اناسىنىڭ قاسىندا بولدى. زامانداس قۇربىلارى, جاناشىر اعايىن-تۋىستارى دا ەڭ اۋەلى دەنساۋلىق زور بايلىق ەكەنىن العا تارتىپ, سپورتتى دوعارۋ قاجەت دەگەن اقىلىن جاۋدىردى. اناسى قىزىنىڭ بولاشاعىنا زور ءۇمىت ارتىپ, پارادزيۋدومەن شۇعىلدانۋىن قۇپ كورەدى. انا جۇرەگى الداماعان ەكەن. قازاق قىزدارىنىڭ قايسار مىنەزىن الەمگە ايگىلەپ, ءور رۋحىن پاش ەتىپ جۇرگەن پەرزەنتىنە اناسى ارقاشان قولداۋ كورسەتتى.
«2016 جىلى جاستار اراسىندا ازيا چەمپيوناتىنا ازىرلىكتى باستادى. وعان دەيىن دە قۇرلىق دوداسىندا ەكى مارتە توپ جارىپ, ءوزىنىڭ تەگەۋرىندى بالۋان ەكەنىن پاش ەتىپ, 48 كگ سالماقتا كوشباسشى سپورتشى بولدى. الماتىداعى وقۋ-جاتتىعۋ كەزىندە كۇندە حابارلاسىپ جۇردىك. بىردە ءۇش كۇن تىم-تىرىس, حابار ءۇزىلدى. جۇرەگىم بىردەڭەنى سەزگەندەي اتقاقتاپ, كەۋدەمە سىيماي سوعادى. وزىمەن بايلانىسا الماعان سوڭ, باپكەرىمەن تىلدەستىم. ولار بارلىق جايدى ايتتى. جاتتىعۋ كەزىندە اقمارالدىڭ جامباس سۇيەگى سىنىپ ەسىنەن تانىپ قالعان ەكەن. سوندىقتان وزىنە كەلىپ السىن دەپ كۇتكەنىن ايتتى. كەيىن ۇشاقپەن استاناعا جەتكىزدى, ءبىز قارسى العاندا قىزىمنىڭ وتكىر جانارى مەنى جىگەرلەندىرە ءتۇستى. اياعى تاڭىلىپ, اربادا وتىرعان قىزىمنىڭ جانارىنان مەن وراسان رۋحتى كوردىم. «سپورتتى دوعارارسىڭ» دەسەم, ونىڭ بالا كۇنىنەن ارمانداعان ماقساتىنا بالتا شاپقانداي بولار ەدىم. كەرىسىنشە, بۇل سىناقتى دا ەڭسەرىپ, جەڭىسكە جەتەسىڭ» دەپ جىگەرلەندىردىم. ەمدەلىپ, جازىلدى. دارىگەرلەر كۇرەسۋ بىلاي تۇرسىن, ءوز اياعىمەن ءجۇرىپ كەتۋدىڭ ءوزى نەعايبىل دەگەندى ەسكەرتتى. بىراق ەم-دومنىڭ ارقاسىندا سىرقاتىنان ايىعىپ, ارادا توعىز اي وتكەندە الماتىدا ازيا كۋبوگىندە جەڭىمپاز اتاندى. مەن سول كەزدە ونىڭ كەلەشەگىنەن كەمەل ناتيجە بولاتىنىن سەزدىم دە, سەنىم ارتتىم. سپورتتاعى سارا جولىندا جەڭىس پەن جەڭىلىس قاتار ءوربىدى. ساتسىزدىكتەن سۇرىنگەن ساتىندە بەلدەسۋدى دوعارىپ, ءتىپتى مۇلدەم قويسام با دەگەن دە وي تۋىندادى. بىراق قىزىمنىڭ مىنەزىنەن چەمپيونعا ءتان رۋحتى بايقايتىنمىن. جەتىستىككە جەتسەم دەگەن ماقساتى ءتۇبى ورىندالاتىنىنا سەنگەندىكتەن, جىگەرلەندىردىم», دەيدى اناسى روزا بۋجىگىتوۆا.
«اقمارال پاريج پاراليمپياداسىنىڭ چەمپيونى اتانۋ ارقىلى مەنى تاربيەلەدى دەر ەدىم. وتباسىندا چەمپيون ءوسىپ شىعۋ ءۇشىن ەڭ اۋەلى اتا-انا سوعان ساي بولۋى كەرەك دەپ سانايمىن. جانكۇيەرلەر سپورتشىنىڭ تەك ءومىرىنىڭ كۇنگەيىن – جەڭىسكە جەتكەن جارقىن ءساتىن عانا كورەدى. ال كولەڭكەلى تۇستاعى قانشاما وكىنىش, كەدەرگىلەر, جازاتايىم جاراقاتتىڭ اۋىرتپالىعى – ءبارى دە اتا-انانىڭ ارقاسىنا باتادى. بالا سپورتپەن كاسىبي شۇعىلدانعاندا كوپ قارجى شىعىندايسىڭ, ۇلتتىق قۇراما قاتارىنا قوسىلعانشا ءتۇرلى دەڭگەيدەگى جارىستارعا قاتىسۋعا جول شىعىن, جاتىن ورنى, تاماعى – ءبارى-ءبارى اتا-انانىڭ ەسەبىنەن تولەنەدى. جاراقاتتانسا ءدارى-دارمەگىن الاسىڭ, ودان بولەك ىشەتىن دارۋمەندەرى دە ارزان ەمەس. سوندىقتان دا اتا-انا وسىنداي جاۋاپكەرشىلىكتىڭ بولاتىنىن سەزىنۋگە ءتيىس. اقمارال ەل ىشىندە عانا ەمەس, حالىقارالىق سايىسقا شىعاردا دا ءبىز اپكەسى مەن ءىنىسى تورتەۋمىز اقىلداسىپ كەڭەسەتىن ەدىك. قىزىمىز الاڭسىز جاتتىعۋ جاساسىن دەپ, ساپارىنا قاجەتتى قاراجاتتى تاۋىپ اتتاندىرامىز. اپكەسى جارىس كەزىندە ءسىڭلىسىن ءۇي جيناۋ, كىر جۋ سەكىلدى شارۋادان بوساتادى. ءىنىسى دە قولعابىس ەتىپ, قامقورلىعىن كورسەتەدى. بالاسى سپورتپەن شۇعىلداناتىن اتا-انالارعا ايتارىم – جەڭىس پەن جەڭىلىس قاتار ورىلەدى. جەڭىلسە ء«بىز سەنىڭ جولىڭا قىرۋار قارجى جۇمسادىق, قايتارىمى قايدا» دەپ كەيىستىك تانىتۋعا بولمايدى. بۇل بالانىڭ مەسەلىن قايتارىپ, رۋحىن سىندىرادى. كەرىسىنشە, جەڭىلگەن ساتىندە سۇيەۋ بولىپ, جىلى ءسوزدى اياماۋ كەرەك», دەيدى ارداقتى انا.
اقمارال دزيۋدو كۇرەسىمەن شۇعىلدانا باستاعاندا اناسى بىرگە تالقىلاۋ ماقساتىندا وسىناۋ بەكزادا ونەردى ءوزى دە زەرتتەپ, زەردەلەپ كوردى. الەمنىڭ تاڭداۋلى بالۋاندارىنىڭ, جازعى وليمپيادا دوداسىن ءۇش مارتە ۇتقان, الەم چەمپيوناتىنىڭ التىنىن بىرنەشە رەت ولجالاعان ساڭلاقتاردىڭ بەلدەسۋلەرىن كوردى. كىمنىڭ قانداي ءادىستى وڭتايلى جۇزەگە اسىراتىنىن پايىمدادى. ءاربىر ادىسكە قانداي باعا بەرىلەتىنىن ءتۇسىندى. وسىلايشا انا مەن بالا ءدۇبىرلى دودالاردى قاتار وتىرىپ سارالايتىن.
2021 جىلى پارادزيۋدوعا تۇبەگەيلى اۋىسىپ, باقىلاۋدان ءوتىپ J2 ساناتىنا اۋىستى. پارادزيۋدونىڭ الەم چەمپيوناتى مۇلدە بولەك بولدى. بىراق جىگەرلى قىز بارلىعىن جىلدام يگەردى. 2022 جىلى باكۋدە پارادزيۋدودان الەم چەمپيونى اتاندى. فينالدىق سىندا ريو پاراليمپياداسىنىڭ چەمپيونى فرانتسۋز قىزى مارتينە ءساندريدى ايقىن ۇتتى. جالپى, پارادزيۋدو عانا ەمەس, دزيۋدو كۇرەسىنەن دە قىزدارىمىز اقمارالعا دەيىن الەم چەمپيونى اتانعان ەمەس. سول جالىنان ۇستاتپاي كەلە جاتقان جەڭىسكە جەرلەسىمىز 23 جاسىندا قول جەتكىزىپ, جاھانعا داڭقى جايىلدى. بىلتىر پاريج تورىندە وليمپيادانىڭ التىنى كەۋدەسىندە جارقىرادى. بۇل بەلەس اسۋ بەرگەنگە دەيىن 2023 جىلى توكيو تورىندە گران-پري دوداسىندا وزىق شىقتى, حانچجوۋداعى جازعى ازيا پارا ويىندارىندا ۇزدىك بولدى. ءوزىنىڭ زار كۇيىندە جۇرگەنىن, ناعىز بابىنا ەنگەنىن دالەلدەدى.
پاريجدە وتكەن پاراليمپيادا ويىندارىنا اقمارالدىڭ اناسىمەن بىرگە اتا-ەنەسى دە قولداۋ كورسەتۋگە باردى. «قىزىم تاتاميگە شىعار ساتتە قىراعى جانارىنان جەڭىستىڭ ۇشقىنىن كوردىم. العاشقى بەلدەۋىندە ۇندىستاندىق سپورتشى كوكيلانى يپپونمەن ايقىن ۇتتى. جارتىلاي فينالدا تۇرىك جاكحيدە ەكەنى دە ەركىن ۇتتى. فينالدا سىرالعى قارسىلاسى, وتە تاجىريبەلى فرانتسۋز قىزى مارتينە ءساندريندى دە يپپونمەن جەڭدى. زالداعى جەرگىلىكتى جانكۇيەرلەردىڭ سپورتشىسىن قىزۋ قولداۋى پسيحولوگيالىق قىسىم بولدى. بىراق اقمارال وسالدىق تانىتقان جوق. ءانۇرانىمىز شىرقالىپ, كوك تۋىمىز جەلبىرەي كوتەرىلىپ, قىزىمنىڭ ارمانى ورىندالعانىنا جاراتقانعا تاۋبە ايتتىم», دەيدى ر.بۋجىگىتوۆا.
ناۋاتبەكتىڭ ءور رۋحتى قىزىنىڭ ەندىگى مەجەسى – 2028 جىلى وتەتىن لوس-اندجەلەس پاراليمپياداسىنىڭ التىنى. سول بيىككە ات بايلاعانشا توقتاماق ەمەس.
