كوللاجدى جاساعان – قونىسباي شەجىمباي, «EQ»
سىبايلاس جەمقورلىققا قارسى ءىس-قيمىل اگەنتتىگىنىڭ پاۆلودار وبلىسى بويىنشا دەپارتامەنتى ورمان قورعاۋ سالاسىنداعى سىبايلاس جەمقورلىق تاۋەكەلدەرىنىڭ سىرتقى تالداۋىن جاسادى. تالداۋ كورسەتكەندەي, ورمان قورعاۋ مەكەمەلەرى قىزمەتىنىڭ بارلىق ساتىلارىندا جەمقورلىق تاۋەكەلدەرى بايقالعان. جاعىمسىز فاكتور سالاداعى ۇيىمداستىرۋشىلىق-باسقارۋ بۋىنىنان باستاپ اعاش تۇتىنۋشىلارمەن بايلانىسقا دەيىنگى ساتىلاردا انىقتالعان.
– پاۆلودار وبلىسىنىڭ ورماندارى زاڭسىز كەسىلىپ جاتىر. مۇنى قولىمىزداعى ستاتيستيكالىق دەرەكتەر راستايدى. بىلتىر قۇرامىندا «ەرتىس ورمانى» رەزەرۆاتىنىڭ باسشىلىعى بولعان ۇيىمداسقان قىلمىستىق توپتىڭ جۇمىسى توقتاتىلدى. قىلمىستىق ءىس سوتتا قارالىپ جاتىر. بۇعان قوسا, رەزەرۆاتتىڭ شالداي فيليالىندا جيىنتىق قۇنى 12 ملن تەڭگەگە باعالاناتىن قاراعاي تۇقىمىنىڭ جەتىسپەۋشىلىگى انىقتالدى. قازىرگى ۋاقىتتا تۇقىم رەزەرۆاتتىڭ بالانسىنا قايتارىلدى, – دەيدى سىبايلاس جەمقورلىققا قارسى ءىس-قيمىل اگەنتتىگىنىڭ پاۆلودار وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى اسەت وسپانوۆ.
ايماقتاعى ورمان رەسۋرستارىن قالپىنا كەلتىرۋ – ماڭىزدى ماسەلە. كوشەت پەن تۇقىم ماتەريالدارىنىڭ تاپشىلىعى ورماندى قالپىنا كەلتىرۋ جۇمىستارىنا قوسىمشا ساتىپ الۋلار ۇيىمداستىرۋدى تالاپ ەتەدى. الايدا بيۋدجەت شىعىندارىن الدىن-الا بولجاۋ تەندەرلەردە جەمقورلىق قاۋپىن ارتتىراتىنى بايقالادى. اسىرەسە كوشەتتەردى ساتىپ الۋ بارىسىندا بۇل قۇبىلىس ءجيى بوي كورسەتىپ قالادى. باقىلاۋدىڭ جەتكىلىكسىزدىگى قارجىنىڭ ۇرلانۋىنا, ساتىپ الۋ ۇدەرىسىندەگى ايلا-شارعىلارعا قولايلى جاعداي تۋدىرىپ وتىرعانعا ۇقسايدى.
سىبايلاس جەمقورلىققا قارسى قىزمەت ەرەكشە قورعالاتىن تابيعي اۋماقتارداعى جەمقورلىق تاۋەكەلدەرىن سىرتقى تالداۋ قورىتىندىسى بويىنشا 35 ۇسىنىس ەنگىزگەن. ونىڭ ۇشەۋى ورىندالسا, وزگەسى ىسكە اسۋ كەزەڭىندە.
«ەرتىس ورمانىنداعى» اعاش ۇرلىعى سوناۋ 90-جىلداردان بەرى جالعاسىپ كەلە جاتىر. تاجىريبەلى ماماندار الداعى جىلدارى قاراعاي كوشەتتەرىن ەگۋ, ورماندى كۇزەتۋ جۇمىستارىن جۇيەلى ۇيىمداستىرىپ, ورمان شارۋاشىلىقتارىنىڭ ماتەريالدىق-تەحنيكالىق بازاسى نىعايتىلا بەرسە, كوپ ناتيجەگە قول جەتكىزۋگە بولاتىنىن ايتادى. الايدا مەكەمە باسشىلىعىنىڭ ءجيى اۋىسۋى كەيىنگى جىلدارى بەلگىلى ءبىر كەلەڭسىزدىكتەردى تۋدىرىپ وتىر. بۇعان دەيىنگى باسشىلارىنىڭ كەيبىرى زاڭسىزدىققا جول بەرىپ, سوتتالىپ كەتتى. ورمان ۇرلىعى بەلەڭ الىپ, كولدەنەڭ كوك اتتىلار ويلارىنا كەلگەنىن جاسادى. بۇل بەيباستاق ارەكەتتەردىڭ كەيىنگى جىلدارى ازايىپ كەلە جاتقانى ءمالىم. ەندىگى رەتتە ورمان كۇزەتىن نىعايتىپ, قۇقىقتىق تۇرعىدان جاۋاپكەرشىلىكتى كۇشەيتە تۇسەتىن ارنايى زاڭدار قابىلدانۋى كەرەك. ورمانشىلاردىڭ مارتەبەسىن كوتەرىپ, ەڭبەكاقىلارىن وسىرگەن ابزال. سوندا ىنتا دا, جۇمىس كورسەتكىشتەرى دە ارتا تۇسەدى.
پاۆلودار وبلىسى
