فوتو: ازامات قاناپيا
جيىنعا اقجايىق اۋدانىنىڭ اكىمى مۇرات سەردالين, وبلىس اكىمىنىڭ ايەلدەر ءىسى جونىندەگى كەڭەسشىسى جانسۇلۋ تورەمۇراتوۆا, وبلىستىق قوعامدىق دامۋ باسقارماسى باسشىسىنىڭ ورىنباسارى گۇلجانار شوكەەۆا, انالار كەڭەسىنىڭ مۇشەلەرى, ۇستازدار مەن اۋىل تۇرعىندارى قاتىستى.
انالار كۇنى مەن حالىقارالىق وتباسى كۇنىنە وراي ۇيىمداستىرىلعان شارا وتباسى قۇندىلىعىن دارىپتەۋ, قوعامدا انا مارتەبەسىن كوتەرۋ, ۇرپاق تاربيەسىنىڭ ماڭىزىن ارتتىرۋ سەكىلدى ماڭىزدى تاقىرىپتاردى تالقىلادى. فورۋم قوناقتارى اۋەلى اۋدان ورتالىعىنداعى «اقبوتا» بالاباقشاسىن ارالاپ, مەكەمەنىڭ حالقىمىزدىڭ سالت-ءداستۇرى, وتباسى قادىرىن ايشىقتايتىن جۇمىسىمەن تانىستى.
«ارداقتى انا, عازيز قارىنداس, ادال جاردى قاستەرلەۋ, سول ارقىلى وتباسىنىڭ بەرىك نەگىزى بولار وتاناسىن تاربيەلەۋ – حالقىمىزعا ءتان قاسيەت. تاۋەلسىز مەملەكەتىمىزدىڭ بەرىك بولۋى, جاسامپاز ۇرپاقتىڭ ءوسىپ-جەتىلۋى – شاڭىراقتىڭ شاتتىعىن ۇستايتىن ايەلدىڭ ارقاسى. بۇگىنگى ءىس-شارا ايەل-انالاردىڭ بەلسەندىلىگىن ارتتىرىپ, وتباسى قۇندىلىعىن دارىپتەي تۇسەدى دەپ سەنەمىن. ورتاق ماقساتىمىز – باقىتتى وتباسى, بەرەكەلى قوعام, ۇلاعاتتى ۇرپاق تاربيەلەۋ ءۇشىن ءبىر بولايىق!», دەدى اۋدان اكىمى مۇرات امانگەلدى ۇلى.
فورۋم قوناقتارى «اڭىز بولعان انالار» اتتى رۋحاني كورمەنى تاماشالاپ, ۇلتىمىزدىڭ تاريحىندا ۇلى ىستەرگە مۇرىندىق بولعان اتاقتى انالاردىڭ بەينەسىمەن جاقىن تانىستى. اۋداندىق ورتالىقتاندىرىلعان كىتاپحانالار جۇيەسى ۇيىمداستىرعان كورمەدە تۇمار پاتشايىم, قىز جىبەك, ابايدىڭ اجەسى زەرە, كۇي اناسى دينا, جۇبانداي جاسىن ۇلدى قازاققا سىيلاعان زەرىپ انا, باتىر قىزدار ءاليا, مانشۇك پەن حيۋاز, «قازاقتىڭ نارقىزى» اتانعان قالامقاس جايىندا حالىققا مول دەرەك بەرىلدى.
ساحنا تورىنە شىققان سپيكەرلەردىڭ ارقايسىسى ومىرلىك تاجىريبەسىمەن ءبولىسىپ, وتباسىنداعى تاربيە, انا مەيىرىمى مەن جاۋاپكەرشىلىگى, ونىڭ قوعامعا تيگىزەر ىقپالى جونىندە وي قوزعادى. جانسۇلۋ مەڭەشقىزى وتباسى قۇندىلىعىنىڭ ماڭىزىن اتاپ وتسە, گۇلجانار بولاتقىزى گەندەرلىك تەڭدىك, انا مارتەبەسى جانە ايەلدىڭ قوعامداعى ورنى جونىندە بايانداما جاسادى. انا مەن بالانى قولداۋ, وتباسى ينستيتۋتىن نىعايتۋ ءۇشىن مەملەكەت تاراپىنان جاسالىپ جاتقان باعدارلامالار جايىندا اقپارات بەرىلدى.
بازارشولان اۋىلىنان كەلگەن ەڭبەك ارداگەرى, كوپبالالى انا, اۋىلداعى انالار كەڭەسىنىڭ ءتورايىمى ورىنشا ەرمۇقانوۆا ءوز سوزىندە قىز بالا تاربيەسىنە, ۇلتتىق سالت-ءداستۇردى ساقتاۋ مەن ناسيحاتتاۋعا ەرەكشە توقتالدى. ال اباي اتىنداعى مەكتەپ-گيمنازيانىڭ وقۋ ءىسى جونىندەگى ورىنباسارى اسەل ەرمەنتاەۆا تاربيەنىڭ باستاۋى وتباسىندا ەكەنىن مىعىم ايتىپ, ءبىلىم وشاعىنداعى سونى باستامانىڭ ناتيجەسى جونىندەگى ويىن ورتاعا سالدى.
شارا سوڭىندا ۇلاعاتتى انالار مەن ونەگەلى وتباسىلار وبلىستىق قوعامدىق دامۋ باسقارماسىنىڭ العىس حاتىمەن ماراپاتتالدى. ولاردىڭ قاتارىندا بازارتوبە اۋىلىنان ءسالىموۆتار, جاڭابۇلاق اۋىلىنان سارسەنوۆتار, بۋداريننەن تىلەگەنوۆتار وتباسى بولدى.
