اباي وبلىسى – اۋىل شارۋاشىلىعى سالاسىندا الەۋەتى جوعارى وڭىرلەردىڭ ءبىرى. وبلىستىڭ اگروونەركاسىپتىك كەشەنى نەگىزىنەن وسىمدىك جانە مال شارۋاشىلىعىنا باعىتتالعان. وڭىردەگى ەگىستىك القاپتاردىڭ باسىم بولىگى ءداندى جانە مايلى داقىلدار. استىق داقىلدارى اراسىندا بيداي مەن ارپا نەگىزگى ورىن الادى. كەيىنگى جىلدارى مايلى داقىلدارعا, اسىرەسە كۇنباعىس پەن راپسقا دەگەن سۇرانىستىڭ ارتۋىنا بايلانىستى, ولاردىڭ ەگىس كولەمى دە ۇلعايىپ كەلەدى. بۇل داقىلداردان الىناتىن ونىمدەر ىشكى نارىقتى قامتاماسىز ەتىپ قانا قويماي, ەكسپورتقا دا شىعارىلادى.
وبلىستىق اۋىل شارۋاشىلىعى باسقارماسىنىڭ باسشىسى ەرتاي قۋانباەۆتىڭ مالىمەتىنشە, كوكتەمگى ەگىس جۇمىستارى بارلىق اۋدانداردا باستالعان. وعان 12 900 تەحنيكا جۇمىلدىرىلعان. بيىل وبلىستا 753,1 مىڭ گەكتار القاپقا اۋىل شارۋاشىلىعى داقىلدارى ەگىلمەك. بۇل وتكەن جىلمەن سالىستىرعاندا 3,6 مىڭ گەكتار ارتىق. ءوڭىردىڭ ەگىس القاپتارىنا 46,2 مىڭ توننا تۇقىم دايىندالعان. وبلىستىڭ اۋىل شارۋاشىلىعى تاۋارىن وندىرۋشىلەرىنە 27,5 مىڭ توننا ارزانداتىلعان ديزەل وتىنى ءبولىندى. بىراق ءۇرجار, بورودۋليحا, كوكپەكتى, بەسقاراعاي اۋداندارىندا مينەرالدى تىڭايتقىشتاردى ەنگىزۋ كورسەتكىشى تومەن. الايدا جاڭاسەمەي, ماقانشى جانە بورودۋليحا اۋداندارىنا «كەڭ دالا» باعدارلاماسى شەڭبەرىندە ديحاندارعا كوكتەمگى ەگىس پەن كۇزگى جيىن-تەرىنگە جەڭىلدىكپەن بەرىلەتىن نەسيە جۇمىسى قولعا الىندى.
ماسەلەن, جۋىردا اباي وبلىسىنىڭ اكىمى بەرىك ءۋالي جۇمىس ساپارىمەن بورودۋليحا اۋدانىنا بارىپ, وڭىردەگى ءىرى اگروقۇرىلىمداردىڭ ءبىرى – «لازارەۆ ي ك» جاۋاپكەرشىلىگى شەكتەۋلى سەرىكتەستىگىنىڭ كوكتەمگى دالا جۇمىستارى بارىسىمەن تانىستى. ايماق باسشىسى شارۋاشىلىقتىڭ ەگىس القابىن ارالاپ, اۋىل شارۋاشىلىعى وندىرىسىندەگى وزىق تەحنولوگيالار مەن جاڭا تاسىلدەردىڭ قولدانىلۋىنا نازار اۋداردى. قازىر سەرىكتەستىك وسىمدىك جانە مال شارۋاشىلىعىن قاتار دامىتىپ وتىر. جالپى يەلىگىندە 13 مىڭ گەكتاردان استام جەرى بار قۇرىلىمنىڭ 10 مىڭ گەكتارىنا جۋىق بولىگىنە بيىل ەگىن سالىنباق.
«شارۋاشىلىق مايلى داقىلداردى وڭدەۋگە باسىمدىق بەرىپ, كۇنباعىس مايىن قىتايعا ەكسپورتتاپ كەلەدى. بيىلعى كوكتەمگى ناۋقاندا 4 000 گەكتارعا كۇنباعىس, 6 00 گەكتارعا زىعىر جانە راپس ەگۋ جوسپارلانعان. اتالعان داقىلداردىڭ ساپاسىن ارتتىرۋ ءۇشىن درون ارقىلى سەبۋ ءتاسىلى العاش رەت سىناققا ەنگىزىلدى. شارۋاشىلىق كەلەر جىلى كوكتەمگى ىلعال تولىق كەتپەي تۇرىپ, ءدال وسى ادىسپەن راپس ەگۋگە نيەتتى. سونىمەن قاتار ۇساق ءداندى داقىلداردى سەبۋگە ارنالعان جاڭا تەحنيكا ساتىپ الىنعان», دەيدى سەرىكتەستىك ماماندارى.
ولاردىڭ ايتۋىنشا, سەرىكتەستىكتە مال شارۋاشىلىعى باعىتى دا قارقىندى دامىپ كەلەدى. وندا ءسۇت وڭدەۋ ماقساتىندا 420 ساۋىن سيىر العان. جالپى1 500-گە جۋىق ءىرى قارا مال بار. 100 ادام تۇراقتى جۇمىسپەن قامتىلعان. تۇقىمدىق وڭدەۋ مەن ورگانيكالىق تىڭايتقىش ەنگىزۋ جۇيەسى دە جولعا قويىلعان. قىتاي ماماندارىمەن بىرلەسىپ كۇنباعىس بۋدانىن الۋ جۇمىستارى جۇرگىزىلىپ جاتىر.
بيىل بورودۋليحا اۋدانىندا جالپى كولەمى 320 مىڭ گەكتارعا ءداندى جانە مايلى داقىل ەگۋ جوسپارلانعان. بۇل – ءوڭىردىڭ اگرارلىق الەۋەتىنىڭ جوعارى ەكەنىنىڭ ايقىن كورىنىسى.
اباي وبلىسى,
بورودۋليحا
