سۋرەت: bilimainasy.kz
جيىندى جۋرناليستيكا جانە الەۋمەتتىك عىلىمدار فاكۋلتەتىنىڭ دەكانى نۇرجان قۋانتاي ۇلى جۇرگىزىپ, پروفەسسور يشانوۆانىڭ عىلىمي-شىعارماشىلىق جولىنا ارنالعان ارنايى بەينەروليك كورسەتىلدى. ۋنيۆەرسيتەت اتريۋمىندا عالىمنىڭ عىلىمي ەڭبەكتەرى مەن باسپاسوزدەگى جاريالانىمدارىنان قۇرالعان كورمە كوپشىلىك نازارىنا ۇسىنىلدى.
مازمۇندى ءىس-شارا بارىسىندا مەملەكەتتىك كەڭەسشى ەرلان قاريننىڭ پروفەسسور ءاسيما قاليمقىزىنا ارنالعان قۇتتىقتاۋ حاتى وقىلدى. ەلدىك دەڭگەيدەگى جوعارى ماراپات پەن لەبىزدە عالىمنىڭ وتاندىق فيلولوگيا مەن جۋرناليستيكا سالاسىنا قوسقان سۇبەلى ۇلەسى ايرىقشا اتالدى. سونداي-اق ل.ن.گۋميلەۆ اتىنداعى ەۇۋ رەكتورى ە.سىدىقوۆتىڭ قۇتتىقتاۋ حاتىندا دا مەرەيتوي يەسىنىڭ وتاندىق عىلىم مەن جۋرناليستيكا ءبىلىمىنىڭ وركەندەۋىنە سىڭىرگەن ەڭبەگى ەرەكشە اتاپ ءوتىلدى.
عىلىمي جيىنعا اكادەميك باۋىرجان ومار ۇلى, پروفەسسور ساۋىتبەك ابدراحمانوۆ, سونداي-اق كورنەكتى فيلولوگتەر مەن باق وكىلدەرى ءسوز سويلەپ, جۇرەكجاردى لەبىزدەرىن ءبىلدىردى. بەلگىلى پۋبليتسيست, عالىم ساۋىتبەك
ابدراحمان ۇلى ءاسيما يشانوۆانىڭ ۇستازدىق جانە عىلىمي جولىنىڭ ەرەكشەلىكتەرىنە توقتالىپ, ۇستاز بولۋ مەن عالىم بولۋدىڭ ۇيلەسىمدى تۇستارىن ناقتى مىسالدارمەن سيپاتتادى. «عالىم – تەك زەرتتەۋ جۇرگىزىپ, ماقالا جازاتىن ادام ەمەس. عالىم – ۇرپاققا باعىت-باعدار بەرەتىن تۇلعا. ءاسيما قاليمقىزى – سول ۇدەدەن شىعىپ كەلە جاتقان ساناۋلى جاننىڭ ءبىرى. ادەبيەت پەن جۋرناليستيكانىڭ قيىلىسىنداعى ىرگەلى ىزدەنىستەرى بولاشاق زەرتتەۋشىلەرگە باعدارشام بولا الادى», دەدى ول.
ەۇۋ-ءدىڭ فيلولوگيا فاكۋلتەتىنىڭ دەكانى, اقىن, فيلولوگيا عىلىمدارىنىڭ كانديداتى سەرىكزات دۇيسەنعازى دا مەرەيتوي يەسىنىڭ ادامدىق كەلبەتى مەن ۇستازدىق پاراساتىنا ەرەكشە توقتالدى. «پروفەسسور ءاسيما يشانوۆا – اكادەميالىق ورتادا عانا ەمەس, شاكىرت جۇرەگىندە دە ورنى بولەك تۇلعا. ۇستاز بەن شاكىرت اراسىنداعى رۋحاني بايلانىستى ءاسيما قاليمقىزى ارقاشان جوعارى دەڭگەيدە ۇستاي ءبىلدى. ونىڭ ساباعىنان رۋحاني ءنار العان قانشاما تۇلەك بۇگىندە ەل قىزمەتىندە ءجۇر», دەدى فاكۋلتەت دەكانى.
سونىمەن قاتار ءسوز العان تۇلەكتەرى – Abai TV ديرەكتورى ەركىن مۇحامەدجانوۆ, «الماتى» تەلەارناسىنىڭ باس ديرەكتورى تيمۋر بازارباەۆ, پارلامەنت سەناتىنىڭ وكىلى ماريام كۇساينوۆا, مەديامەنەدجەر ماحاببات ەسەن جانە باسقا شاكىرتتەرى ۇستازدارىنا دەگەن زور العىستارىن ءبىلدىرىپ, ول كىسىنىڭ ادامگەرشىلىك قاسيەتى مەن پەداگوگيكالىق ادىستەرىنىڭ ومىرلىك جولداعى باعىت-باعدارى بولعانىن ايتتى.
عىلىمي باياندامالار لەگى پروفەسسوردىڭ شىعارماشىلىعىنا ارنالعان مازمۇندى ويلارمەن جالعاستى. اتاپ ايتقاندا, رەسەيدىڭ م.ۆ.لومونوسوۆ اتىنداعى ممۋ پروفەسسورى يرينا كارابۋلاتوۆا قازاق, قىتاي جانە ورىس فولكلورلارىنداعى «ايەل سۇلۋلىعى» ۇعىمىن كرەاتيۆتى يندۋستريا تۇرعىسىنان جان-جاقتى سارالادى.
كونفەرەنتسيا اياسىندا ءۇش باعىتتا سەكتسيالىق ماجىلىستەر ۇيىمداستىرىلىپ, وندا جاساندى ينتەللەكت, ارتمەديا, الەۋمەتتىك مەديا, كرەاتيۆتى ەكونوميكا مەن ءبىلىم جۇيەسىندەگى وزەكتى ماسەلەلەر قاراستىرىلدى.
ەرلان كيىكباي,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
