جادىرا احمەتوۆانىڭ ايتۋىنشا, الماتىدا رەپرودۋكتيۆتى دەنساۋلىقتى قورعاۋ – الەۋمەتتىك ساياساتتىڭ باسىم باعىتىنىڭ ءبىرى. 2025 جىلدىڭ ءبىرىنشى توقسانىنداعى مالىمەتتەر بۇل باعىتتا وڭ وزگەرىستەردىڭ بار ەكەنىن كورسەتىپ وتىر. وتباسىن جوسپارلاۋ, مەديتسينالىق تەكسەرۋ جانە جاستارمەن پروفيلاكتيكالىق جۇمىس جۇرگىزۋ سالالارىندا ايتارلىقتاي ىلگەرىلەۋ بايقالعان.
«رەپرودۋكتيۆتى دەنساۋلىقتى قورعاۋ – الماتىنىڭ الەۋمەتتىك ساياساتىنداعى ەڭ ماڭىزدى سالا. 2025 جىلعى ءبىرىنشى توقسانداعى مالىمەتكە قاراعاندا, وتباسىن جوسپارلاۋ, دارىگەرگە قارالۋ مەن جاستارمەن جۇمىس ىستەۋ ماسەلەسىندە ۇلكەن ىلگەرىلەۋ بارى بايقالدى», دەدى جادىرا احمەتوۆا.
ونىڭ ايتۋىنشا, 2025 جىلدىڭ 1 ساۋىرىندەگى جاعداي بويىنشا الماتى قالاسىنىڭ تۇرعىندار سانى 2 348 096 ادامعا جەتكەن. بۇل 2023 جىلدىڭ وسى مەرزىمىمەن سالىستىرعاندا 5,6%-عا, 2024 جىلمەن سالىستىرعاندا 2,5%-عا ءوسىم بار ەكەنىن كورسەتەدى. بالالار سانى 2,5%-عا, ال جاسوسپىرىمدەر قاتارى بىردەن 18%-عا ارتقان.
بالا تۋعا دايىندىق ماسەلەسىنە دە ەرەكشە نازار اۋدارىلىپ وتىر. جادىرا احمەتوۆا كەلتىرگەن دەرەككە سايكەس, بوسانۋعا دايىندىق كورسەتكىشى 2024 جىلى 19,1% بولسا, 2025 جىلى بۇل كورسەتكىش 50,8%-عا جەتكەن. ياعني, ايەلدەر اراسىندا پروفيلاكتيكالىق تەكسەرۋدەن ءوتۋ مەن مەديتسينالىق ساۋاتتىلىق دەڭگەيى ايتارلىقتاي ارتىپ كەلەدى.
«پرەگراۆيدارلىق دايىندىقپەن قامتۋدىڭ ارتۋى – انالار مەن بالالاردىڭ دەنساۋلىعىنا تونەتىن قاۋىپ-قاتەردى ازايتۋعا سەپتىگى تيەتىن ماڭىزدى قادام. بۇل جاڭا تاسىلدەردىڭ ساتىمەن ەنگىزىلىپ, مەديتسينالىق قىزمەت كورسەتۋدى ۇيىمداستىرۋدىڭ جاقسارعانىن, سونداي-اق ايەلدەردىڭ اقپاراتتانۋ دەڭگەيىنىڭ ارتقانىن دالەلدەيدى», دەدى ءبولىم باسشىسى.
سونىمەن قاتار, قالاداعى جاستار دەنساۋلىق ورتالىقتارىنىڭ (جدو) جۇمىسى جاندانىپ كەلەدى. بۇل ورتالىقتار جاسوسپىرىمدەر مەن جاستارعا مەديتسينالىق جانە پسيحوالەۋمەتتىك قولداۋ كورسەتەتىن مامانداندىرىلعان مەكەمەلەر. بۇگىندە الماتىدا 14 جدو جۇمىس ىستەيدى. 2025 جىلدىڭ ءبىرىنشى توقسانىندا بۇل ورتالىقتارعا 25 مىڭنان استام ادام جۇگىنگەن. بۇل كورسەتكىش 2024 جىلدىڭ سايكەس مەرزىمىمەن سالىستىرعاندا 66%-عا جوعارى.
كەلۋشىلەردىڭ باسىم كوپشىلىگى پسيحولوگقا (8627), تەراپەۆتكە (6063), گينەكولوگقا (5745) جانە ۋرولوگقا (2225) جۇگىنگەن. بۇل جاستار اراسىندا پسيحولوگيالىق جانە رەپرودۋكتيۆتى قولداۋ سۇرانىسىنىڭ جوعارى ەكەنىن كورسەتەدى.
قازىرگى ۋاقىتتا جدو-لاردا 98 مامان قىزمەت ەتەدى. ولاردىڭ 60%-ى رەپرودۋكتيۆتى جانە پسيحيكالىق دەنساۋلىق ماسەلەلەرى بويىنشا ارنايى سەرتيفيكاتتارعا يە. بۇل كورسەتكىش دەنساۋلىق ساقتاۋ مينيسترلىگى بەكىتكەن ستاندارتتارعا تولىق سايكەس كەلەدى.
«الماتىدا رەپرودۋكتيۆتى دەنساۋلىقتى قورعاۋعا باعىتتالعان باستامالار مەديتسينالىق كومەكتى عانا ەمەس, سونىمەن بىرگە ءبىلىم بەرۋ, اعارتۋ مەن پسيحوالەۋمەتتىك قولداۋدى دا قامتيدى. مۇنداي قادامدار حالىق دەنساۋلىعىن نىعايتۋعا, اتا-انا مادەنيەتىن قالىپتاستىرىپ, قالا تۇرعىندارىنىڭ ءومىر ساپاسىن ارتتىرۋعا ىقپال ەتەدى», – دەپ تۇيىندەدى جادىرا احمەتوۆا.
