ساۋىردە قازاقستان قور بيرجاسىنداعى (KASE) ۆاليۋتا ساۋداسىنىڭ كولەمى ارتىپ, كۇن سايىن ورتا ەسەپپەن 246 ملن دوللار ساتىلعان. ءبىر اي ىشىندە جالپى ساۋدا كولەمى 5,4 ملرد دوللارعا جەتتى. وسى ساۋدانىڭ ءبىر بولىگى – ۇلتتىق قوردان ساتىلعان ۆاليۋتا. ءساۋىر ايىندا باس بانك ۇلتتىق قور ەسەبىنەن 968 ملن دوللار ساتقان. بۇل اقشا رەسپۋبليكالىق بيۋدجەتتى قارجىلاندىرۋعا قاجەت بولعان. ياعني كۇن سايىن نارىققا ورتا ەسەپپەن 44 ملن دوللار شىعارىلعان.
– ۇلتتىق قور قاراجاتىمەن وپەراتسيالار جۇرگىزۋ كەزىندە, سونداي-اق «اينالاۋ» تەتىگىن ىسكە اسىرۋ كەزىندە ۇلتتىق بانك نارىقتىق بەيتاراپ قاعيداتىن ساقتايدى. بۇل شەتەل ۆاليۋتاسىن تۇراقتى جانە بىركەلكى ساتۋدى بىلدىرەدى. ۇلتتىق بانك ساۋىردە ۆاليۋتالىق ينتەرۆەنتسيا جۇرگىزگەن جوق. وتكەن ايدىڭ قورىتىندىسى بويىنشا, ۆاليۋتالىق ءتۇسىمنىڭ ءبىر بولىگىن مىندەتتى ساتۋ نورماسى اياسىندا كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋ كولەمى شامامەن 308 ملن دوللاردى قۇرادى. كۆازيمەملەكەتتىك سەكتور كومپانيالارى ۆاليۋتا نارىعىنداعى ساتۋ ۇدەرىسىن ەكىنشى دەڭگەيلى بانكتەر ارقىلى ءوز بەتىنشە جالعاستىرىپ كەلەدى, – دەلىنگەن باس بانك حابارلاماسىندا.
بۇل ءۇردىس مامىردا دا جالعاسادى. ۇكىمەتتىڭ الدىن الا بولجامىنا سايكەس, وسى ايدا ۇلتتىق قوردان 950-1050 ملن دوللار ارالىعىندا ۆاليۋتا ساتىلماق. بۇل دا بيۋدجەتتى قولداۋعا باعىتتالادى.
تاعى ءبىر ايتارلىق جايت – بجزق-نىڭ ۆاليۋتالىق اكتيۆتەرى. زەينەتاقى قورى ءوز اكتيۆتەرىنىڭ 40%-ىن ۆاليۋتادا ۇستاۋى كەرەك. وسى ماقساتتا ساۋىردە ۇلتتىق بانك بجزق ءۇشىن 250 ملن دوللار ساتىپ العان. بۇل – جالپى ساۋدانىڭ شامامەن 5%-ى. مامىردا دا وسى كولەمنەن اسپايتىن ۆاليۋتا ساتىپ الىنادى. بۇل – زەينەتاقى جيناقتارىنىڭ قۇنىن ساقتاپ قالۋ ءۇشىن قاجەت شەشىم.
ۇلتتىق بانك الداعى ۋاقىتتا ۆاليۋتا نارىعىنداعى جاعداي سالىق تولەۋ كەزەڭىنە, گەوساياسي وزگەرىسكە جانە الەمدىك نارىقتاعى جاعدايعا بايلانىستى قۇبىلىپ تۇراتىنىن ەسكەرتەدى. سوعان قاراماستان, بانك تەڭگە باعامىن جاساندى ۇستاۋعا تىرىسپايتىنىن, كەرىسىنشە تەپە-تەڭدىك پەن رەزەرۆ قاۋىپسىزدىگىن ساقتاۋ قاعيداتىنان اينىمايتىنىن ايتادى.
