فوتو: سۋ رەسۋرستارى جانە يرريگاتسيا مينيسترلىگى
ەرتىس وزەنىنىڭ جايىلمالى اۋماعىنداعى فلورا مەن فاۋنانىڭ تابيعي ونىمدىلىگىن ساقتاۋ ءۇشىن جىل سايىن سۋ جىبەرىلىپ تۇراتىنى ءمالىم. بۇگىندە وزەننىڭ ورتا اعىسىنداعى بالىقتاردىڭ ۋىلدىرىق شاشاتىن تابيعي ايماقتارى سۋ استىندا قالعان. سونداي-اق سۋ جىبەرۋ سول وزەننىڭ ارناسىن تازالاۋدى دا كوزدەيدى.
سالا مينيسترلىگىنىڭ مالىمەتىنشە, قازىرگى ۋاقىتتا پاۆلودار وبلىسىنداعى گيدروبەكەتتەردە سۋ دەڭگەيىنىڭ كوتەرىلگەنى جانە ەرتىس وزەنىنىڭ جايىلىمدى اۋماقتارىن سۋ باسقانى بايقالىپ وتىر. سونداي-اق, وبلىستىڭ شىدەرتى وزەنى جايىلىمىنا دا تابيعاتتى قورعاۋ ماقساتىندا سۋ جىبەرىلىپ جاتىر. بۇگىندە ك.ساتباەۆ اتىنداعى كانالدان 60 ملن تەكشە مەتردەن استام سۋ باعىتتالدى.
ەكىباستۇز قالاسى مەن اقتوعاي اۋدانىنىڭ اۋىلدىق اۋماعىنداعى فلورا مەن فاۋنانى ساقتاۋعا, سونداي-اق اۋليەكول كولدەر جۇيەسى, باسەنتين جانە شىعاناق كولدەرىن تولتىرۋعا جالپى كولەمى 120 ملن تەكشە مەتر سۋ باعىتتاۋ جوسپارلانىپ وتىر.
بۇگىندە ەكىباستۇز قالاسىنىڭ اۋىلدىق ايماعىنداعى 9 مىڭ گەكتاردان استام كولتاباندار سۋعا تولعان. جالپى العاندا 21 مىڭ گەكتاردان استام القاپقا سۋ جىبەرۋ جوسپارلانعان. ال, شىعاناق كولىنە 10 ملن تەكشە مەتر سۋ كەلگەن.
«تابيعاتتى قورعاۋ ماقساتىندا جىبەرىلەتىن سۋ تەك قورشاعان ورتانى جانە ءوڭىردىڭ تابيعي بايلىعىن ساقتاۋعا كومەكتەسىپ قانا قويمايدى. بۇل اۋىل شارۋاشىلىعىنىڭ, مال شارۋاشىلىعىنىڭ جانە جالپى پاۆلودار وبلىسى ەكونوميكاسىنىڭ دامۋىنا ىقپال ەتەدى. ال بۇل جەرگىلىكتى حالىقتىڭ تۇرمىسىنا وڭ اسەرىن تيگىزەدى», دەدى سالا ءمينيسترى نۇرجان نۇرجىگىتوۆ.
