جيناقتا كەڭەس وداعىنىڭ باتىرلارى باۋىرجان مومىش ۇلى, مالىك عابدۋللين, ءاليا مولداعۇلوۆا جانە مايدانگەر-جازۋشى ءازىلحان نۇرشايىقوۆپەن بىرگە ەسىمدەرى بەيمالىم 130 قازاق جاۋىنگەرىنىڭ مايداننان جازعان حاتتارى توپتاستىرىلعان. سونىمەن قاتار مەملەكەت باسشىسى قاسىم-جومارت توقاەۆتىڭ ءوز اكەسىنىڭ سوعىستان ورالماعان تۋعان اعاسى قاسىم تۋرالى ەستەلىگى بەرىلگەن.
مۇنداعى حاتتاردىڭ دەنى – ۇلتتىق عىلىم اكادەمياسىنىڭ سيرەك كىتاپتار مەن قولجازبالار قورىنان الىنعان. كىتاپتىڭ جالپى رەداكتسياسىن ۋنيۆەرسيتەت رەكتورى, اكادەميك ەرلان سىدىقوۆ باسقارعان. مازمۇندى ءىس-شارا بارىسىندا ول اتالعان جيناقتى وسى وقۋ ورنى عالىمدارى دايىنداعانىن ەرەكشە اتاپ ءوتتى.
«كىتاپقا مايداننان جازىلعان حاتتار جيناقتالدى. ونىڭ ىشىندە بۇرىن ەش جەردە جاريالانباعان حاتتار بار. ءبىز وسى جۇمىستى ودان ءارى جالعاستىرامىز. ويتكەنى ءالى كۇنگە دەيىن كوپتەگەن قازاق وتباسىندا جاقىندارىنىڭ سوعىستان جازعان حاتتارى ساقتالعان. شىندىعىندا, مىڭداعان حات ءالى جارىق كورمەي جاتىر. ءبىر جاعىنان, قاندى قىرعىننىڭ قاسىرەتىن ۇعىنۋعا مۇراعات دۇنيەلەرى ازدىق ەتەدى. سوعىس سۇمدىعىن سول وتتىڭ ورتاسىندا جۇرگەن جاۋىنگەرلەردىڭ ەلدەگى تۋعان-تۋىسقاندارىنا جازعان حاتتارى دا اشىپ بەرە الادى. وسىلاي ءبىز جاس ۇرپاققا سوعىستىڭ قاتىگەز بەينەسىن ءتۇسىندىرىپ, بەيبىتشىلىكتىڭ قۇنىن بىلە الامىز», دەدى ە.سىدىقوۆ.
جيناقتاعى حاتتار جاقسى سۇرىپتالعان. مۇندا قازاق جاۋىنگەرلەرىنىڭ مولدىرەتىپ جازعان كوڭىل سىرلارى مەن سول اۋىر كەزەڭدەگى كورىنىستەر شىنايى ايشىقتالعان.
تانىستىرىلىمدا ءسوز العان مەملەكەت جانە قوعام قايراتكەرى قۋانىش سۇلتانوۆ جاڭا جيناقتىڭ ءىشى تولعان تاعدىر مەن تاريح ەكەنىن جەتكىزدى.
«بۇل كىتاپتى جايباراقات وقي المايسىز. قازىرگى جاستارعا سوعىستىڭ زۇلماتى قانداي ەكەنىن ۇعىندىراتىن قۇندى ەڭبەك. مۇرا جيناۋ وڭاي ەمەس. مايداندا قۇربان بولعان اتالارىمىزدىڭ ەرلىگى ەشقاشان ۇمىتىلماسىن», دەدى ول.
سونداي-اق ءىس-شارادا مەملەكەت جانە قوعام قايراتكەرلەرى ساۋىتبەك ابدراحمانوۆ, دارحان مىڭباي, ءماجىلىس دەپۋتاتى قازىبەك يسا, مەملەكەتتىك ەلتاڭبا اۆتورى جانداربەك مالىبەك ۇلى, جازۋشى ءشاربانۋ بەيسەنوۆا ءسوز الىپ, باعالى ەڭبەكتىڭ قۇندىلىعى تۋرالى پاراساتتى وي قوزعادى.
