فوتو: parlam.kz
ماۋلەن اشىمباەۆ ءوز سوزىندە مەيماندى اتالعان ەلدەگى ماڭىزدى مەيرام – بىرىگۋ كۇنىنىڭ 50 جىلدىعىمەن قۇتتىقتاي كەلىپ, قازاقستان ۆەتناممەن ستراتەگيالىق ىنتىماقتاستىقتى نىعايتۋعا ايرىقشا ءمان بەرەتىنىن ايتتى.
«ۆەتنام سوتسياليستىك رەسپۋبليكاسى – قازاقستاننىڭ وڭتۇستىك-شىعىس ازياداعى ماڭىزدى جانە سەنىمدى سەرىكتەسى. ءسىزدىڭ قازاقستانعا ساپارىڭىز ەكىجاقتى قارىم-قاتىناستى دامىتۋدىڭ جاڭا كەزەڭىنە جول اشادى جانە ەلدەرىمىز اراسىنداعى دوستىق پەن سەرىكتەستىكتى ودان ءارى نىعايتۋعا ىقپال ەتەدى دەپ سەنەمىن. قازاقستان پارلامەنتىنىڭ سەناتى ءسىزدىڭ ساپارىڭىز بارىسىندا قول جەتكىزىلگەن بارلىق ۋاعدالاستىقتى ءتيىمدى ىسكە اسىرۋعا ىقپال ەتەدى», دەدى پالاتا توراعاسى.
سونىمەن قاتار سەنات سپيكەرى پارلامەنتارالىق دەڭگەيدە ءوزارا ءىس-قيمىلدى ودان ءارى دامىتۋدىڭ ماڭىزدى ەكەنىنە جانە زاڭ شىعارۋ سالاسىنداعى ىنتىماقتاستىق تەتىكتەرىنە نازار اۋداردى.
«پارلامەنتارالىق ديالوگ ەلدەرىمىز اراسىنداعى ىنتىماقتاستىقتى نىعايتۋ جولىندا ماڭىزدى ءرول اتقارادى. ءبىز قازاقستان پارلامەنتى مەن ۆەتنام ۇلتتىق جينالىسى اراسىندا قالىپتاسقان دوستىق بايلانىستاردى جوعارى باعالايمىز جانە ونى ءارى قاراي نىعايتۋعا مۇددەلىمىز. بۇل رەتتە قازىر جۇمىس ىستەپ تۇرعان پارلامەنتارالىق دوستىق توپتارىنىڭ قىزمەتى ەكىجاقتى ىنتىماقتاستىقتىڭ ماڭىزدى تەتىگى ەكەنى انىق», دەدى م.اشىمباەۆ.
كەزدەسۋ بارىسىندا تاراپتار ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى كەڭەيتۋگە قاتىستى ماسەلەلەر بويىنشا دا پىكىر الماستى. اتاپ ايتقاندا, اۋىل شارۋاشىلىعى, لوگيستيكا, اقپاراتتىق تەحنولوگيالار جانە باسقا دا باعىتتاردا ءوزارا ءىس-قيمىلدى جانداندىرۋ بارىسى ءسوز بولدى.
سونداي-اق ماۋلەن اشىمباەۆ الەمدىك جانە ءداستۇرلى دىندەر كوشباسشىلارى سەزىنە تۇراقتى قاتىسىپ, ونىڭ يدەيالارىن قولداپ كەلە جاتقانى ءۇشىن ۆەتنامنىڭ ءدىن وكىلدەرىنە العىس ءبىلدىردى.
ءوز كەزەگىندە تو لام قازاقستاندا جۇرگىزىلىپ جاتقان قوعامدىق-ساياسي وزگەرىستەرگە جوعارى باعا بەردى جانە رۋحاني ديپلوماتيانىڭ قازىرگى تاڭداعى رولىنە ەرەكشە نازار اۋدارىپ, بۇل باعىتتاعى ىنتىماقتاستىقتى نىعايتۋعا مۇددەلى ەكەنىن جەتكىزدى.
