ەلارالىق ۇتىمدى ارىپتەستىك

جيىندى پرەمەر-ءمينيستردىڭ ورىنباسارى ەرمەك كوشەرباەۆ اشىپ, ۇكىمەت اتىنان قاتىسۋشىلاردى قۇتتىقتاپ, قازاقستان مەن ۆەتنام اراسىنداعى ەكونوميكالىق بايلانىس­تاردى نىعايتۋدىڭ ماڭىزىنا توقتالدى.

«قازاقستاننىڭ ۆەتنام – وڭتۇستىك-شىعىس ازياداعى نەگىزگى سەرىكتەستەرىنىڭ ءبىرى. ەكىجاقتى ساۋدا-ەكونوميكالىق قاتىناستاردى كەڭەيتۋگە زور الەۋەت بار. وتكەن جىلى ەكى ەل اراسىنداعى تاۋار اينالىمى 860 ميلليون دوللارعا جەتتى», دەدى ۆيتسە-پرەمەر.

بۇگىندە قازاقستاندا ۆەتنامدىق كاپيتال­دىڭ قاتىسۋىمەن ءتۇرلى سالالاردا 13 كومپانيا جۇمىس ىستەيدى. بۇل ەلىمىزدىڭ قولايلى ينۆەستيتسيالىق احۋالىنا دەگەن سەنىمنىڭ جوعارى دەڭگەيىن ايعاقتايدى, تۇراقتى ءارى ءونىمدى ارىپتەستىكتىڭ قالىپتاسقانىن كورسەتەدى.

ىنتىماقتاستىقتىڭ بولاشاعى, ەڭ الدىمەن, اۆياتسيا سالاسىمەن بايلانىستى. فورۋم اياسىندا «Qazaq Air» مەن «VietJet» كومپانيالارى «VietJet Qazaqstan» اتتى بىرلەسكەن برەندتى ىسكە قوسۋ تۋرالى كەلىسىمگە قول قويدى.

«Sovico Group» پەن «VietJet Air» كومپانيا­لارى­نىڭ «Qazaq Air» قىزمەتىن باسقارۋعا ءارى ونى جاڭا «VietJet Qazaqstan» برەندىمەن دامىتۋعا نيەتتى ەكەنىن جوعارى باعالايمىز. اۋە جەلىسىنىڭ كەڭەيۋى كولىك قاتىناسىن ارتتىرىپ, وڭىردە ەكونوميكالىق ءوسىمنىڭ جاڭا نۇكتەلەرىن قالىپتاستىرادى»,  دەدى «سامۇرىق-قازىنا» اق باسقارما توراعاسى نۇرلان جاقىپوۆ.

ىنتىماقتاستىقتىڭ تاعى ءبىر ماڭىزدى باعى­تى – اۋىل شارۋاشىلىعى. قازاقستان ەگىس­تىك پەن جايىلىمدىق جەر كولەمى بويىن­شا الەمدە التىنشى ورىندا تۇر جانە بيداي مەن ۇن ەكسپورتىندا كوشباسشى ەلدەردىڭ قاتارىندا.

«الداعى ءۇش جىلدا اگروونەركاسىپ كەشەنىن­دە وڭدەلگەن ءونىم ۇلەسىن 70%-عا جەت­كىزۋدى كوزدەپ وتىرمىز. بۇل ماقساتتا 220 مىڭ توننا ەت وندىرەتىن 29 قۇس فابريكاسى مەن 850 ملن جۇ­مىرتقا وندىرەتىن 11 فابريكا ىسكە قوسىل­ماق. ۆەتنامدىق سەرىكتەستەردى بىرلەسكەن ءوندى­رىس قۇرۋعا جانە سۋ ۇنەمدەيتىن زاماناۋي تەح­نو­­لو­گيا­لاردى ەنگىزۋگە شاقىرامىز», دەدى ە.كوشەرباەۆ.

كەزدەسۋ بارىسىندا تسيفرلاندىرۋ مەن يننوۆاتسيالىق ىنتىماقتاستىققا دا ەرەكشە نازار اۋدارىلدى. قازاقستان ەلەكتروندىق ۇكىمەتتىڭ جاھاندىق يندەكسى بويىنشا 24-ورىندا, ال ونلاين قىزمەت ساپاسى جاعىنان الەمدەگى ۇزدىك ون ەلدىڭ قاتارىنا كىرەدى. ءوز كەزەگىندە IT سالاسىندا جەتەكشى ەلدەردىڭ ءبىرى سانالاتىن ۆەتنام مەملەكەتتىك قىزمەتتەردى تسيفرلاندىرۋ, جاساندى ينتەللەكتىنى ەنگىزۋ جانە تەحنولوگيا الماسۋ بويىنشا قازاقستان ءۇشىن ستراتەگيالىق سەرىكتەس بولا الادى.

جيىن جاڭا جوبالاردى باستاۋعا ارنالعان ماڭىزدى الاڭعا اينالدى. الداعى ۋاقىتتا ۇسىنىلعان باستامالار B2B فورماتىندا جانە ۆەدومستۆوارالىق دەڭگەيدە ەگجەي-تەگجەي تالقىلانىپ, ناقتى ناتيجەلەرگە باعىتتالماق. قازاقستان ۇكىمەتى جوبالاردى بارلىق كەزەڭدە جان-جاقتى قولداۋعا دايىن ەكەنىن ءبىلدىردى.