سۋرەتتى تۇسىرگەن – يگور بۋرگاندينوۆ
ەكىنشى دۇنيەجۇزىلىك سوعىس قاھارماندارىن ۇلىقتاۋعا ارنالعان بىرەگەي باستاما ۇلتتىق ارحيۆتە وتكەن كورمە بارىسىندا كوپشىلىككە تانىستىرىلدى. ءىس-شارا اياسىندا پورتالدىڭ ماقساتى مەن مىندەتى, ونىڭ قۇرىلىمدىق ەرەكشەلىكتەرى كەڭىنەن ءتۇسىندىرىلدى. سونداي-اق قاتىسۋشىلار نازارىنا سايتتا جيناقتالعان قۇجاتتار مەن مايدان دالاسىنان جازىلعان حاتتاردىڭ تۇپنۇسقاسى ۇسىنىلدى. اراسىندا سوعىس ارداگەرلەرى كاري ابيتوۆ, تاڭىربەرگەن قاليلاحانوۆ, حاميت ەرعاليەۆ, مالىك عابدۋللين جانە ەرمەكقالي سەرىكباەۆقا قاتىستى تىڭ مۇراعاتتىق ماتەريالدار دا بار.
– سايتتى ازىرلەۋ كەزىندە ونىڭ قولجەتىمدىلىگى مەن قولدانۋعا ىڭعايلىلىعىنا ەرەكشە ءمان بەردىك. كەيدە باسقا سايتتارعا كىرسەڭىز, الدىمەن تىركەلۋ كەرەك, سوسىن ءتۇرلى قوسىمشا سۇرانىستار, ءتىپتى نەسيە ۇسىنىستارى شىعىپ كەتەدى. ءبىز ونداي قيىندىقتاردى بولدىرماۋعا تىرىستىق – سايت قاراپايىم, تۇسىنىكتى ءارى تەز جۇمىس ىستەيدى. وندا ءاربىر پايدالانۋشى وزىنە قاجەت اقپاراتتى وڭاي تابا الادى جانە قاجەت بولسا, ونى تولىقتىرىپ, وزگەرىس ەنگىزە الادى. بۇل وزگەرىستەر تەكسەرىستەن وتكەن سوڭ جاريالانادى. پورتالدا ارداگەردىڭ اتى-ءجونى ارقىلى, پوشتا نەمەسە اسكەري كوميسسارياتتان, سونداي-اق شاقىرىلعان ۋاقىتىنا قاراي دا ىزدەۋگە بولادى. وتىنىشتەرگە ارنالعان Telegram بوتتى دا ىسكە قوستىق. مۇندا كۇن سايىن ورتا ەسەپپەن 100-150 انكەتا تۇسەدى. ونى قارايتىن ساراپتامالىق كوميسسيا بار. ولار كەلىپ تۇسكەن مالىمەتتەردى مۇقيات قاراپ, اقپاراتتىڭ دۇرىستىعىن تەكسەرەدى, گرامماتيكالىق قاتەلەردى تۇزەتەدى. سودان كەيىن عانا ول مالىمەتتەر سايتقا جاريالانادى. جالپى, بۇل جوبا – بارشا وتاندىق ارداگەرلەرگە كورسەتىلگەن قۇرمەت ءارى بولاشاق ۇرپاقتىڭ جادىندا تاريحي شىندىقتىڭ ماڭگى ساقتالۋىنا جاسالعان ماڭىزدى قادام, – دەيدى ۇلتتىق ارحيۆ ارحيۆتىك تەحنولوگيالار مەن تسيفرلاندىرۋ ءبولىمىنىڭ باسشىسى ايدار بۋلاشەۆ.
ۆەب-پورتال – مادەنيەت جانە اقپارات مينيسترلىگىنىڭ جوباسى. سايتتا ارداگەرلەرگە جانە جوباعا قاتىستى جاڭالىقتار مەن وقيعالار تۇراقتى تۇردە جاريالانىپ تۇرادى. قازىردىڭ وزىندە مۇندا 678 مىڭنان اسا سوعىس ارداگەرى, ونىڭ ىشىندە 365 كەڭەس وداعىنىڭ باتىرى, 4 ەكى مارتە كەڭەس وداعىنىڭ باتىرى جانە 19 «داڭق» وردەنىنىڭ تولىق كاۆالەرى جانە باسقا دا ەرجۇرەك جاۋىنگەرلەر تۋرالى كەڭ كولەمدى اقپارات جيناقتالعان.
قۇجاتتىق كورمەگە سوعىس ارداگەرلەرىنىڭ ۇل-قىزدارى, بەلگىلى قوعام جانە مەملەكەت قايراتكەرلەرى, زيالى قاۋىم وكىلدەرى, ستۋدەنتتەر مەن وقۋشىلار قاتىستى. ءىس-شارانىڭ باستى ماقساتى – تاريحي داتا قارساڭىندا ەل تاعدىرىن ءوز تاعدىرىنان بيىك قويا بىلگەن, ەل تۇعىرىن بيىك ەتۋ جولىندا ەرلىكپەن قازا تاپقان باتىر بابالارىمىزدىڭ قاھارماندىقتارىنا تاعزىم ەتۋ ءارى ولاردىڭ ەسىمىن تاعى ءبىر مارتە جاڭعىرتۋ.
– ۇلتتىق ارحيۆ قورىنا اكەمنىڭ قۇجاتتارىن تاپسىردىم. مۇرالاردىڭ اراسىندا اكەمنىڭ ءومىر مەن ءولىم اراسىنداعى جۇرگەن داپتەرى بار. مۇنى بالا كەزىمىزدە كورگەنىمىز ەسىمدە. لاتىنشا جازىلعاندىقتان وقي المادىق. ەرتەڭگى ۇرپاققا مۇرا بولسىن دەگەن نيەتتە, اكەم قايتىس بولعان سوڭ جازبالارىن وقىتىپ, كىتاپ رەتىندە شىعارعانبىز. جالپى, ءار جاڭا بۋىن ءوز ساناسىندا, جۇرەگىندە باتىرلاردىڭ ەسىمىن ۇمىتپاي, قادىرلەي بىلۋگە ءتيىس. بۇل – ءبىزدىڭ بۇگىنگى بەيبىت كۇنىمىزگە جول اشقان, تاۋەلسىز ەلىمىزدىڭ ىرگەسىن قالاعان ەرلەردىڭ الدىندا بورىشىمىز. ولاردىڭ ەرلىگى مەن جانقيارلىعى ماڭگى ۇمىتىلماۋى ءۇشىن ءبىز ونى ناسيحاتتاپ, كەلەر ۇرپاققا جەتكىزۋگە مىندەتتىمىز, – دەيدى سوعىس ارداگەرى انۋاربەك سۇيىندىكوۆتىڭ بالاسى قانات سۇيىندىكوۆ.
