ەكىباستۇزدا تەمىرجول كلاستەرى قالىپتاسىپ كەلەدى

ەكى زاۋىت سالىنادى

كومپانياعا قاراستى بىرنەشە زاۋىت بار. ولار تەمىرجول ۆاگونىنىڭ دوڭگەلەك جۇپتارى مەن بىلىكتەرىن, باعىتتامالىق بۇرما, ايقاستىرعىش, جوندەۋ جيىنتىعىن, رەلستى بەكىتكىش پەن باسقا كوپتەگەن بۇيىم وندىرەدى.

جاقىن جىلدارى حولدينگ ەكى بىردەي مەتاللۋرگيالىق زاۋىت سالماق. العاشقىسى – باعىتتاما بۇرماسى, پلاتفورما مەن اشىق ۆاگوندار ءۇشىن كومىرتەكتى جانە جوعارى مارگانەتستى بولات قۇيمالارىن شىعاراتىن قۇيۋ تسەحىنىڭ قۇرىلىسى. جىلىنا 20 مىڭ توننا قۇيما شىعاراتىن ءوندىرىس ورنى كەلەر جىلدىڭ قىركۇيەك ايىندا اشىلۋعا ءتيىس.

ەكىنشى اۋقىمدى جوبا – قۇرىلىسى 3 جىلعا سوزىلاتىن ەلەكترمەتاللۋرگيالىق زاۋىت. جىلىنا 1 ملن توننا بولات قۇيما ازىرلەيتىن بولاشاق زاۋىتتىڭ كاپسۋلاسىن سالۋ راسىمىنە ونەركاسىپ جانە قۇرىلىس ءمينيسترى ەرسايىن ناعاسپاەۆ, پاۆلودار وبلىسىنىڭ اكىمى اسايىن بايحانوۆ, «RWS KZ» كومپانياسىنىڭ باسقارما توراعاسى سەرگەي پاۆلينگەر قاتىستى. ءمينيستردىڭ سوزىنشە, ينۆەستيتسيا كولەمى شامامەن 500 ملرد تەڭگەنى قۇرايتىن جوبانى ىسكە قوسۋ ناتيجەسىندە بولات ءوندىرىسى جولعا قويىلىپ, مىڭداعان جۇمىس ورنى اشىلادى.

يمپورتقا تاۋەلدىلىك تومەندەيدى

«وتاندىق تەمىرجول سالاسى ءۇشىن قاجەتتى بولشەك پەن بۇيىم­داردى بۇعان دەيىن شەتەلدەن ساتىپ الىپ كەلدىك. «RWS KZ» حولدينگىنىڭ جاڭا ونىمدەرى يمپورتقا تاۋەلدىلىكتەن قۇتقا­رىپ, جەرگىلىكتى نارىقتى ساپالى بۇيىمدارمەن قامتاماسىز ەتپەك. زاۋىتتار مۇنىمەن توقتاپ قالماۋى كەرەك, وندىرىستىك تەحنولوگيالاردى ودان ءارى ارتتىرىپ, سالانى دامىتۋدى جالعاستىرا بەرۋى كەرەك. ۇكىمەت تاراپىنان مۇنداي پايدالى ءارى ءتيىمدى جوبالارعا قولداۋ ۇنەمى بولادى», دەدى مينيستر.

ەلەكترمەتاللۋرگيالىق زاۋىت حولدينگتىڭ بارلىق كاسىپورىنىن مەتالل ونىمدەرىمەن قامتاماسىز ەتە الادى جانە وتاندىق تۇتاس تاپتامالى دوڭگەلەكتەر مەن تەمىرجول رەلستەرىن وندىرۋ­شىلەردىڭ قاجەتتىلىگىن قاناعات­تان­دىرادى. بۇدان بولەك, جو­عارى تەحنولوگيالىق مەتال­لۋرگيالىق ءونىمنىڭ 40%-ى تمد جانە ەۋرووداق ەلدەرىنە ەكس­پورت­تالماق. كاسىپورىندا قازىرگى زامانعى تەحنولوگيالار پايدالانىلادى. ناتيجەسىندە, كومپانيا بالقىتۋ, تازارتۋ جانە قوسپالاۋ ۇدەرىسىن الەمدىك كور­سەت­كىشتەرمەن سالىستىرعاندا 20%-عا دەيىن, ال ەلىمىزدەگى وزگە وندىرىستەرمەن سالىستىرعاندا 50%-عا دەيىن جەدەلدەتۋدى جوسپارلاپ وتىر. ءارى ەنەرگيا رەسۋرستارىن تۇتىنۋدى كەم دەگەندە 50%-عا تومەندەتە الادى. قوسىمشا يلەمدەۋ جىلدامدىعىن 30%-عا دەيىن ارتتىرۋ ءۇشىن يلەمدەۋ وندىرىسىندە يننوۆاتسيالاردى, سونداي-اق ارالاس ءوندىرىستى ەنگىزۋ ويلاستىرىلعان.

بۇل كۇنى ۇستالىق-بانداجداۋ كەشەنىنىڭ العاشقى كەزەگى دە ىسكە قوسىلدى. ۇستالىق-بانداجداۋ كەشەنى – وتاندىق تەمىرجول سالاسىن لوكوموتيۆتەرگە ارنال­عان بانداج, ءتىستى دوڭگەلەك ازىرلە­مەسى, لوكوموتيۆ جانە ۆاگون بىلىكتەرى, يلەمدەلگەن دوڭگەلەك شەنتەمىرلەرىمەن تولىقتاي قامتاماسىز ەتۋگە مۇمكىندىك بەرەتىن ءوندىرىس. جيىنتىق قۋاتى – جىلىنا 160 900 بىرلىك ءونىم. ءونىم حالىقارالىق ستاندارتتارعا سايكەس كەلەدى جانە يمپورتقا تاۋەلدىلىكتى تومەندەتەدى. ءونىمنىڭ 70%-دان استامى شەتەلدىك تاپسىرىس بەرۋشىلەرگە باعدارلانباق. بۇل ەلىمىز ءۇشىن حالىقارالىق ارەنادا ەكسپورتتاۋشى پوزيتسياسىن نىعايتۋعا جاعداي جاسايدى.

قالدىق ازايىپ, مۇمكىندىك كوبەيەدى

«مەملەكەت باسشىسى ەكىباس­تۇز­دا بولعاندا تولىق تسيكلدى تەحنولوگيامەن جابدىق­تال­عان, ساپالى ءونىم شىعاراتىن تىك ينتەگراتسيالىق كاسىپورىندار قۇرۋ تۋرالى تاپسىرما بەردى. جاڭا كاسىپورىننىڭ ىسكە قوسىلۋىن پرەزيدەنتتىڭ تاپسىر­ماسىن ورىنداۋداعى ماڭىز­دى قادام دەپ بىلەمىز. بۇل ونەر­كاسىپتىك, ەكونوميكالىق جانە تەمىرجول قاۋىپسىزدىگىن قامتا­ماسىز ەتۋگە ىقپال ەتەدى. ءبىز حول­دينگ پەن تەمىرجول يندۋس­ترياسىن ءوز شيكىزاتىمىزبەن قامتيمىز. ەلىمىزدەگى قولايلى ينۆەستيتسيالىق احۋال وتانىمىزدى دامىتۋعا جانە يندۋس­تريالاندىرۋعا ۇلەس قوسۋىمىزعا مۇمكىندىك بەرىپ جاتىر», دەيدى سەرگەي پاۆلينگەر.

كاسىپورىن 4:0 يندۋسترياسى ستاندارتتارى بويىنشا جابدىق­تالعان. وندىرىستىك ۇدەرىستە روبوت­تان­دىرىلعان اۆتوماتتى جەلى جۇمىس ىستەيدى. جابدىقتىڭ قازىرگى زامانعى مودەلدەرى تسيفر­لىق باعدارلامالىق باسقارۋ جۇيە­لە­رىمەن جاراقتاندىرىلعان. اۋستريا, گەرمانيا, چەحيادان اكە­لىنگەن جابدىقتار جوعارى دال­دىكتى قامتاماسىز ەتىپ, قالدىق­تاردى بارىنشا ازايتادى. مۇنىڭ ءبارى سا­يىپ كەلگەندە ءوندىرىس شى­عىن­دارىن ازايتۋعا مۇمكىندىك بەرمەكشى.

«RWS KZ» كومپانياسى – ەكىباستۇزدا ەرەكشە دامىپ كەلە جاتقان, ەكسپورتقا باعىت العان ءىرى كلاستەر. ءبىر عانا ۇس­تا­لىق-بانداجداۋ تسەحى جوباسىنا 125 ملرد تەڭگە قارجى قۇيىلىپ, 600-دەن استام جۇمىس ورنى قۇرىلدى. مۇنداعى ەڭبەك­كەرلەر جوعارى جالاقىمەن قامتىلعان. وندىرىستەن شىعا­تىن بۇيىمداردىڭ كەمى 85%-ى ەكسپورتقا جونەلتىلەدى. الداعى 3 جىلدا بۇل كەشەنگە 500 ملرد تەڭگەگە جۋىق ينۆەستيتسيا جۇمسالىپ, وسى ءوندىرىستىڭ ءوزى-اق ەكىباستۇزدى ەكونوميكاسى جان-جاقتى دامىعان قالا رەتىندە كورسەتە الادى دەگەن سەنىم­دەمىز. جوبا ناتيجەسىندە ءوڭىر بيۋدجەتىنە تۇسەتىن سالىق 9 ملرد تەڭگەگە ۇلعايادى. ول قار­جىنى ەكىباستۇزداعى ينجەنەر­لىك جەلىلەردى جاقسارتۋعا جانە شاھاردى كورىكتەندىرۋگە باعىت­تاي­مىز», دەدى ءوڭىر باسشىسى اسايىن بايحانوۆ.

حولدينگ سوڭعى 10 جىلدا ءوز قارجىسى ەسەبىنەن ەكىباستۇز ەكونوميكاسىنا 700 ملرد تەڭگە ينۆەستيتسيا قۇيعان. كاسىپورىن تسەحتارىندا بۇگىندە 3 مىڭداي ادام ەڭبەك ەتسە, قۇرىلىسى باستالعان جوبالار تولىق قۋاتىنا ەنگەندە قوسىمشا 2 مىڭ ادام «ەكى قولعا ءبىر كۇرەك» تابادى. كومپانيا جىلىنا 300 مىڭ تاپتامالى تەمىرجول دوڭگەلەگىن, 20 مىڭ دوڭگەلەك جۇبى مەن 42 مىڭ بىلىك, 1 ملن دانا رەلستى بەكىتكىشتەر ءوندىرىپ وتىر.

پاۆلودار وبلىسى,

ەكىباستۇز قالاسى