جاڭا تەحنولوگيالاردى ساتىمەن قولدانىسقا ەنگىزۋدە قكو ينتەرۆەنتسيالىق اريتمولوگتەر توبىنىڭ جەتەكشى ەۋروپالىق ەمحانالاردا تاجىريبە بايىتىپ, وقۋ باعدارلاماسىنان ءوتۋى ايتارلىقتاي ءرول اتقاردى. ويتكەنى ماماندارىمىزدىڭ العان بىلىمدەرى مەن تاجىريبەلەرى كۇندەلىكتى جۇمىسىنا فيزيولوگيالىق ىنتالاندىرۋ ادىستەرىن سەنىمدى تۇردە ەنگىزۋىنە جول اشىپ وتىر. سونىڭ ارقاسىندا قازىرگى وتاندىق كارديولوگيالىق ورتالىق شەتەلدىك پروكتورلاردى تارتپاي-اق, شەبەرلىك دارىستەرى مەن ترەنينگتەرىن ءوز بەتىنشە وتكىزىپ ءجۇر. بۇل وتاندىق اريتمولوگتەر كاسىبيلىگىنىڭ جوعارى دەڭگەيىن, وتاندىق كارديولوگيالىق مەكتەپتىڭ قالىپتاسىپ كەلە جاتقانىن ايعاقتايدى. قازىردە ءبىلىم بەرۋ ءىسى قكو ينتەرۆەنتسيالىق اريتمولوگيا ءبولىمىنىڭ مەڭگەرۋشىسى ارتۋر ءابدىمومىنوۆتىڭ جەتەكشىلىگىمەن «BIOTRONIK», «MEDCO» سياقتى كومپانيالاردىڭ قولداۋىمەن ءجۇرىپ جاتىر.
شەبەرلىك دارىستەرى اياسىندا جۇرەك قۇرىلعىلارىن يمپلانتتاۋدىڭ زاماناۋي ادىستەرىن قولدانا وتىرىپ, ەكى دەمونستراتسيالىق كورنەكى وپەراتسيالار جاسالدى. ونىڭ ءبىرى اۋىر سوزىلمالى جۇرەك جەتكىلىكسىزدىگى مەن جۇرەكشە تۇراقتى فيبريللياتسياسى بار 62 جاستاعى ناۋقاسقا سالىنعان كارديوۆەرتەر-دەفيبريللياتور بولسا, ەكىنشى جاعدايدا سينۋس ءتۇيىنىنىڭ السىزدىك سيندرومى مەن وتپەلى اتريوۆەنتريكۋليارلىق بلوكاداسى بار 59 جاستاعى ناۋقاسقا ەكى كامەرالى ەلەكتركارديوستيمۋلياتور (ەكس) يمپلانتتالدى.
ەكى وپەراتسيا دا «سonduction System Pacing» (CSP) تەحنولوگياسى ارقىلى جۇزەگە اسىرىلدى. بۇل – ەلەكترودتار تىكەلەي جۇرەكتىڭ وتكىزگىش جۇيەسىنىڭ قۇرىلىمدارىنا (گيس شوعىرى نەمەسە شوعىردىڭ سول اياقشاسى) ورناتىلاتىن يننوۆاتسيالىق ءتاسىل. CSP-نىڭ ءداستۇرلى وڭ قارىنشا كارديوستيمۋلياتسياسىنان ايىرماشىلىعى, قارىنشالاردىڭ سينحروندى, فيزيولوگيالىق بەلسەندىرىلۋىن قامتاماسىز ەتەدى, مۇمكىندىگىنشە تابيعيعا جاقىن.
مامانداردىڭ ايتۋىنشا, فيزيولوگيالىق ىنتالاندىرۋ ميوكاردتىڭ جيىرىلۋ قىزمەتىن جاقسارتۋعا, جۇرەك جەتكىلىكسىزدىگى بەلگىلەرىن ازايتۋعا, اۋرۋحانا توسەگىنە تاڭىلاتىن كۇندەردى كەمىتىپ, پاتسيەنتتەردىڭ دەنساۋلىعىن دۇرىستاۋعا مۇمكىندىك بەرەدى. ءتىپتى كەيبىر جاعدايلاردا ول كلاسسيكالىق كارديورەسينحروندى تەراپيانىڭ (CRT) ورنىن تولىق الماستىرا الادى.
وسىلايشا, ءاربىر وڭىردەن كەلگەن دارىگەرلەر اراسىنداعى وتكەن شەبەرلىك دارىستەرى ەلىمىزدە وزىق تاجىريبەنى تاراتۋ مەن اريتمولوگيالىق قىزمەتتى دامىتۋدا ماڭىزدى قادامعا اينالىپ وتىر. قالالىق كارديوورتالىق بازاسىندا وسى كۇنگە دەيىن 100-دەن استام وپەراتسيا جاسالدى. شەتەلدەردە تاجىريبەدەن وتكەن دارىگەرلەرىمىز ەندىگى كەزەكتە بىلىمدەرى مەن ماشىقتارىن ايماقتارداعى ماماندارعا دا ەركىن دارىتا باستادى.
الماتى
