بۇل بايقاۋ – س.بەگاليننىڭ باي شىعارماشىلىق مۇراسىن جاستار اراسىندا كەڭىنەن ناسيحاتتاپ, بالالار ادەبيەتىنىڭ بولاشاعىنا ەرەكشە ءمان بەرۋدىڭ جارقىن كورىنىسى. قازاقستان جازۋشىلار وداعى, «وركەن» بالالار ادەبيەتىن دامىتۋعا جاردەمدەسۋ قوعامدىق قورى جانە الماتى قالاسى كىتاپحانالار جەلىسىنىڭ ۇيىمداستىرۋىمەن جۇزەگە اسىپ وتىرعان باستاما – ەلىمىزدەگى جاس قالامگەرلەردىڭ شىعارماشىلىق الەۋەتىن كوتەرۋگە باعىتتالعان ەلەۋلى قادام.
بايقاۋ ەكى تىلدە – قازاق جانە ورىس تىلدەرىندە قاتار جاريالانعان بولاتىن. 9-11 سىنىپ وقۋشىلارى س.بەگاليننىڭ «الدانعان جولبارىس» جانە «جاس بۇتاق» دەگەن ەكى اڭگىمەسى بويىنشا ەسسە جازدى. بارلىق قاتىسۋشىلار ءۇشىن بايقاۋ تالابى بىلاي باستالادى: كىتاپحاناعا كەلگەن وقىرماننىڭ قولىنا بەگاليننىڭ اڭگىمەلەرى جيناقتالعان كىتاپ تۇسەدى, ول كىتاپتى باس كوتەرمەي وقي باستايدى, ءدال وسى مەزگىلدە اۋا رايى كۇرت بۇزىلىپ, نوسەر جاڭبىر قۇيىپ, نايزاعاي جارقىلداپ, جارىق سونەدى. كەنەت, مىنە, عاجاپ, قولىنا تەلەفون ۇستاپ, جي ءونىمىن تۇتىنىپ جۇرگەن بۇگىنگى ءجاسوسپىرىم بالا وتكەن عاسىردىڭ 20-60 جىلدارىنا, ساپارعالي بەگاليننىڭ اڭگىمەلەرىندە سۋرەتتەلەتىن ءومىر مەن وقيعالارعا تاپ بولادى. ۋاقىت شەڭبەرىنەن شىعىپ كەتكەن قيال-عاجايىپ ساياحات ساپارىندا ءجاسوسپىرىم وقۋشى شىعارما كەيىپكەرلەرىمەن تانىسىپ, ولارعا شىققان تەگىن, نەمەن شۇعىلدانىپ, نەنى قۇندىلىق سانايتىنىن, بۇل ورتاعا قالاي تاپ بولعانى تۋرالى ايتىپ, كومەككە مۇقتاجدىعىن بىلدىرەدى. ءوز وقيعاسىن وزىنشە ءورىپ, وربىتۋگە ءتيىس قاتىسۋشىلارعا ينتەرنەت كومەگىنە جۇگىنۋگە تىيىم سالىندى, كەرىسىنشە, شەكتەۋسىز قيال الەمىنە ەركىن بويلاپ, ۋاقىت جىگىن اتتاپ وتكەن تارازى پايىم شىنايى شيراتىلعانى قۇپتالدى.
«وركەن» بالالار ادەبيەتىن دامىتۋعا جاردەمدەسۋ قوعامدىق بىرلەستىگى الداعى ۋاقىتتا ايماق شەڭبەرىنەن شىعىپ, «قازاقستاننىڭ جاس جازۋشىسى» رەسپۋبليكالىق بايقاۋىن ۇيىمداستىرۋدى جوسپارلاپ وتىر. ال الماتى قالاسىنىڭ جاس وقىرماندارىنىڭ قاتارىن تولىقتىرا بەرۋ ءۇشىن «وركەن» مەن قالالىق ورتالىقتاندىرىلعان كىتاپحانالار جۇيەسى ءتۇرلى تاپسىرمالاردىڭ كومەگىمەن بالالاردىڭ ىنتاسىن وياتا بەرۋگە نيەتتى.
– مىسالى, بارلىق وتباسى بالاسىنا «PlayStation» ويىنىن ساتىپ الىپ بەرە المايدى, سوندىقتان الماتى كىتاپحانالارىنىڭ بىرىندە ءبىز ونى تەگىن ويناي الاتىن مۇمكىندىكپەن قامتاماسىز ەتتىك,– دەيدى ءمادي نۇسىپباەۆ. – بىراق ونىڭ دا شارتى بار: «PlayStation» ويناعىسى كەلەتىن بالا كىتاپحاناشى ۇسىنعان كىتاپتى وقىپ, سۇراقتارىنا جاۋاپ بەرسە, كىتاپحانا ابونەنتىن الا الادى. كىتاپحانالار قاشان دا ءتۇرلى تاقىرىپتار توڭىرەگىندە مازمۇندى كەزدەسۋلەر وتكىزىپ, قىزىقتى باستامالاردىڭ ۇيىتقىسى بولىپ جۇرەدى, بىراق بالالارمەن جۇمىستى العا جىلجىتاتىن «سيقىرلى» كىلتىن تابا الماي, وقۋعا قۇشتارلىعىن وياتا الماي, دارمەنسىزدىك تانىتاتىنىن جاسىرا المايمىز. سوندىقتان بالالارعا بايقاتپاي, ولار دا ءبىزدى بايقاماي, كىتاپحاناعا جيىرەك كەلەتىندەي امال-تاسىلدەردى بىرلەسىپ ىزدەي بەرۋىمىز كەرەك. بالالاردىڭ بولاشاعىنا بەيجاي قاراي المايتىن, ولاردىڭ ءوزىن شىنىمەن دە وقيتىن ەلدە تۇراتىنىن سەزىنۋگە مۇمكىندىك تۋدىرعىسى كەلەتىن بارلىق كاسىپكەرلەر مەن قوعامدىق بەلسەندىلەردى ءبىزدىڭ جوبامىزعا قوسىلۋعا شاقىرامىز, – دەيدى «وركەن» بالالار ادەبيەتىن دامىتۋعا جاردەمدەسۋ قوعامدىق بىرلەستىگىنىڭ قۇرىلتايشىسى ءمادي نۇسىپباەۆ.
ادەبي بايقاۋ جەڭىمپازدارىنا كىتاپ دۇكەندەرىنىڭ سەرتيفيكاتتارى, كىتاپتار, ال 1-ورىن العان ەكى وقۋشىعا پلانشەتتەر تابىستالدى. قازاق تىلىندەگى شىعارمالاردىڭ اراسىندا س.بەگاليننىڭ «الدانعان جولبارىس» اڭگىمەسى نەگىزىندە ءوز ەسسەسىن جازعان اباي اتىنداعى دارىندى بالالار مەكتەپ-ينتەرناتىنىڭ وقۋشىسى شىرايلىم ايبەكقىزى, ال ورىس تىلىندەگى بايقاۋدا «ساپارعالي بەگاليننىڭ سيقىرلى الەمىنە ساياحات» دەگەن ەسسەسىمەن №52 ورتا مەكتەپتىڭ وقۋشىسى رەنات بەكقۇلوۆ جەڭىمپاز بولىپ تانىلدى. رەناتتىڭ شىعارماسىن قازاقستان جازۋشىلار وداعىنىڭ حاتشىسى فارحات تامەنداروۆ ءوزى باس رەداكتورى بولىپ وتىرعان «پروستور» جۋرنالىندا جاريالاۋعا ۋادە ەتتى. وقۋشىنىڭ ءوزى بۇل بايقاۋدىڭ بولاشاق ماماندىق تاڭداۋىنا اسەرى بولعانىن جاسىرمادى.
بۇل بايقاۋ ادەبيەت كوكجيەگىندە جاڭا ەسىمدەردىڭ تانىلىپ, قازاق ءسوز ونەرىنىڭ كەلەشەك كەڭىستىگىنە تىڭ سەرپىن بەرەرى ءسوزسىز.
