فوتو: وقۋ-اعارتۋ مينيسترلىگى
مينيسترلىكتىڭ مالىمدەۋىنشە وڭىرلەردە 267 مىڭ وقۋشىعا ارنالعان 232 جاڭا مەكتەپتىڭ قۇرىلىسى ءجۇرىپ جاتىر. شىعىس قازاقستان جانە الماتى وبلىستارىندا جاڭا فورماتتاعى ءۇش مەكتەپ اشىلعان.
مەملەكەت باسشىسىنىڭ تاپسىرماسىن ورىنداۋ ماقساتىندا 23 مەكتەپتە عيمارات قاسبەتتەرىن جاڭارتۋ, شاتىرلار مەن تەرەزەلەردى اۋىستىرۋ, سۋ جانە ەلەكتر جۇيەلەرىن جاڭعىرتۋ, سونداي-اق مەكتەپ اۋماعىن اباتتاندىرۋ جۇمىستارى جاسالىپ جاتىر. جالپى, 2027 جىلدىڭ سوڭىنا دەيىن ۇلتتىق رەنوۆاتسيا باعدارلاماسى اياسىندا 1 231 مەكتەپ جاڭارتىلادى دەپ جوسپارلانعان.
ەرەكشە بالالاردىڭ تولىققاندى ءبىلىم الۋىن قامتاماسىز ەتۋ نەگىزىندە ينكليۋزيۆتى جانە ارنايى ءبىلىم بەرۋ سالاسىندا دا ءۇش جاڭا مەكەمە پايدالانۋعا بەرىلدى. سونىڭ ىشىندە ۇلىتاۋ وبلىسىندا اۋتيزم ورتالىعى ىسكە قوسىلۋىنا وراي ارنايى مەكەمەلەر سانى 496-دان 504-كە جەتتى. سونىمەن قاتار, جالپى ءبىلىم بەرەتىن مەكتەپتەر جانىنان ەرەكشە ءبىلىم بەرۋ قاجەتتىلىكتەرى بار بالالارعا ارنالعان 121 قولداۋ كابينەتى اشىلدى. قازىرگى تاڭدا ەلىمىزدەگى مەكتەپتەردىڭ 90 پايىزى ينكليۋزيۆتى ءبىلىم بەرۋگە قاجەتتى جاعدايلارمەن جابدىقتالعان.
سولتۇستىك قازاقستان, شىعىس قازاقستان, پاۆلودار وبلىستارىندا, سونداي-اق الماتى مەن شىمكەنت قالالارىندا اشىلعان التى قوسىمشا ءبىلىم بەرۋ نىسانى ءىرى جوبالار قاتارىنا جاتادى.
ماۋسىم ايىندا اقتوبە جانە جەتىسۋ وبلىستارىندا ەكى زاماناۋي بالالاردى ساۋىقتىرۋ ورتالىعى ىسكە قوسىلادى.
