سۋرەت: invest.gov.kz
بيىلعى فورۋم 4 نەگىزگى باعىت اياسىندا جۇمىس ىستەيدى: سىرتقى ساياسات جانە حالىقارالىق قاۋىپسىزدىك, حالىقارالىق دامۋ جانە تۇراقتىلىق, ەنەرگەتيكا جانە كليماتتىڭ وزگەرۋى, ەكونوميكا جانە قارجى. اتالعان باعىتتار شەڭبەرىندە جەتەكشى الەمدىك ساياساتكەرلەر, بيزنەس كوشباسشىلارى جانە قوعام قايراتكەرلەرى پىكىرتالاسقا قاتىسىپ, كوزقاراسىن جەتكىزەدى.
سونىمەن قاتار كوپپوليارلى الەمدەگى ورتا دەرجاۆالاردىڭ ساياساتى, ورتالىق ازياداعى سۋ قاۋىپسىزدىگى, جاساندى ينتەللەكت داۋىرىندەگى ينتەللەكتۋالدىق قازىنا تاقىرىپتارى دا تالقىعا وزەك بولماق. ارينە, بۇل ورايدا ەنەرگەتيكالىق قاۋىپسىزدىك, كليمات وزگەرىسىمەن كۇرەس, گەوساياسي ىنتىماقتاستىق, حالىقارالىق ساۋدا, تەحنولوگيالىق يننوۆاتسيا, ورنىقتى دامۋ تاقىرىپتارى دا نازاردان تىس قالمايدى.
«الەم بۇرىن-سوڭدى بولماعان جاھاندىق كۇردەلىلىك داۋىرىنە قادام باستى. وسىنداي كەزەڭدە AIF 2025 الاڭى – پىكىر مەن ناقتى ارەكەتتىڭ تۇيىسكەن جەرى. بۇل – پولياريزاتسيانى ەڭسەرىپ, بىرلەسكەن دامۋدىڭ ورتاق جولىن ايقىندايتىن پلاتفورما. ءبىز ساياسات, بيزنەس جانە عىلىم سالالارىنداعى ەڭ وزىق ويلى ءارى جاڭاشىل كوشباسشىلاردىڭ باسىن قوسامىز.
AIF 2025-ءتىڭ باستى مىندەتى – كوپجاقتى ىنتىماقتاستىقتى قايتا جاڭعىرتۋ, تۇبەگەيلى ديالوگ ورناتۋ جانە ەڭ وزەكتى جاھاندىق ماسەلەلەردى شەشۋگە باعىتتالعان ناقتى قادامداردى ۇسىنۋ», دەلىنگەن ۇيىمداستىرۋشىلار مالىمدەمەسىندە.
