بۇل جىگىتتىڭ ەسىمى – زاكىرجان مامليۋتوۆ. تاتار اعايىننىڭ بالاسى. اتا-اناسى پەتروپاۆلدىڭ جانىنداعى مامليۋت دەگەن شاعىن قالادا تۋعان. بۇل قالانىڭ زاكىرجانعا تىكەلەي قاتىسى بار. ويتكەنى وسى جەرگە ونىڭ ارعى باباسى مامليۋت اقساقال قازاننان اربامەن كوشىپ كەلىپ, العاشقى بولىپ قونىس سالعان ەكەن. سودان قازاقتار وسى جەردى ءماۋلىت اتاپ كەتكەن. ورىسشا جازبادا ول كەيىن مامليۋتكە اينالعان.
زاكىرجاننىڭ اناسى تارازداعى جوعارى وقۋ ورنىنا ءتۇسىپ, ماماندىعىن سوندا الادى. ال اكەسى پەتروپاۆلدىڭ پەدينستيتۋتىن بىتىرگەنىمەن سۇيگەن قىزىنىڭ جانىنا بارىپ, ەكى جاس ۇيلەنگەن سوڭ تاراز قالاسىندا تۇرىپ قالادى. سودان جاس وتباسى تابيعاتى جايلى تارازدا 20 جىلداي ءومىر ءسۇرىپ, تۋعان جەرگە بەرتىن عانا قونىس اۋدارادى. زاكىرجان مەن قارىنداسى سول قالادا 1981 جىلى دۇنيەگە كەلگەن.
زاكىرجاننىڭ اكەسى حاريس جاستايىنان سپورتپەن اينالىسىپ, كەيىن ءوزى اينالىسقان ەركىن كۇرەستەن ءالى كۇنگە جاتتىقتىرۋشى بولىپ كەلەدى. ال اناسى مەكتەپتە ەڭبەكتەن ساباق بەرەدى. ءوز ەڭبەگىمەن كۇن كورگەن وتباسى بالاسىن دا ەڭبەكقورلىققا باۋلىپ وسىرگەنى كورىنىپ تۇرادى.
زاكىرجان سولتۇستىك قازاقستان ۋنيۆەرسيتەتىن «بۇكىلالەمدىك تاريح» ماماندىعى بويىنشا 2002 جىلى بىتىرگەن. ستۋدەنت بولىپ جۇرگەن جىلدارىندا دا قوعامدىق ومىرگە بەلسەنە ارالاسىپ, تەڭ قۇربىسىنىڭ الدى بولىپ جۇرەتىن. قانداي ورتادا بولسىن ءبىلىمسىز ادام قامال المايتىنىن سەزگەن ول, ءبىلىمىن جالعاستىرىپ, زاڭ اكادەمياسىندا دا وقىپ, ديپلوم الادى. ال 2020 جىلى جۋرناليستيكانىڭ ماگيسترلىگىن بىتىرەدى.
كوپ ءبىلىمنىڭ پايداسى ونىڭ جان-جاقتىلىعىن ارتتىرىپ, بيزنەستى دە, قوعامدىق ىستەردى دە, ءتىپتى اكىمدىكپەن جاقىندىقتى دا قاتار الىپ جۇرۋىنە مۇمكىندىك بەرگەن. ول – قازىر «KZ مەديا» كومپانياسىنىڭ ديرەكتورى جانە «KZ News» اقپاراتتىق پورتالىنىڭ باسشىسى. سوڭعى شاقىرىلىمدا ول پەتروپاۆل قالالىق ءماسليحاتىنىڭ دەپۋتاتتىعىنا سايلانعان. زاكىرجان – سونداي-اق وبلىس اكىمىنىڭ كرەاتيۆتىك ەكونوميكا جونىندەگى كەڭەسشىسى. ارينە, ول قالاداعى تاتار ەتنو-مادەني ورتالىعىنىڭ جۇمىسىنا اتسالىسىپ, قحا جۇمىسىنا دا قولداۋ ءبىلدىرىپ جۇرەدى.
ء«بىزدىڭ قالاداعى ماسەلەلەردىڭ ەڭ ۇلكەنى – جولداردىڭ جارامسىزدىعى, قوقىستىڭ شىعارىلۋى, قالانىڭ ءالسىز جارىقتاندىرىلۋى. وسىلاردى ءماسليحاتتىڭ وتىرىستارىندا ۇنەمى قىزۋ تالقىلاپ, سۇراۋلار بەرەمىز. ءوزىم ناقتى اينالىسىپ جۇرەتىن تاعى ءبىر ماسەلە – قالامىزدا جاستاردىڭ تۇراقتانۋى. بيىل كرەاتيۆ ورتالىقتى دا سول ءۇشىن اشىپ, شىعارماشىل جاستار ءۇشىن شاھارىمىزدىڭ تارتىمدى بولۋىن كوزدەپ وتىرمىز», دەيدى ول.
كۇنى بويعى الىسقان بيزنەس, ءتۇرلى جوبالار, كەزدەسۋلەر, قوعامدىق جۇمىستاردان شارشاعاندا زاكىرجاندى ۇيىندە سۇيگەن جارى رەگينا, قوس قىزعالداعى ياسمين مەن سوفيا قارسى الادى. رەگينا دا – تاتار قىزى, سەمەيلىك. وتباسىندا قازاق ءتىلى جات ەمەس, تاتار ءتىلىن دە قولدانۋعا تىرىسادى. زاكىرجان ءتىل ساقتالماسا, ۇلتتىڭ جۇتىلاتىنىن جاقسى بىلەدى. ول قازاقتار سياقتى ءوزىنىڭ جەتى اتاسىن دا ايتىپ بەرە الادى. سوندىقتان اۋلەتىندە تۋعان تىلىندە سويلەسۋگە تىرىسادى.
پەتروپاۆل
