سۋرەتتى تۇسىرگەن – اۆتور
12 ادامدى جۇمىسپەن قامتىدى
ازىق-ت ۇلىككە پايدالاناتىن پوليەتيلەن دوربالار سۇيىتىلعان گاز تۇيىرشىكتەرىنەن وندىرىلسە, قوقىس شىعارۋعا ارنالعان قارا پاكەتتەردى قايتا وڭدەلگەن پوليەتيلەننەن جاسايدى. ءوندىرىس وشاعىنىڭ باسشىسى بايجان جاۋعاشاروۆتىڭ ايتۋىنشا, قولدانىلعان ەسكى تسەلوفان پاكەتتەردى تۇرعىنداردان بەلگىلى سوماعا ساتىپ الىپ, قايتا بالقىتادى, ءپىشىنىن كەلتىرىپ سوزادى. مۇنىڭ ءبارىن اۆتوماتتاندىرىلعان ارنايى قۇرىلعىلار جاسايدى. كاسىپورىن يەسى اۋەلدە ءارتۇرلى پاكەتتى كوتەرمە باعامەن ساتىپ الىپ, ۇستىنە ۇستەمە قوسىپ, ساۋدالاپ كورگەن. ساۋداسى جۇرە باستاعان سوڭ كولىك تىزگىندەگەن. تاباندى ەڭبەكتىڭ ارقاسىندا بۇل كۇندە ۇلكەن كاسىپ اشىپ, 12 ادامعا جۇمىس بەرىپ وتىر.
– كاسىپتى باستاماس بۇرىن, ساتىپ كورۋ كەرەك. ەگەر سۇرانىس بولسا, سول دۇنيەنى وندىرۋگە بولادى. مەن ءوزىم پاكەت ساتۋدى بۇرىن باستادىم. تۇراقتى تۇتىنۋشىلارىم بار. سۇرانىس بولعان سوڭ نەگە وزىمىزدە وندىرمەسكە دەگەن وي كەلدى. نارتاۋەكەل دەپ, ەكى ستانوك ساتىپ الىپ, ىسكە قوستىم. ءوز-ءوزىن اقتادى, پايدا تۇسىرە باستادى. ءسويتىپ, كەڭەيە بەردىك. عيماراتتى دا ءوز كۇشىممەن كوتەرىپ الدىم, – دەيدى «Bereket» جشس باسشىسى بايجان جاۋعاشاروۆ.
باسەكەلەستەردىڭ بارىنەن وزدى
پاكەت شىعارۋ ءوندىرىسى دوڭگەلەي باستاعان سوڭ باسەكەلەستەر دە پايدا بولعان. الايدا ارىپتەستەرىنىڭ كاسىبى ۇزاققا بارماعان كورىنەدى. ويتكەنى بايجان جاۋعاشاروۆ بۇل نارىققا بارىنەن بۇرىن كەلدى. ۇزدىكسىز جۇمىس ىستەپ تۇرعان كاسىپورىننان كۇنىنە 1 توننا پاكەت شىعادى. كوبىنە دوربا مەن قۇلاقتى پاكەتتەر شىعارادى. ەڭ سۇرانىسقا يەسى وسىلار. ايتپەسە, تسەحتا تۇرعان ستانوكتار قىزىلدى-جاسىل پاكەتتىڭ ءتۇر-ءتۇرىن شىعارۋعا قاۋقارلى. سونىڭ وزىندە قالاداعى نارىقتىڭ 20%-ىن وتاندىق ونىممەن قامتاماسىز ەتىپ وتىر.
– ساۋدا-ساتتىقپەن اينالىسقاندىقتان پوليەتيلەن پاكەتتەردى كۇندەلىكتى قولدانامىز. تۇتىنۋشىلارىمىزعا العان ازىق-ت ۇلىكتەرىن وسىنداي پاكەتكە سالىپ بەرەمىز. وتاندىق ءونىم بولعاندىقتان عانا ەمەس, ساپاسى دا ۇنايدى. ونىڭ ۇستىنە, جاقىن جەردەن الىپ وتىرامىز, – دەيدى جەكە كاسىپكەر بوتاكوز باقىتبەكقىزى.
ساپالى ونىمگە سۇرانىس مول
پوليەتيلەن پاكەتتەرىن ءوندىرۋ بىرنەشە كەزەڭنەن تۇرادى. ستانوكتار اۆتوماتتى بولعانىمەن, ءبارىبىر مامان قولىن قاجەت ەتەدى. ەڭ ءبىرىنشى پوليەتيلەن تۇيىرشىكتەرىن ارنايى رەزەرۆۋارلارعا سالىپ, بەلگىلى ءبىر تەمپەراتۋرادا بالقىتادى. قاجەت بولعان جاعدايدا تۇستەر مەن بەرىكتىك قاسيەتتەرىن ارتتىرۋ ءۇشىن قوسپالار قوسىلادى. بالقىتىلعان پوليەتيلەن ەكسترۋدەر قۇرىلعىسى ارقىلى جۇقا پلەنكا تۇرىندە قالىپتاسادى. ول جوعارى تەمپەراتۋرادا سوزىلىپ, جۇقارتىلادى. وسى كەزەڭدە پلەنكاعا ءتۇرلى تۇستەر نەمەسە لوگوتيپتەر باسىلۋى مۇمكىن. قالىپتاسقان پوليەتيلەن پلەنكاسى روليكتەر ارقىلى سالقىنداتىلىپ, قاجەتتى پىشىنگە كەلتىرىلەدى. كەيىن ول ۇلكەن ورامدارعا جينالادى نەمەسە ناقتى ولشەمدەر بويىنشا كەسىلىپ دايىندالادى. كەسىلگەن پلەنكادان پاكەتتەردىڭ تۇپكىلىكتى فورماسى جاسالادى. پاكەتتەردىڭ تۇرىنە بايلانىستى, ولاردىڭ جۇك كوتەرۋ مۇمكىندىگى تەكسەرىلەدى. دايىن بولعان پاكەتتەر ساپا باقىلاۋىنان وتكىزىلەدى. كەيىن ولار قاپتالىپ, ساتۋ ورىندارى مەن تاپسىرىس بەرۋشىلەرگە جونەلتىلەدى. بۇل جۇمىستارعا ماماندار ابدەن ماشىقتانىپ العان. ولار شيكىزات ساپاسىن, تەمپەراتۋرالىق رەجىمدى جانە پلەنكا قالىڭدىعىن قاداعالايدى.
– اپپاراتتىڭ بارلىعىن ءوزىمىز رەتتەيمىز. پاكەتتىڭ ولشەمى, تەمپەراتۋراسى قولمەن قويىلادى. بارلىعىن رەتتەپ العان سوڭ, اۆتوماتتى تۇردە ءونىمدى شىعارا بەرەدى. ال جالاقىمىز جۇمىسىمىزدىڭ كولەمىنە قاراي ۋاقتىلى تولەنەدى, – دەيدى وسى كاسىپورىندا بەس جىلدان بەرى جۇمىس ىستەپ كەلە جاتقان تاجىريبەلى مامان سەرىك جۇمابەكوۆ.
«Bereket» جشس شىعارىپ وتىرعان پاكەتتەر ارزان ءارى كۇندەلىكتى تۇرمىستا قولدانىلادى. سوندىقتان سۇرانىس كەمىمەيدى. ونىڭ ۇستىنە ساپاسىنا سىن جوق. قۇلاقتى پاكەتتەرى 5-15 كيلوعا دەيىن جۇك كوتەرەدى. قوقىسقا ارنالعان پاكەتتەر تىپتەن مىقتى.
كەلەسى كەزەڭ – پلاستيك بوتەلكەدەن قۇبىر شىعارۋ
بايجان جاۋعاشاروۆتىڭ ەندىگى ويى – پلاستيك بوتەلكەلەردى قايتا وڭدەپ, قۇبىر شىعارۋ. ول ءبىر جاعىنان كاسىپ كوزى دەسەك, ەكىنشى جاعىنان تابيعاتقا شاشىلاتىن پوليپروپيلەن بوتەلكەلەردىڭ ازايۋىنا سەپ بولادى. ەگەر قۇبىر شىعاراتىن ستانوك قويىلسا, تۇرعىندار قوقىسقا تاستايتىن بوتەلكەلەردى جيناستىرىپ, اتالعان كاسىپورىنعا اپارىپ وتكىزۋلەرى ابدەن مۇمكىن. وسىلايشا, اينالا زياندى قالدىقتاردان تازالانا بەرمەك.
بۇل ازىرگە جوسپار. دەسە دە, جۇزەگە اسۋى ابدەن مۇمكىن. كاسىپتىڭ قىر-سىرىن ابدەن مەڭگەرگەن بايجان الدىمەن قۇبىرلاردى كوتەرمە باعامەن ساتىپ الىپ, قايتا ساتىپ كورەدى. ەگەر سۇرانىس جوعارى بولسا, ارنايى قۇرىلعىلار الىپ, ءوزى وندىرەدى. ازىرشە, پاكەتتەن پايدا تاۋىپ وتىر.
شىعىس قازاقستان وبلىسى
