بۇل جيىننىڭ نەگىزگى ماقساتى – باتىس ەتنوگرافتارى, شىعىستانۋشىلارى, ساياحاتشىلارى مەن لينگۆيستەرىنىڭ كوزقاراستارى ارقىلى ورتالىق ازيانىڭ تاريحي مۇراسىن كەڭىنەن ناسيحاتتاۋ. كورمە ماجارستاننىڭ قازاقستانداعى ەلشىلىگىمەن بىرلەسىپ ۇيىمداستىرىلىپ, تانىمال ماجار شىعىستانۋشىسى جانە ساياحاتشىسى ارمينيۋس ۆامبەريدىڭ ەڭبەكتەرىنە ارنالدى. ەكسپوزيتسيادا ونىڭ 1868 جىلى جارىق كورگەن «ورتالىق ازياعا ساياحات» اتتى كىتابىنان تسيفرلانعان فوتوماتەريالدار مەن تاريحي سۋرەتتەر توپتاماسى قويىلدى. كورمەگە عىلىم جانە جوعارى ءبىلىم مينيسترلىگى مەن سىرتقى ىستەر مينيسترلىگىنىڭ وكىلدەرى, ديپلوماتيالىق كورپۋس مۇشەلەرى, تاريحشىلار, حالىقارالىق ساراپشىلار جانە جۋرناليستەر قاتىستى.
«ارمينيۋس ۆامبەري – الەمدىك تۇركىتانۋدىڭ نەگىزىن قالاۋشىلاردىڭ ءبىرى. ونىڭ ەڭبەكتەرى ماجارستان مەن ورتالىق ازيا حالىقتارى اراسىنداعى رۋحاني بايلانىستىڭ بەرىك نەگىزىن قالادى. سونىڭ ارقاسىندا قازاقتار مەن ماجارلار اراسىنداعى تۋىستىق سەزىم بۇگىنگە دەيىن ساقتالىپ وتىر. ءبىز ارقاشان دا وسىنداي ماڭىزى زور كورمەلەر مەن رۋحاني, مادەني باستامالارعا قولداۋ كورسەتۋگە دايىنبىز. سەبەبى مۇنداي جيىندار ەكى ەل اراسىنداعى بايلانىستى نىعايتىپ, ستۋدەنتتەرىمىزگە ءوز ەلىنىڭ باي مۇراسىن تەرەڭ مەڭگەرىپ, الەمدىك مادەنيەتتەرمەن تانىسۋعا مۇمكىندىك بەرەدى», دەدى ماجارستاننىڭ قازاقستانداعى توتەنشە جانە وكىلەتتى ەلشىسى وتتو يۆان رونا.
ءىس-شارادا كورمە قوناقتارى تسيفرلانعان ارحيۆ ماتەريالدارىمەن (National Geographic) تانىسىپ, قازاق حالقىنىڭ ءار كەزەڭدەگى تاريحي ءساتى مەن مادەنيەتىن تاماشالادى.
پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ تا ءوز ويىن ءبىلدىرىپ, كورمەنىڭ ماڭىزى مەن وزەكتىلىگىنە توقتالدى.
ايتا كەتەيىك, Maqsut Narikbayev University-دە جاستاردىڭ رۋحاني-پاتريوتتىق تاربيەسىنە ەرەكشە كوڭىل بولىنەدى. بۇل باعىتتاعى باستى جۇمىستاردىڭ ءبىرى – ستۋدەنتتەردىڭ «قازاقستان تاريحى» ءپانىن جاڭا فورماتتا مەڭگەرۋى. وقىتۋدىڭ بۇل ۇلگىسىندە تەوريالىق بىلىممەن قاتار, ەلىمىزدىڭ تاريحي ورىندارىنا بارۋ, سونداي-اق تەاترلاندىرىلعان قويىلىمدارعا قاتىسۋ سىندى تاجىريبەلىك ەلەمەنتتەر دە قامتىلعان.
