ىلگەرى باسقان ىلكىمدى ىستەر

وبلىس اكىمى عاۋەز نۇر­مۇ­حام­بەتوۆتىڭ ايتۋىن­شا, قازىر ءوڭىر اۋىل شار­ۋا­شىلىعىنىڭ نەگىزگى كاپيتا­لىنا ينۆەستيتسيا تارتۋ جوسپارىن ورىنداۋ جونىنەن ەلىمىزدە ەڭ الدىڭعى ورىنعا شىعىپ وتىر. بۇگىننىڭ وزىندە وبلىس اۋىل شارۋاشىلىعى مينيسترلىگىنىڭ ايماققا بەلگىلەگەن جوسپارىنىڭ تورتتەن ءبىرىن ورىنداعان. اۋىل شارۋاشىلىعى باسقارماسىنىڭ باستىعى داۋرەن توقۋشىنوۆ الدا­عى ۋاقىتتا دا وسى قارقىننان تۇسپەيتىن­دىكتەرىن ايتتى.

ونەركاسىپ سالاسىندا الىنعان جالپى ءونىم كولەمى 162,3 ملرد تەڭگە بولىپ, بىلتىرعى جىلدىڭ سايكەس مەرزىمىمەن سالىستىرعاندا 0,2% تومەندەدى. الايدا تاۋ-كەن ءوندىرۋ ونەركاسىبىندە ءوندىرىس كولەمى 27,5%-عا ارتتى. ونەركاسىپتىڭ شامامەن 80%-ى وڭدەۋ ونەركاسىبىنە تيەسىلى. بۇل سالاداعى ءونىم 129,6 ملرد تەڭگە بولىپ, بىلتىرعى جىلدىڭ سايكەس مەرزىمىمەن سالىستىرعاندا 0,1 پايىز عانا ءوسىم بايقالدى. سونداي-اق ەلەكتر ەنەرگياسىمەن, گازبەن, بۋمەن, ىستىق سۋمەن, كونديتسيونەرلەنگەن اۋامەن جاب­دىقتاۋ 9%-عا تومەندەدى.

قۇرىلىس جۇمىستارى جىلدىڭ ال­عاشقى توقسانىندا ءوسىم قارقىنىنان ايرىلعان جوق. ءۇش ايدا سالا بەلگىلەنگەن مەجەنى 28,8% ارتىق ورىندادى. كۇردەلى جوندەۋلەر كولەمى بىلتىرعىدان 1,6 ەسە ارتىق بولىپ, 2,2 ملرد تەڭگە بولدى. اعىمداعى جوندەۋلەر دە بىلتىرعى جىلدىڭ سايكەس مەرزىمىنەن 18,0%-عا اسىپ ءتۇستى.

ءۇش ايدا وبلىس بويىنشا 30,6 مىڭ شارشى مەتردىڭ تۇرعىن ءۇيى پاي­دالانۋعا بەرىلدى. بۇل بىلتىرمەن سا­لىستىرعاندا 7,3%-عا ارتىق. جە­تىس­تىكتىڭ نەگىزگى بولىگى جەكەمەنشىك تۇرعىن ءۇي قۇرىلىسىنىڭ ەسەبىنەن بولىپ وتىر. پايدالانۋعا بەرىلگەن بارلىق تۇرعىن ءۇيدىڭ 97%-ى سولاردىڭ ۇلەسى. بۇل كورسەتكىش بويىنشا اۋداندار اراسىندا ەسىل, مامليۋت, ايىرتاۋ اۋداندارى كوش باستاپ تۇر. تەك تيمي­ريازەۆ اۋدانى عانا ارتقا تارتىپ, بىلتىرعىدان 4,5% تومەن بولدى.

توعىز جولدىڭ تورابىندا ورنا­لاسقان وبلىستىڭ ىشكى, سىرتقى ساۋداسى جىلدىڭ العاشقى توقسانىندا 206,7 ملرد تەڭگەنى قۇراپ, بىلتىرعىمەن سالىستىرعاندا 10,8% ارتىق بولدى. بولشەك ساۋدادا ءۇش ايدا 89,3 ملرد تەڭگەنىڭ تاۋارى ساتىلعان.

كولىك سالاسىنداعى تابىس ماردىمدى ەمەس. جىل باسىنان بەرى سالانىڭ كورسەتكىشى 63,4 ملرد تەڭگە بولىپ, بىلتىرعىدان ءسال تومەندەپ كەتتى. وب­لىستىڭ ەكونوميكا باسقارماسىنىڭ باسشىسى قۋانىشبەك قاليجانوۆ «مۇنىڭ باستى سەبەبى ستاتيستيكا ورگاندارىنىڭ ەسەپتەۋدىڭ دۇرىس ءتاسىلىن قولدانباۋىندا» دەيدى. نە دە بولسا بۇل سالا وبلىستىڭ كورسەتكىشتەرىن ارتقا تارتىپ تۇر.

بايلانىس سالاسى ءۇش ايدا 3,0 ملرد تەڭگەنىڭ جۇمىسىن اتقارىپ, 3,4% ءوسىم كورسەتكەن. بۇل – وبلىستىڭ 138 مەك­تەبىنە «Starlink» جاراقتارىن قويدى­رىپ, «ترانستەلەكوم» اق-مەن اراداعى ماسەلەلەردى شەشۋدىڭ ارقا­سىندا قول جەتكىزىلگەن تابىس.

«وبلىس ۇكىمەتتىڭ ەكونوميكالىق وسىمگە بايلانىستى تاپسىرمالارىن بۇلجىتپاي ورىنداۋ جولىندا قالا, اۋدان اكىمدەرى اي سايىن 7 پايىز­دىق وسىمگە قول جەتكىزۋدى, بارلىق ينفرا­قۇرىلىمدىق جوبالاردىڭ تولىق, ۋاق­تىلى ورىندالۋىن قامتاماسىز ەتۋلەرى كەرەك, ەكونوميكانىڭ وسۋىنە سەپ­تەسەتىن قوسىمشا رەزەرۆتەر تابۋى قاجەت», دەيدى ەكونوميكا باسقارماسىنىڭ باسشىسى قۋانىشبەك قاليجانوۆ.

سولتۇستىك قازاقستان وبلىسى