قازاق ۇلتتىق قىزدار پەداگوگيكالىق ۋنيۆەرسيتەتى باسقارما توراعاسى – رەكتورى گۇلميرا قانايدىڭ ايتۋىنشا, جەكەمەنشىك حالىقارالىق مەكتەپتەر بۇل ماسەلەنى شەشۋ ءۇشىن وقۋ ورداسىنىڭ كومەگىنە جۇگىنگەن.
«قازىرگى تاڭدا ۋنيۆەرسيتەتىمىز نازارباەۆ زياتكەرلىك مەكتەپتەرىمەن, 25 جەكمەنشىك مەكتەپپەن, 92 مەملەكەتتىك مەكتەپپەن, 32 بالاباقشامەن, 7 كوللەدج جانە 96 ۇيىممەن سەرىستەستىكتە جۇمىس ىستەيدى. ءبىر جىل بۇرىن الماتىداعى جەكەمەنشىك مەكتەپ ۋنيۆەرسيتەتىمىزدەن قازاق ءتىلى مەن مادەنيەتىن ناسيحاتتاۋعا قولداۋ سۇرادى. سەرىكتەستىكتىڭ ناتيجەسىندە ۋنيۆەرسيتەت وقىتۋشىلارى مەن 4 كۋرس ستۋدەنتتەرى اتالمىش مەكتەپتىڭ وقۋشىلارى ءۇشىن قازاق ءبيى مەن ونەرىنە ارنالعان قويىلىمدار ۇيىمداستىرۋعا بەلسەنە اتسالىستى. حالىقارالىق مەكتەپتەردە قازاق مادەنيەتىن تانىستىرۋ – ۇلتتىق بولمىستى الەمدىك ءبىلىم كەڭىستىگىندە دارىپتەۋدىڭ ماڭىزدى قادامى. بۇل باعىت قازاقستاننىڭ تاريحىن, ءداستۇرىن, ءتىلىن جانە ونەرىن شەتەلدىك ءارى جەرگىلىكتى وقۋشىلارعا تانىستىرىپ, ۇلتتىق سانا مەن قۇرمەتتى قالىپتاستىرۋعا باعىتتالعان», – دەيدى گۇلميرا امىرحانقىزى.
قازاق مادەنيەتىن ىلگەرىلەتۋ ءۇشىن ءداستۇرلى مەرەكەلەردى – ناۋرىز مەيرامى, دومبىرا كۇنىن اتاپ ءوتۋ, قازاق ادەبيەتى مەن ونەرى بويىنشا ارنايى ساباقتار وتكىزۋ, ۇلتتىق تاعامدار فەستيۆالدەرى مەن قولونەر كورمەلەرىن ۇيىمداستىرۋ سەكىلدى ءىس-شارالار كەڭىنەن قولدانىلۋدا. سونىمەن قاتار قازاق ءتىلى فاكۋلتاتيۆتەرىن اشۋ جانە ءبىلىم بەرۋ باعدارلاماسىنا ۇلتتىق كومپونەنتتەردى ەنگىزۋ دە ماڭىزدى ءرول اتقارادى.
Haileybury Almaty مەكتەبىندە وتكەن ناۋرىز مەرەكەسىن جوعارى دەڭگەيدە ۇيىمداستىرۋعا QyzPU-دىڭ حورەوگرافيا جانە ارت-مەنەدجمەنت كافەدراسىنىڭ 3-4 كۋرس ستۋدەنتتەرى بەلسەندى قاتىستى. ستۋدەنتتەرىمىز ادەما ساناتوۆا, دانا ساماتوۆا, جاينا امانگەلديەۆا, جانەركە يمانباي, جانەل ساكەن جانە اياجان ارعىنوۆا وزدەرىنىڭ كاسىبي شەبەرلىكتەرىن كورسەتىپ, «قارا جورعا» جانە «كوكتەمگى سەزىم» اتتى حورەوگرافيالىق قويىلىمدار ۇسىندى. مەرەكەلىك باعدارلاما بارىسىندا كورەرمەندەر ولاردىڭ ونەرىن زور ىقىلاسپەن قابىلدادى. بي قويىلىمدارىن دايىنداۋعا جانە ساحنالاۋعا حورەوگرافيا جانە ارت-مەنەدجمەنت كافەدراسىنىڭ وقىتۋشىسى, ماگيستر بەرىك الپىسپاەۆيچ كۋكەتوۆ جەتەكشىلىك ەتتى.
بۇل ءىس-شارا ستۋدەنتتەر ءۇشىن كاسىبي قۇزىرەتتىلىكتەرىن ارتتىرۋعا, شىعارماشىلىق قابىلەتتەرىن شىڭداۋعا مول مۇمكىندىك بەردى. قازاق ۇلتتىق قىزدار پەداگوگيكالىق ۋنيۆەرسيتەتى الداعى ۋاقىتتا دا ءبىلىم الۋشىلاردىڭ كاسىبي دامۋى مەن شىعارماشىلىق الەۋەتىن ارتتىرۋعا باعىتتالعان باستامالاردى قولداپ, ءتۇرلى مادەني جانە ونەر جوبالارىنا بەلسەندى قاتىسۋدى جالعاستىرادى.
