كەڭەستىڭ نەگىزگى ماقساتى — قوعامداعى داۋ-دامايلاردى, ازاماتتىق جانە تۇرمىستىق جانجالداردى سوتقا جەتكىزبەي, بىتىمگەرشىلىك ارقىلى شەشۋ, سونداي-اق ۇلتتىق كەلىسىم مەن بىرلىكتى ساقتاۋعا ىقپال ەتۋ.
ۇلىتاۋ وبلىستىق اكىمدىگىنىڭ ءماجىلىس زالىندا بيلەر كەڭەسىنىڭ قۇرىلتايى ءوتتى. وعان وبلىستىق بيلەر كەڭەسىنىڭ مۇشەلەرى, سۋديالار, مەدياتسيا سالاسىنىڭ ماماندارى جانە قوعام بەلسەندىلەرى قاتىستى.
جيىندى ۇلىتاۋ وبلىسى قوعامدىق دامۋ باسقارماسىنىڭ باسشىسى باقىتجان جايلاۋباەۆ اشتى.
قۇرىلتاي اياسىندا بيلەر ينستيتۋتىنىڭ بۇگىنگى قوعامداعى ماڭىزى مەن ءرولى, سونداي-اق ونىڭ دامۋىنا قاتىستى ماسەلەلەر تالقىلاندى.
«بيلەر كەڭەسى — تاريحي نەگىزى تەرەڭدە جاتقان ينستيتۋت. بۇل - دالالىق دەموكراتيانىڭ, حالىق دانالىعى مەن ادىلدىكتىڭ نىشانى. وسى ءداستۇردى ساقتاي وتىرىپ, بۇگىنگى بيلەر كەڭەسى دە ەكى تاراپتى تىڭداپ, ادىلەتتى شەشىم قابىلدايدى, تاراپتاردى ءوزارا كەلىسىمگە كەلتىرەدى», دەيدى ۇلىتاۋ وبلىستىق سوتىنىڭ سۋدياسى سارسەن ساعاتوۆ.
قۇرىلتايدىڭ مودەراتورلارى – ۇلىتاۋ وبلىسى بويىنشا بيلەر كەڭەسىنىڭ توراعاسى نۇرلان تابىلعانوۆ جانە وبلىستاعى حالىقارالىق مەدياتسيا ورتالىعىنىڭ ديرەكتورى جۇلدىز ەسمۋرزينا بولدى.
قۇرىلتايدا بيلەر كەڭەسىنىڭ قىزمەتى ارقىلى قوعامدا بەيبىتشىلىك پەن ءوزارا تۇسىنىستىكتى ساقتاۋ, قۇقىقتىق مادەنيەتتى قالىپتاستىرۋ, مەدياتسياعا ءمان بەرۋ قاجەتتىلىگى ايتىلدى.
باياعى قازاقتىڭ دالا زاڭىندا بولعان ءداستۇرلى بيلەر كەڭەسى بىتىمگەرشىلىكتى قازىرگى زامانعى قۇقىقتىق تالاپتارمەن ۇشتاستىرا وتىرىپ, قىزمەت ەتە بەرەدى.
ۇلىتاۋ وبلىسى
