فوتو: ۆيدەودان الىنعان كادر
بەينەجازبادا ءبىر وقۋشىنىڭ بىرنەشە قاتارلاسىن جۇدىرىق جانە الاقانمەن بەتى مەن دەنەسىنەن ۇرىپ جاتقان ءساتى كورىنىس تاپقان.
باسقارمانىڭ مالىمەتىنشە, بۇل جاعداي 2024 جىلدىڭ قىركۇيەگىندە ورىن العان. ءجابىر كورسەتكەن وقۋشى 2025 جىلدىڭ ناۋرىز ايىندا باسقا مەكتەپكە اۋىستىرىلعان.
«بەينەجازبانىڭ ەسكى بولعانىنا قاراماستان, بۇل وقيعا بويىنشا ارنايى كوميسسيا قۇرىلىپ, تەرگەۋ جۇمىستارى جۇرگىزىلىپ جاتىر. تەكسەرۋ ناتيجەسىندە وقيعاعا قاتىسى بار تۇلعالار مەن تاربيەلىك جۇمىستى ءتيىستى دەڭگەيدە ۇيىمداستىرماعان مەكتەپ قىزمەتكەرلەرىنىڭ جاۋاپكەرشىلىگى قارالادى», دەلىنگەن حابارلامادا.
سونىمەن قاتار, مەكتەپ وقۋشىلارىنا پسيحولوگيالىق جانە پەداگوگيكالىق قولداۋ كورسەتىلىپ, اتا-انالارىمەن ءتۇسىندىرۋ جۇمىستارى جۇرگىزىلگەنى حابارلاندى.
الماتى وبلىستىق پوليتسيا دەپارتامەنتىنىڭ حابارلاۋىنشا, بۇل جاعداي بويىنشا كامەلەتكە تولماعاندارعا دەنە جاراقاتىن سالۋ فاكتىسى بويىنشا قىلمىستىق ءىس تىركەلگەن.
«بالالاردى تاربيەلەۋ بويىنشا مىندەتتەرىن دۇرىس ورىنداماعانى ءۇشىن قۇقىق بۇزۋشى ءجاسوسپىرىمنىڭ جانە بەينەجازبا تۇسىرگەن وقۋشىنىڭ زاڭدى وكىلدەرى اكىمشىلىك جاۋاپكەرشىلىككە تارتىلدى», دەلىنگەن حابارلامادا.
