بەيبىتشىلىك جانە كەلىسىم ساياباعىندا وتكەن ءىس-شاراعا 200-گە جۋىق ادام قاتىسىپ, شاعان جانە باسقا دا كوپجىلدىق اعاشتاردىڭ كوشەتتەرى وتىرعىزىلدى, ساياباقتىڭ اۋماعى تازارتىلدى. پارلامەنت سەناتىنىڭ توراعاسى ماۋلەن اشىمباەۆ ەلىمىز ءۇشىن مۇنداي ەكولوگيالىق اكتسيالاردىڭ ماڭىزدى ەكەنىنە نازار اۋداردى.
«پرەزيدەنت قازاقستان حالقى اسسامبلەياسىنىڭ جىل سايىنعى سەسسياسىندا سويلەگەن سوزىندە «تازا قازاقستان» جالپىۇلتتىق ەكولوگيالىق اكتسياسىنا باسا ءمان بەردى. مەملەكەت باسشىسى بۇل باستاما وسكەلەڭ ۇرپاقتىڭ بويىنا دۇرىس قۇندىلىقتاردى سىڭىرۋگە جانە ولارعا وزىق ءبىلىم مەن ءتالىم-تاربيە بەرۋگە سەپتىگىن تيگىزەتىن يگىلىكتى ءىس ەكەنىن ايتتى. سونداي-اق اتالعان اكتسيا, شىن مانىندە, شىنايى وتانشىلدىقتىڭ كورىنىسى ەكەنى انىق. بۇگىن ءدال وسىنداي قۇراممەن بەيبىتشىلىك جانە كەلىسىم ساياباعىندا سەنبىلىك وتكىزۋىمىزدىڭ سيمۆولدىق ءمانى زور دەپ ەسەپتەيمىن. ويتكەنى بيىل استانادا رۋحاني جانە حالىقتىق ديپلوماتيانى ىلگەرىلەتۋگە ىقپال ەتەتىن الەمدىك جانە ءداستۇرلى دىندەر كوشباسشىلارىنىڭ VIII سەزى وتەدى», دەدى م.اشىمباەۆ.
سەنات توراعاسى ساياباقتاعى ورتالىق ينستاللياتسيادا جۇرگىزىلىپ جاتقان جۇمىستاردىڭ بارىسىمەن تانىستى. دەمالىس ورنى بيىل استانادا وتەتىن «دىندەر ديالوگى: بولاشاق جولىنداعى سينەرگيا» اتتى الەمدىك جانە ءداستۇرلى دىندەر كوشباسشىلارىنىڭ VIII سەزى اياسىندا اشىلادى دەپ جوسپارلانىپ وتىر. پالاتا سپيكەرى ارىپتەستەرىمەن بىرگە وسى ماسەلەنى دە تالقىلادى.
بەيبىتشىلىك جانە كەلىسىم ساياباعىنىڭ نەگىزىن 2022 جىلى الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسۋشىلار قالادى. ولاردىڭ قاتارىندا ريم پاپاسى فرانتسيسك, ءال-ازھاردىڭ جوعارعى يمامى احمەد ات-تايەب, ءيزرايلدىڭ باس راۆۆيندەرى جانە الەمدىك دىندەردىڭ باسقا دا وكىلدەرى بار.
