سۋرەت: baq.kz
ءبىر-بىرىمەن تىعىز بايلانىستى بولسا دا, ۇلكەن عالىم اتانۋ – ءبىر باسقا دا, عىلىمدى باسقارۋ بولەك الەم. عىلىمدى قارا نارداي جۇگىن ارقالاعان, قىر-سىرىن بىلەتىن, ەرەكشەلىكتەرىن تەرەڭ ۇعاتىن تالعامپاز تۇلعا عانا باسقارا الادى. وسىنداي ۇلگىدەگى سيرەك تالانتتىڭ ءبىرى – ۇلتتىق عىلىم اكادەمياسىنىڭ اكادەميگى سەيىت اعا قاسقاباسوۆ ەدى.
سەيىت اسقار ۇلى استاناعا العاش قونىس اۋدارعان 1997 جىلدان بەرى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە عىلىمدى باسقارۋدىڭ قالىپتاسقان جۇيەسىن ساپالاندىرۋعا ەلەۋلى ۇلەس قوستى.
ازاماتتىڭ ومىرلىك ۇستانىمى بولادى. سەيىت اعانىڭ جاقسى عالىمدىعىنا قوسا, ىسكەر ۇيىمداستىرۋشى دا بولۋى ونىڭ ءتۋابىتتى العىرلىعىنان, ەڭبەكقورلىعىنان دەپ بىلەمىن.
قازاق كسر عىلىم اكادەمياسى قوعامدىق عىلىمدار بولىمشەسىنىڭ عالىم-حاتشىسى, سودان سوڭ قازاقستان كومپارتياسى ورتالىق كوميتەتى مەن قازاقستان رەسپۋبليكاسى پرەزيدەنتى اكىمشىلىگىنىڭ جاۋاپتى قىزمەتكەرى, كەيىن جوعارى اتتەستاتتاۋ كوميسسياسىنىڭ توراعاسى لاۋازىمىندا جۇرگەندە عىلىمي جۇمىستارىن, سونىڭ ىشىندە فولكلورتانۋ مەن ونەرتانۋدى نازارىنان قاعىس قالدىرىپ كورمەگەن ءبىرتۋار تۇلعا بولدى.
تاريح اقتاڭداقتارىن قالپىنا كەلتىرۋگە اتسالىسۋدى ابىرويلى پارىز دەپ ساناعان سەيىت اسقار ۇلىن تاريح, ادەبيەت, مادەنيەت سالاسىنداعى ارىپتەستەرىمەن بىرگە كۇللى زيالى قاۋىم جاقسى ءبىلدى.
الماتىداعى ادەبيەت ينستيتۋتى باسشىلىعىنا شاقىرىلىپ, ون جىل سوندا تابىستى ەڭبەك ەتكەن سوڭ, قارا شاڭىراعىم دەپ ۋنيۆەرسيتەتىمىزگە قايتا ورالعان سەيىت اسقار ۇلى قازاق ادەبيەتى كافەدراسىنىڭ تىزگىنىن ۇستادى. ول ءبىر كەزدە ءوزى اشقان «ەۋرازيا» عىلىمي زەرتتەۋ ورتالىعى, شىعىستانۋ فاكۋلتەتى جۇمىسىنا اقىل-كەڭەسىن بەرىپ ءجۇردى.
سەيىت قاسقاباسوۆتىڭ ازاماتتىق, عالىمدىق كەلبەتى دەگەندە, ول گۋمانيتارلىق عىلىم الەمىنە ەسەلى ەڭبەك ەتتى.
سونداي-اق قازاق فولكلورتانۋ عىلىمىندا ءوز مەكتەبىن قالىپتاستىردى. سەيىت قاسقاباسوۆتىڭ ەسىمى مەن ەڭبەگى قازاقستاندا عانا ەمەس, شەتەلدە دە زور ىلتيپاتپەن اتالادى.
ازاماتتىق ايقىن ۇستانىمىمەن, قاجىرلى ەڭبەگىمەن تاريح, فولكلور, ادەبيەت, مادەنيەت پەن رۋحانيات سالالارىنىڭ ءوسىپ-وركەندەۋىنە ولشەۋسىز ۇلەس قوسقان اكادەميك ەل-جۇرتتىڭ قۇرمەتىنە بولەندى. سوڭىنا توم-توم عىلىمي ەڭبەگى مەن لايىقتى شاكىرتتەرىن قالدىردى.
سەيىت قاسقاباسوۆتىڭ عيبراتتى عۇمىرى مەن جارقىن بەينەسى جۇرتشىلىق جادىندا ءاردايىم ساقتالادى دەپ سەنەمىن.
ەرلان سىدىقوۆ,
اكادەميك
