جوعارى سوت كەڭەسىنىڭ توراعاسى د. مالاحوۆ ءوز سوزىندە اكادەميانىڭ ۆەدومستۆولىق باعىنىستىلىعىنىڭ وزگەرۋى — قازاقستاننىڭ سوت جۇيەسى ءۇشىن كادرلار دايارلاۋ ساپاسىن كۇشەيتۋگە باعىتتالعان ءتيىمدى تاسىلدەردى ازىرلەۋ جونىندەگى جاڭا ستراتەگيالىق شەشىم بولاتىنىن اتاپ ءوتتى.
«اكادەميانىڭ ءبىلىم بەرۋ باعدارلامالارى قازىرگى زامانعى تالاپتارعا ساي بولىپ قانا قويماي, ولاردان وزىپ, وزەكتى جانە سۇرانىسقا يە بولۋى كەرەك», دەيدى ول.
سوت تورەلىگى اكادەمياسىنىڭ ۆيتسە-رەكتورى ق. مۋسين اكادەميانىڭ جوعارعى سوتتان جوعارى سوت كەڭەسىنىڭ قاراۋىنا بەرىلگەن ساتتەن بەرگى قىزمەتى تۋرالى پرەزەنتاتسيانى ۇسىندى. ول اتالعان وقۋ ورنىنىڭ نەگىزگى جەتىستىكتەرى مەن جۇمىسىندا قولدانىلاتىن جاڭا تاسىلدەرىن اتاپ ءوتتى.
جوعارى سوت كەڭەسى سوت تورەلىگى اكادەمياسىمەن بىرلەسىپ بولاشاق سۋديالاردى دايارلاۋ ساپاسىن ارتتىرۋ بويىنشا جۇيەلى جۇمىس جۇرگىزىپ كەلەدى. بۇل باعىتتاعى ماڭىزدى قادام كەڭەس توراعاسى دميتري مالاحوۆتىڭ سوت تورەلىگى اكادەمياسىنىڭ 2025-2027 جىلدارعا ارنالعان دامۋ تۇجىرىمداماسىن بەكىتۋى بولدى, ونىڭ شەڭبەرىندە باستامالاردىڭ تۇتاس كەشەنى ىسكە اسىرىلىپ جاتىر. ولاردىڭ قاتارىندا كريميناليستيكالىق پوليگون اشۋ, اكادەميانىڭ عىلىمي قىزمەت سۋبەكتىسى رەتىندە اككرەديتاتسيا الۋى, اكادەميانىڭ جاڭارتىلعان عىلىمي جۋرنالىنىڭ شىعۋى, سونداي-اق عىلىمي-پەداگوگيكالىق ماگيستراتۋرا مەن دوكتورانتۋرانى اشۋعا دايىندىق كىرەدى.
كەڭەسكە قاتىسۋشىلار ەلىمىزدىڭ كاسىبي سۋديالار كورپۋسىنىڭ الەۋەتىن ودان ءارى نىعايتۋ ءۇشىن قابىلدانىپ جاتقان شارالار مەن جاڭا تاسىلدەردىڭ تيىمدىلىگىن ايتىپ, اتالعان جۇمىستى ودان ءارى جالعاستىرۋ كەرەكتىگىن اتاپ ءوتتى.
قابىلدانعان شارالاردىڭ كەشەنى — اشىقتىقتى قامتاماسىز ەتۋگە, سوت جۇيەسى مەن جوعارى سوت كەڭەسىنىڭ ءيميدجىن نىعايتۋعا, سونداي-اق قوعام مەن ازاماتتاردىڭ جالپى سوت تورەلىگىنە دەگەن سەنىم دەڭگەيىن ارتتىرۋعا باعىتتالعان.
ايتا كەتەيىك, ءىس-شاراعا قازاقستان رەسپۋبليكاسى پرەزيدەنتىنىڭ كومەكشىسى ە.جيەنباەۆ, قازاقستان رەسپۋبليكاسى پارلامەنتى سەناتى مەن ءماجىلىسىنىڭ تۇراقتى كوميتەتتەرىنىڭ توراعالارى ن.بەكنازاروۆ پەن س.يماشەۆا, سوت اكىمشىلىگىنىڭ باسشىسى ن. احمەتزاكيروۆ, سونداي-اق پارلامەنتىنىڭ دەپۋتاتتارى, پرەزيدەنتى اكىمشىلىگى, سوت اكىمشىلىگى جانە جوعارى سوت كەڭەسى وكىلدەرى قاتىستى.
