مۇنداي مادەني ءىس-شارا وبلىستىق مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن ەكىنشى رەت ءوتىپ وتىر. ايماقتىق دەڭگەيدە وتكەن بايقاۋعا 50-گە جۋىق قاتىسۋشىدان ءوتىنىم تۇسكەن. ۇسىنىلعان اۋديوەرتەگىلەر اراسىندا قازاق, ورىس حالقىنىڭ ەرتەگىلەرى, سونداي-اق اۆتورلىق ەرتەگىلەر بار.
«بايقاۋعا كەلىپ تۇسكەن ماتەريالداردىڭ بارلىعىن تىڭداپ, ۇيىمداستىرۋشىلار ۇسىنعان بايقاۋ ولشەمدەرىنە ساي باعالاپ شىقتىق. وسى جۇمىستى اتقارۋ بارىسىندا قاتىسۋشىلاردىڭ ەڭبەكقورلىعىنا, جاۋاپكەرشىلىگىنە, شەبەرلىكتەرىنە سۇيسىندىك. كورۋ قابىلەتى بۇزىلعان بالالاردىڭ ەرەكشەلىگىن ەسەپكە الا وتىرىپ, ەرتەگى وقۋعا قويىلاتىن تالاپتاردى ساقتاۋعا تىرىسقان. قاتىسۋشىلاردىڭ دەنى جالپى ءبىلىم بەرەتىن مەكتەپ مۇعالىمدەرى مەن كىتاپحاناشىلار بولدى», دەيدى جازۋشىلار وداعىنىڭ مۇشەسى, بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ اعا وقىتۋشىسى, قازىلار القاسىنىڭ توراعاسى سالتانات كەڭەسبەكوۆا.
بۇل بايقاۋعا الماتى, قاراعاندى, اقتوبە, قىزىلوردا, وڭتۇستىك قازاقستان, سولتۇستىك قازاقستان, باتىس قازاقستان, شىعىس قازاقستان, ۇلىتاۋ وبلىستارى مەن استانا, الماتى, شىمكەنت قالالارىنان جانە وبلىسىمىزدىڭ بالقاش, تەمىرتاۋ قالالارى مەن بۇقار جىراۋ, نۇرا, اقتوعاي اۋداندارىنان 50-گە جۋىق شىعارماشىلىق جۇمىس تۇسكەن.
سونىمەن, «زالىم تۇلكى» اۋديوەرتەگىسىن شەبەر تاسپالاعان باتىس قازاقستان وبلىسى, ورال قالاسىنان گۇلمايرا سامەنوۆا مەن «تەرەموك» ورىس حالىق اۋديوەرتەگىسىمەن قاراعاندىلىق ەكاتەرينا فەدوتوۆا ءبىرىنشى ورىن الدى.
ال ەكىنشى ورىندى «قارلىعاشتىڭ قۇيرىعى نەگە ايىر؟» قازاق حالقىنىڭ اۋديوەرتەگىسىمەن ۇلىتاۋ وبلىسى, جاڭارقا اۋدانىنان گۇلمايرا جاقىپوۆا مەن شارل پەررونىڭ «كوت ۆ ساپوگاح» اۋديوەرتەگىسى ءۇشىن قاراعاندىلىق رومان تەن يەلەندى.
ءۇشىنشى ورىن «مومىنباي مەن جەتى قاراقشى» اۋديوەرتەگىسىمەن قىزىلوردا وبلىسىنان ەركەبۇلان وتەۋوۆ پەن «ورمانداعى ۇيشىك» ورىس حالقىنىڭ ەرتەگىسى ءۇشىن بالقاش قالاسىنان مەرۋەرت ۋتەنوۆاعا بۇيىردى.
مۇنىمەن قوسا, «ۇزدىك اۋديوقويىلىم» اتالىمىندا «بەس ەشكى» شىعارماسى ءۇشىن شىمكەنت قالاسىنان قاتىسقان كامشات اپپازوۆا مەن «لۋچشي چتەتس» اتالىمى بويىنشا «ۆزدورنىي ۆوروبەي» اۋديوەرتەگىسى نۇرالىق راۋشان يۆاشكينا ىنتالاندىرۋ سىيلىعىمەن ماراپاتتالدى. جۇلدەگەرلەرگە ديپلوم مەن قارجىلاي سىيلىق بەرىلدى.
قاراعاندى وبلىسى
