2024 جىلعى قازاندا اقتوبە وبلىسىنىڭ تۇرعىنى پوليتسياعا جۇگىنىپ, كۇيەۋىنىڭ تۋىستارى 14 جاستاعى قىزىنا سەكسۋالدىق سيپاتتاعى زورلىق كورسەتكەنىن ايتقان. قىز اناسىنا ءوزىنىڭ 8 جاسىنان بەرى 20 جانە 25 جاستاعى تۋىستارى تاراپىنان زورلىق كورىپ جۇرگەنىن جەتكىزگەن.
بۇعان دەيىن وبلىستىق پوليتسيا دەپارتامەنتى بۇل ءىس بويىنشا بوپسالاۋ جانە سەكسۋالدىق سيپاتتاعى زورلىق-زومبىلىق ارەكەتتەرى بويىنشا تەرگەۋ باستالعانىن حابارلاعان. الايدا ۆەدومستۆو رەسمي تۇردە جابىرلەنۋشىنىڭ كىم ەكەنىن جانە كۇدىكتىلەردىڭ وعان قانداي تۋىستىق قاتىناستا ەكەنىن ناقتىلاماعان.
2025 جىلعى 23 ساۋىردە مامانداندىرىلعان اۋدانارالىق قىلمىستىق ىستەر جونىندەگى سوت ەكى ايىپتالۋشىعا ۇكىم شىعاردى. ولار قىلمىستىق كودەكستىڭ "كامەلەتكە تولماعانعا قاتىستى سەكسۋالدىق سيپاتتاعى زورلىق ارەكەتتەرى" جانە "الدىن الا ءسوز بايلاسۋ ارقىلى ادامدار توبى جاساعان بوپسالاۋ" باپتارى بويىنشا كىنالى دەپ تانىلدى.
- سوتتا ق. جانە ك. ەسىمدى ايىپتالۋشىلار اعاسىنىڭ ايەلىنە ونىڭ جەكە ومىرىنە قاتىستى دەرەكتەردى جاريا ەتەمىز دەپ قورقىتىپ, WhatsApp ارقىلى 5 ميلليون تەڭگە تالاپ ەتكەنى بەلگىلى بولدى.
سونىمەن قاتار, ءبىر ايىپتالۋشى بىرنەشە جىل بويى اعاسىنىڭ قىزىن سەكسۋالدىق سيپاتتاعى زورلىق ارەكەتتەرىنە ماجبۇرلەگەن. ەكىنشى ايىپتالۋشى دا 2020 جىلدان باستاپ وسىنداي ارەكەتتەرگە بارعان, - دەلىنگەن اقپاراتتا.
ايىپتالۋشىلاردىڭ كىناسى جابىرلەنۋشىلەردىڭ, سونىڭ ىشىندە كامەلەتكە تولماعان جابىرلەنۋشىنىڭ, كۋاگەرلەردىڭ ايعاقتارى, زاتتاي ايعاقتارمەن, ساراپتاما قورىتىندىلارى جانە سوتتا زەرتتەلگەن وزگە دە دالەلدەرمەن راستالدى.
سوت ايىپتالۋشىلاردىڭ كىنانى ءىشىنارا مويىنداۋىن, وكىنىش ءبىلدىرۋىن جانە كامەلەتكە تولماعان جابىرلەنۋشىنىڭ پىكىرىن جازانى جەڭىلدەتەتىن ءمان-جايلار رەتىندە تانىدى.
قىلمىستىق جاۋاپتىلىقتى جانە جازانى اۋىرلاتاتىن ءمان-جايلار انىقتالعان جوق.
اقتوبە وبلىستىق سوتىنىڭ ءباسپاسوز قىزمەتى مالىمەتىنشە, سوت ۇكىمىمەن ق. جانە ك. قىلمىستىق كودەكستىڭ 194-بابى 2-بولىگى 2-تارماعى, 121-بابى 4-بولىگى بويىنشا كىنالى دەپ تانىلىپ, 58-باپتىڭ 4-بولىگى نەگىزىندە قىلمىستار جيىنتىعى بويىنشا ارقايسىنا ءومىر بويىنا باس بوستاندىعىنان ايىرۋ جازاسى تاعايىندالدى. سونىمەن قاتار, ولار ءومىر بويى پەداگوگيكالىق جانە كامەلەتكە تولماعان بالالارمەن جۇمىس ىستەۋگە بايلانىستى لاۋازىمداردى اتقارۋ قۇقىعىنان ايىرىلدى.
