شارۋالار ناۋقانعا ساقاداي ساي

بيىل 295,3 مىڭ گەكتار جەرگە – ءداندى, 89,7 مىڭ گەكتار جەرگە – مايلى داقىلدار, 12,2 مىڭ گەكتارعا – قانت قىزىل­شاسى, 6,8 مىڭ گەكتارعا – كارتوپ, 8,9 مىڭ گەكتارعا – كوكونىس-باقشا داقىلدارى جانە 97,3 مىڭ گەكتارعا مال ازىعى داقى­لى ەگىلمەك. باسقارما باس­شىسىنىڭ ورىنباسارى باحتيار شامپيكوۆتىڭ ايتۋىنشا, القاپ­تاردى ءارتاراپتاندىرۋ اياسىندا بيداي – 2,9 مىڭ گەكتارعا, قانت قىزىلشاسى – 1,5 مىڭ گەكتارعا, داندىك جۇگەرى 1,1 مىڭ گەكتارعا قىسقارادى. ارپا, مايلى داقىلدار, كارتوپ, كوكونىس-باقشا داقىلدارى ۇلعايادى.

«4,3 مىڭ گەكتاردىڭ ىلعا­لى جابىلدى. 0,6 مىڭ گەكتارعا تىرمالاۋ جۇمىستارى جۇر­گىزىلدى. ەسكەلدى اۋدانىندا 44 گەكتارعا ماساقتى ءداندى داقىل سەبىلدى. جازدىق اۋىل شارۋا­شىلىعى داقىلدارى تۇقىمىن زەرتحانالىق تەكسەرۋ جاسالىپ جاتىر. كوكسۋ قانت زاۋىتىنا 3 080 سەبۋ بىرلىگى شەتەلدەن جەتكىزىلدى. تۇقىمنىڭ باسىم بولىگى گەرمانيا, فرانتسيا, دانيادان الىندى. شارۋالار ءۇشىن كوكسۋ قانت زاۋىتى 6 080 قانت قىزىلشاسى تۇقىمىن بەرۋگە دايىن. بۇل 4 677 گەكتاردى قامتيدى», دەدى ب.شامپيكوۆ.

بيىل مينەرالدىق تىڭايت­قىشتاردى قولدانۋ كولەمى 58,8 مىڭ تونناعا دەيىن ۇلعايتىلعان (بىلتىر – 49 مىڭ توننا). شارۋالار 29,6 مىڭ توننا تىڭايتقىش ساتىپ الدى. قويمادا 5,3 مىڭ توننا مينەرالدى تىڭايتقىش بار. كوكتەمگى دالا جۇمىستارىنا 5,5 مىڭ توننا ارزانداتىلعان ديزەل وتىنى بولىنگەن. ناۋرىز ايىنا قاراستىرىلعان 960 توننا ديزەل وتىنىنىڭ 660 تونناسى شارۋالارعا جەتكىزىلىپتى.

«كوكتەمگى دالا جانە ەگىندى جيناۋ جۇمىستارىنا «اگرارلىق نەسيە كورپوراتسياسى» ارقىلى 14,3 ملرد تەڭگە نەسيە قاراس­تى­رىل­عان. «كەڭ دالا-1» جانە «كەڭ دالا-2» باعدارلاماسى بويىنشا جۇيەلى جۇمىس جۇرگىزىلىپ جاتىر. شارۋالار نەسيەگە بولىنگەن قارجىنىڭ 3,7 ملرد تەڭگەسىن الىپ, يگەرۋدە. بۇگىنگە دەيىن 195 شارۋاشىلىقتان 4,8 ملرد تەڭگەگە ءوتىنىم قابىلدانىپ, 106 شارۋاشىلىققا 3,0 ملرد تەڭگە نەسيە بەرىلدى», دەيدى باسقارما وكىلى.

جەتىسۋ وبلىسىندا قانت قىزىلشاسى ءوندىرىسىن قولداۋعا ارنالعان جوباعا ۇكىمەت رەزەر­ۆىنەن 11,1 ملرد اسا قاراجات سۇرالعان. ونداعى ماقسات – باسىم داقىلدار ءوندىرىسىن دامىتۋ ارقىلى وسىمدىك شارۋاشىلىعى ونىمدەرىنىڭ ونىمدىلىگى مەن ساپاسىن ارتتىرۋ. بولىنەتىن قاراجات قانت قىزىلشاسىن قايتا وڭدەۋگە جىبەرگەن اۋىل شارۋاشىلىعى تاۋار وندىرۋشىلەرىنە نەمەسە اۋىل شارۋاشىلىعى كووپەرا­تيۆتەرىنە سۋبسيديالار تولەۋگە باعىتتالماق.

جەتىسۋ وبلىسى