1965 جىلى «سوۆنارحوزدىڭ» كىتاپحاناسى رەتىندە نەگىزى قالانعان بۇل ورىن – بۇگىندە ەلىمىزدىڭ عىلىمي-تەحنيكالىق اقپارات كەڭىستىگىندەگى ماڭىزدى قۇرىلىم. ىشكە ەنگەن ساتتە تىنىشتىق جايلايدى. دىبىسسىز ءارى بايىپتى جۇمىس ءجۇرىپ جاتقانىن بىردەن بايقايسىڭ. كىتاپ سورەلەرى قاتار-قاتار تىزىلگەن. كوزگە بىردەن قالىڭ تۇپتەلگەن عىلىمي ەڭبەكتەر, سالالىق جۋرنالدار تۇسەدى.
كىتاپحانانىڭ ءبولىم باسشىسى تۇرار ۆاحيتوۆنا ءبىزدى جىلى قارسى الدى. ول بۇل مەكەمەدە 30 جىلدان بەرى جۇمىس ىستەيدى. اڭگىمەسىن تىڭداپ وتىرىپ, كىتاپحانانىڭ جىلناماسىن پاراقتاعانداي اسەر الاسىڭ.
– بۇل كوركەم ادەبيەت ەمەس, تەك عىلىم مەن تەحنيكا سالاسىنا ارنالعان مامانداندىرىلعان كىتاپحانا. مۇندا ستۋدەنتتەر, وقىتۋشىلار, عالىمدار, ينجەنەرلەر – ءبارى كاسىبي اقپارات الۋعا كەلەدى.
كىتاپحانا قورىندا 42 مىڭنان اسا كىتاپ بار. قور جىل سايىن جاڭارىپ وتىرادى. بىراق جاڭا ادەبيەتتەر الۋ وڭاي ەمەس. باعاسى قىمبات, قارجى شەكتەۋلى. سەبەبى مەكەمە كوممەرتسيالىق ەمەس اكتسيونەرلىك قوعام رەتىندە تىركەلگەن.
– بۇرىن كىتاپحانا تەگىن بولاتىن. كەڭەستىك كەزەڭدە مىڭداپ كىتاپ الاتىنبىز. قازىر, وكىنىشكە قاراي, كەلۋشىلەر سانى كۇرت ازايعان. ءبىر سەبەبى – قىزمەتتىڭ اقىلى بولعانى.
راسىمەن دە, بۇگىندە وقۋ زالىندا ستۋدەنتتەردىڭ قاراسى از. وقىرمان ءبىر كىتاپپەن جۇمىس ىستەۋى ءۇشىن 840 تەڭگە تولەۋى كەرەك. ال عالىمداردىڭ ءبىر كۇندىك ىزدەنىسىنە بايلانىستى باعا 800 تەڭگەدەن 21 500 تەڭگەگە دەيىن جەتەدى.
ءبىر كەزدەرى 22 ادام جۇمىس ىستەگەن ۇجىمدا قازىر نەبارى 4–5 ادام قالعان. بىراق جۇمىس توقتاعان ەمەس. عىلىمي مەكەمەلەرمەن, كاسىپورىندارمەن ەلەكتروندى پوشتا ارقىلى بايلانىس ورناتىلعان.
– بىزدە سۇرانىسقا يە باعىتتار – اۋىل شارۋاشىلىعى, مەنەدجمەنت, دانەكەرلەۋ, ەلەكتر جۇيەلەرى, پسيحولوگيا, تاماق ونەركاسىبى. ءار سالا مامانى ءوزىنىڭ ناقتى اقپاراتىن ىزدەپ كەلەدى. مىندەتىمىز – سول ىزدەنىستە جاردەمشى بولۋ, – دەيدى كىتاپحانا قىزمەتكەرلەرى.
تسيفرلاندىرۋ ماسەلەسى – تاعى ءبىر وزەكتى تاقىرىپ. قازىر تولىق ەلەكتروندى بازا جوق. بىراق كىتاپتاردىڭ ءبىر بولىگى ەلەكتروندى فورماتتا قولجەتىمدى. ەگەر قارجى تابىلسا, بۇل باعىتتا ۇلكەن جۇمىس اتقارۋعا دايىنبىز دەيدى ولار.
كىتاپحانا 1960 جىلى قازاقستان كومپارتياسى وك قاۋلىسى جانە قازاق كسر مينيسترلەر كەڭەسىنىڭ وكىمىمەن قالانعان. ۋاقىت وتە كەلە كىتاپحانا قۇرىلىمى وزگەرىپ, وڭىرلەردە 18 فيليالى اشىلدى. كەڭەستىك كەزەڭدە ول 429 كاسىپورىن كىتاپحاناسىن بىرىكتىرگەن اقپاراتتىق ورتالىققا اينالدى. الايدا 90-جىلدارداعى داعدارىس بۇل جۇيەنى السىرەتتى. قازىر رعتك-نىڭ 7 وڭىرلىك فيليالى مەن 4 پايدالانۋشى ورتالىعى جۇمىس ىستەيدى.
كىتاپحانانىڭ بۇگىنگى ميسسياسى – عىلىمي-تەحنيكالىق ماماندار مەن كاسىپورىنداردى ساپالى, سەنىمدى اقپاراتپەن قامتاماسىز ەتۋ. بۇل – تەك كىتاپ ساقتايتىن قويما ەمەس, عىلىمي ىزدەنىسكە باستار كوپىر. جاڭا داۋىردە رعتك زەرتتەۋ باعىتىنا بەت بۇرىپ, پايدالانۋشى سۇرانىسىن زەردەلەۋگە كىرىسكەن. ەلەكتروندى جەتكىزۋ جۇيەسى ەنگىزىلىپ, شالعايداعى پايدالانۋشىلارعا دا جەدەل اقپارات ۇسىنۋعا مۇمكىندىك تۋعان.
– ءبىز ۇلكەن ارمانمەن ءومىر ءسۇرىپ كەلەمىز. ۇلتتىق كىتاپحانا سەكىلدى زاماناۋي عيماراتتا, كەڭ كەڭسەلەردە جۇمىس ىستەۋدى قالايمىز. بىراق قازىرگى جاعدايىمىزعا دا شۇكىر دەيمىز. سەبەبى ەڭ باستىسى – ءبىزدىڭ جۇمىسىمىزدىڭ ءمانى مەن قاجەتتىلىگى. ەگەر عىلىمي-تەحنيكالىق اتاۋىمىزعا ساي بولعىمىز كەلسە, زاماناۋي ينفراقۇرىلىم, اقپاراتتىق تەحنولوگيالار, كەڭ كولەمدى تسيفرلىق بازا قاجەت-اق. ويتكەنى بۇل – استانالىق عىلىمي-تەحنيكالىق كىتاپحانا. ەلدىڭ ينتەللەكتۋالدىق الەۋەتىن كوتەرۋگە ۇلەس قوسۋعا ءتيىس مەكەمە, – دەيدى ءبولىم باسشىسى.
ايتقانداي, مۇندا كىتاپحاناشىلارعا ارنالعان وقىتۋ كۋرستارى دا بار. كىتاپحانا جانىنان جۇمىس ىستەيتىن كاسىبي دامۋ مەكتەبى ەلىمىزدىڭ تۇكپىر-تۇكپىرىنەن كەلگەن ماماندارعا باعىت-باعدار بەرىپ وتىر.
– بۇگىندە كوپتەگەن كىتاپحاناشىلار ءبىز ۇيىمداستىرعان وقۋلاردان كەيىن ءوز مەكەمەلەرىندە ناتيجەلى جۇمىس ىستەپ جاتىر. كاسىبي دامۋ مەكتەبىندە كۋرس باعدارلامالارى ءاربىر كىتاپحانانىڭ ناقتى قاجەتتىلىگىنە قاراي بەيىمدەلەدى. قالاساڭىز – ستاندارتتى فورماتتا, ال قاجەت بولسا – تولىقتاي جەكە تاپسىرما نەگىزىندە دايىندالعان اۆتورلىق باعدارلاما رەتىندە ۇسىنىلادى. بۇل جەردە وقىتۋدىڭ نەگىزگى باعىتتارى – كىتاپحانا ءىسىنىڭ نەگىزدەرى, يننوۆاتسيالىق تەحنولوگيالار, اقپاراتتىق-كوممۋنيكاتسيالىق قۇرالداردى قولدانۋ, پاتەنتتىك اقپاراتپەن جۇمىس ىستەۋ, سونداي-اق كىتاپحانا ونىمدەرى مەن قىزمەتتەرىن ناسيحاتتاۋ سياقتى ماڭىزدى تاقىرىپتاردى قامتيدى, – دەيدى مەكتەپتىڭ باستاماشىسى ءارى رعتك پرەزيدەنتى مارينات باپيەۆا.
مۇندا جاي عانا ترەنينگتەر ەمەس, تاجىريبەگە نەگىزدەلگەن كەشەندى كۋرستار ۇسىنىلادى. قازىر مەكتەپ ۇجىمى وقىتۋدىڭ جاڭا فورماتىنا كوشىپ, ونلاين-كونسۋلتاتسيالار مەن ورتامەرزىمدى كۋرستارعا باسىمدىق بەرىپ وتىر
بۇل جەرگە كەلگەن ءار ادام – جاۋاپتى ءبىر ميسسيانىڭ جولاۋشىسى سەكىلدى. عىلىم جولىن تاڭداعان جاننىڭ ايالدايتىن بەكەتى دە وسى شىعار.
