ءىس-شارا كونستيتۋتسيانىڭ 30 جىلدىعىنا ارنالعان ۇكىمەتتىڭ «اتا زاڭ – تاۋەلسىزدىك تىرەگى» جوسپارى اياسىندا س. امانجولوۆ اتىنداعى شىعىس قازاقستان ۋنيۆەرسيتەتىندە ۇيىمداستىرىلدى.
كونفەرەنتسيا جۇمىسىنا ءماجىلىس دەپۋتاتى ە. سايىروۆ, باس پروكۋروردىڭ كەڭەسشىسى ت. اداموۆ, وڭىرلىك مەملەكەتتىك قۇرىلىمدار مەن قۇقىق قورعاۋ ورگاندارىنىڭ جەتەكشىلەرى, ادۆوكاتتار مەن نوتاريۋستار قاۋىمداستىعىنىڭ وكىلدەرى, سونداي-اق وتاندىق جانە شەتەلدىك عىلىمي ساراپشىلار قاتىستى. جيىن بارىسىندا 2022 جىلى جۇزەگە اسىرىلعان كونستيتۋتسيالىق رەفورما ناتيجەلەرى مەن ونى «زاڭ جانە ءتارتىپ» قاعيداتىنا سۇيەنە وتىرىپ, ءىس جۇزىندە جۇزەگە اسىرۋ جولدارى جان-جاقتى تالقىلاندى.
ب. نۇرمۇحانوۆ ءوز بايانداماسىندا: «قازىرگى تاڭدا ەلىمىزدىڭ ازاماتتارى قولدانىستاعى زاڭداردىڭ كونستيتۋتسياعا سايكەستىگىن تەكسەرۋ تەتىگىن بەلسەندى پايدالانا باستادى. 2023 جىلدان بەرى كونستيتۋتسيالىق سوتقا 10 مىڭنان استام ءوتىنىش كەلىپ ءتۇستى, ونىڭ ىشىندە شىعىس قازاقستان وبلىسىنىڭ تۇرعىندارىنان – 458 ءوتىنىش تىركەلدى. سوڭعى ەكى جىلدا سوت 70 نورماتيۆتىك قاۋلى قابىلداپ, پارلامەنتكە ەلىمىزدەگى كونستيتۋتسيالىق زاڭدىلىق جايىندا ەكى جولداۋ جولدادى», دەپ اتاپ ءوتتى.
جيىن اياسىندا كونستيتۋتسيالىق سوت اپپاراتى مەن س. امانجولوۆ اتىنداعى شىعىس قازاقستان ۋنيۆەرسيتەتى اراسىندا ىنتىماقتاستىق جونىندەگى ءوزارا تۇسىنىستىك تۋرالى مەموراندۋمعا قول قويىلدى. بۇل قۇجات تاراپتاردىڭ قۇقىقتىق مادەنيەتتى دامىتۋ, كونستيتۋتسيالىق زاڭدىلىقتى نىعايتۋ, سونداي-اق ورتاق عىلىمي-تاجىريبەلىك ءىس-شارالاردى ۇيىمداستىرۋ جانە اناليتيكالىق اقپاراتتارمەن الماسۋ بويىنشا بىرلەسكەن جۇمىستى كوزدەيدى.
