«وتباسى بانك» قىزمەتكەرلەرى بايقاۋدان وتكەن (نەگىزگى تىزىمگە ەنگەن, ماقۇلداۋ العاندار), بىراق باسپاناعا تاڭداۋ جاساماعاندار نەمەسە ءالى ءۇي قاراپ جۇرگەن كليەنتتەرگە دايىن تۇرعىن ءۇي كەشەندەرىنە تانىستىرۋ وتكىزدى. مۇنداعى ماقسات – ادامداردىڭ ۋاقىتىن ۇنەمدەپ, بانكتىڭ كۇندەلىكتى نارىقتىق باعدارلامالارىمەن الۋعا بولاتىن قۇجاتتارى دايىنداۋ, قۇرىلىستارى اياقتالعان نىسانداردى كورسەتۋ. اقتاۋلىق گۇلناز وڭداسىنوۆا «ناۋرىز» باعدارلاماسىنا ءوتىنىم بەرىپ, بايقاۋدان وتكەن. ەندى ول 2 بولمەلى پاتەر قاراپ ءجۇر.
«30 ملن تەڭگەگە ماقۇلداۋ الدىم. «وتباسى بانكىنە» ۇلكەن راقمەت. حالىقتىڭ جاعدايىن ويلاپ, ارنايى تۋر ۇيىمداستىردى. وسى ارقىلى تۇرعىن ءۇي كەشەندەرىن كورىپ, پاتەرلەردى ارالاپ, ۋاقىتىمىزدى ۇنەمدەپ جاتىرمىز. ماعان ەكى بولمەلى پاتەر قاجەت. بۇگىن بارلىعىن كورىپ شىقتىم, ەندى شەشىم شىعارامىن», دەيدى گۇلناز.
«وتباسى تۋر» اياسىندا «ناۋرىز جۇمىسكەر» باعدارلاماسى ارقىلى باسپانالى بولعان تۇرعىندارعا كىلت تابىستاۋ ءراسىمى ءوتتى. سولاردىڭ ءبىرى – راقىمجان تاڭاتاروۆ. كولىك جۇرگىزۋشىسى بولىپ ەڭبەك ەتەتىن ول 2022 جىلى «وتباسى بانكتە» دەپوزيت اشىپ, قاراجاتىن جيناي باستاعان.
«ناۋرىز جۇمىسكەر» باعدارلاماسىن الەۋمەتتىك جەلىدەن كورىپ, ءوتىنىش بەرگەن ەدىم. 30 ملن تەڭگەگە ماقۇلدادى. ساپالى سالىنعان تۇرعىن ءۇي كەشەندەرىنەن تاڭداپ تۇرىپ 1 بولمەلى پاتەر الدىم. «وتباسى بانكتىڭ» تيىمدىلىگى – پايىزى از», دەيدى راقىمجان تاڭاتاروۆ.
اقتاۋ قالاسىنىڭ تۇرعىنى ناۋرىزبەك الۋادينوۆ تە «ناۋرىز جۇمىسكەر» باعدارلاماسىنىڭ ارقاسىندا 12 جىلدان بەرى ارمانداعان باسپاناسىنا قول جەتكىزدى. 17 ناۋرىزدا ءوتىنىش بەرىپ, 9%-دىق (جتسم 9,4%-دان 13%-عا دەيىن) يپوتەكاعا ىلىككەن.
«العاشقى ءۇيىم. قۋانىشىمدا شەك جوق. زاۋىتتا ىستەيمىن. «وتباسى بانكتىڭ» قىزمەتكەرلەرى جۇمىسقا كەلىپ, تۇسىندىرگەن بولاتىن. ماعان «ناۋرىز جۇمىسكەر» باعدارلاماسى وتە ءتيىمدى بولدى. سوسىن ءوتىنىش بەردىم. مەملەكەتتىڭ قولداۋىمەن وسىنداي باعدارلامالاردى پايدالانۋ كەرەك. «وتباسى بانكتىڭ» قىزمەتكەرلەرى دە جاۋاپتى. ناتيجەسىندە, 92 شارشى مەترلىك 2 بولمەلى ءۇي الدىم», دەيدى ناۋرىزبەك الۋادينوۆ.
«وتباسى بانك» ماڭعىستاۋ وبلىستىق فيليالىنىڭ ديرەكتورى مەدەت ابۋعاليەۆتىڭ ايتۋىنشا, بۇرىن مەملەكەتتىك باعدارلاماعا قاتىسۋ ءۇشىن كەزەكتە تۇرۋ مىندەت بولاتىن. «ناۋرىز جۇمىسكەر» باعدارلاماسىنىڭ ايىرماشىلىعى – تۇرعىننىڭ ءوزىنىڭ جانە وتباسى مۇشەلەرىنىڭ اتىندا سوڭعى 5 جىلدا باسپانا بولماسا قاتىسا الادى.
«ناۋرىز جۇمىسكەر» باعدارلاماسى – بيىلعى «جۇمىسشى ماماندىقتارى جىلى» اياسىندا ارنايى ىسكە قوسىلدى. الەۋمەتتىك وسال توپ وكىلدەرى جىلىنا 7% (جتسم 7,1%-دان 9,6%-عا دەيىن), باسقا ساناتتاعى ازاماتتار 9%-بەن (جتسم 9,4%-دان 13%-عا دەيىن) الادى. اقتاۋدان باسپانا الاتىن بولسا, جاڭادان سالىنعان تۇرعىن ۇيلەردەن الۋ قاجەت. سوندىقتان ءبىز «وتباسى تۋر» وتكىزىپ, كليەنتتەرىمىزگە وڭاي بولسىن دەپ, دايىن پاتەرلەردى تانىستىرىپ جاتىرمىز», دەيدى فيليال ديرەكتورى.
مەدەت ابۋعاليەۆتىڭ پىكىرىنشە, تۇرعىندار قاراجات جيناۋدى ۇيرەنۋ كەرەك. سول كەزدە ەڭ تومەن پايىزبەن يپوتەكا الادى.
«وتباسى بانكتىڭ» ميسسياسى – وتباسىلاردى جەكە باسپانامەن قامتاماسىز ەتۋ, ۇزاق مەرزىمدى ءال-اۋقاتىن ارتتىرۋ ارقىلى وتان سەزىمىن نىعايتۋ. يپوتاكالىق مەملەكەتتىك باعدارلامالار وسى ءبىزدىڭ وتباسى بانك ارقىلى جۇرگىزىلەدى. ادامدار قاراجات جيناپ ۇيرەنۋ كەرەك. سوندا ولار ەڭ تومەن پايىزبەن, ءتيىمدى شارتتارمەن بولاشاقتا باسپانا الادى. قاراجات جيناۋ مادەنيەتىن قالىپتاستىرۋ كەرەك – دەيدى ول.
