فوتو: Oqu-agartu ministrligi
بۇگىندە ءبىلىم بەرۋ ۇيىمدارىندا 1 000-نان استام پەداگوگ-كاسىبي باعدار بەرۋشى ەڭبەك ەتىپ جاتىر. فورۋمعا بارلىق وڭىردەن كەلگەن 200-گە جۋىق مامان قاتىستى. ولار كاسىبي باعدار بەرۋ جۇيەسىندەگى وزەكتى وزگەرىستەر مەن زاماناۋي تاسىلدەردى تالقىلادى.
«ماماندىق تاڭداۋ – ءاربىر ادامنىڭ ومىرىندەگى ماڭىزدى شەشىم. بۇل رەتتە مەكتەپ بارىنشا قولايلى ورتا قالىپتاستىرۋى ءتيىس. مينيسترلىك وسى باعىتتا ناقتى قادامدار جاساپ جاتىر. اتاپ ايتقاندا, بيىلعى ناۋرىز ايىندا ءار مەكتەپكە پەداگوگ-كاسىبي باعدار بەرۋشى ءۇشىن جەكە شتات بىرلىگىن ءبولۋ تۋرالى بۇيرىق قابىلداندى. قازىر مەكتەپتەردە 1 159 كاسىبي باعدار بەرۋشى جۇمىس ىستەيدى. جاڭا وقۋ جىلىندا ولاردىڭ سانى 7 920-عا دەيىن ارتادى دەپ كۇتىلىپ وتىر», دەدى وقۋ-اعارتۋ ۆيتسە-ءمينيسترى ەدىل وسپان.
سالا مينيسترلىگىنىڭ ءباسپاسوز قىزمەتىنىڭ مالىمدەۋىنشە فورۋم اياسىندا وقۋشىلار مەن اتا-انالارعا ارنالعان ءبىلىم كورمەسى ءوتتى. كورمەگە قازاقستان مەن شەتەلدىڭ جەتەكشى جوعارى وقۋ ورىندارى قاتىستى. كانادا, ۇلىبريتانيا, يتاليا, اقش, قىتاي, گونكونگ, ءباا ۋنيۆەرسيتەتتەرى وزدەرىنىڭ وقۋ باعدارلامالارىن ۇسىنىپ, قاتىسۋشىلارعا دايىندىق باعىتتارى, قابىلداۋ شارتتارى جانە بولاشاقتا سۇرانىسقا يە ماماندىقتار تۋرالى جان-جاقتى اقپارات بەردى. ۇيىمداستىرۋشىلاردىڭ ايتۋىنشا, كورمەگە 1 000-نان استام ادام كەلگەن.
ەسكە سالايىق, 2025 جىل مەملەكەت باسشىسىنىڭ باستاماسىمەن جۇمىسشى ماماندىقتارى جىلى بولىپ جاريالاندى. اتالعان فورۋم كاسىبي باعدار بەرۋ جۇيەسىن دامىتۋعا ىقپال ەتەتىن ءبىلىم مەن تاجىريبە الماسۋعا ارنالعان اشىق الاڭعا اينالدى.
