ەرەسەكتەر اراسىنداعى ءتۋرنيردىڭ اشىلۋ سالتاناتىندا ءابدىسالان نۇرماحانوۆتىڭ جارى كۇلپاش عالىمجانقىزى داڭقتى بوكسشى تۋرالى ەستەلىك ايتتى. ال تۇركىستان وبلىستىق دەنە شىنىقتىرۋ جانە سپورت باسقارماسىنىڭ باسشىسى عالىمجان حۋدياروۆ ءداستۇرلى ءتۋرنيردىڭ ماڭىزدىلىعىنا توقتالىپ, قاتىسۋشىلارعا ساتتىلىك تىلەدى.
سونداي-اق داڭقتى بوكسشىنىڭ ونەگەلى ءومىر جولىنان اقپاراتتار جاس سپورتشىلاردىڭ ەسىنە سالىندى. ءابدىسالان نۇرماحانوۆ 1993 جىلدان باستاپ بوكستان قازاقستان ۇلتتىق قۇراما كومانداسىنىڭ باس باپكەرى اتاندى. قازاقستان قۇراماسى 1995 جىلى تاشكەنت قالاسىندا وتكەن ازيا چەمپيوناتىندا 6 التىن جۇلدەنى جەڭىپ الدى. 1996 جىلى وتكەن جازعى وليمپيادا ويىندارىندا ونىڭ شاكىرتتەرى 1 التىن, 1 كۇمىس, 2 قولا مەدال ولجالاپ, جالپىكوماندالىق ەسەپتە 3-ورىندى يەلەندى. وسى وليمپيادا ويىندارىندا ۆاسيلي جيروۆ ەڭ ۇزدىك بوكسشىعا تاعايىندالعان ۆەل باركەر كۋبوگىن ەنشىلەدى. قازاق سپورتى تاريحىندا وشپەس ءىز قالدىرعان قايراتكەر اتىندا تۇركىستاندا سپورت مەكتەبى بار. جىل سايىن ءا.نۇرماحانوۆ اتىنداعى ءداستۇرلى تۋرنير وتكىزىلىپ كەلەدى.
ال بيىلعى تۋرنيردە وزبەكستان, تاجىكستان, قىرعىزستان ەلدەرىنەن جانە ەلىمىزدىڭ بارلىق ايماعىنان 13 سالماق دارەجەسىندە 100-گە جۋىق سپورتشى باق سىناپ جاتىر.
