ەكونوميكا جانە كوممەرتسيا ءمينيسترىنىڭ ورىنباسارى يسكەندەر اسىلقۇلوۆ 2006 جىلى قىرعىزستان مەن قازاقستان ۇكىمەتتەرى اراسىندا ءتورت پانسيوناتتى جاڭعىرتۋ شارتىمەن قازاقستاندىق تاراپقا بەرۋدى كوزدەيتىن كەلىسىمگە قول قويىلعانىن ەسكە سالدى.
بۇل بوستەري كەنتىندەگى «سامال» دەمالىس ءۇيى مەن «ۋنيۆەرسيتەت» سپورتتىق-ساۋىقتىرۋ لاگەرى, چولپون-اتاداعى «قازاقستان» شيپاجايى جانە كورۋمدۋ اۋىلىنداعى «وليمپ» سپورتتىق-ساۋىقتىرۋ ورتالىعى مەملەكەتتىك كاسىپورنىنىڭ سپورتتىق-ساۋىقتىرۋ بازاسى. بۇل رەتتە, اسىلقۇلوۆ اتاپ وتكەندەي, بۇل قۇجاتتا قازاقستاندىق تاراپتىڭ تالاپتارى مەن جاۋاپكەرشىلىگى ەگجەي-تەگجەيلى جازىلعان جوق.
2009 جىلى پانسيوناتتار ورنالاسقان جەر ۋچاسكەلەرىن قازاقستانعا 49 جىل مەرزىمگە جالعا بەرۋ تۋرالى قوسىمشا كەلىسىم جاسالدى.
2023 جىلى قازاقستاندىق تاراپتىڭ جاۋاپكەرشىلىگى بولىگىندە كەلىسىمنىڭ شارتتارى قايتا قارالدى, ال 2024 جىلعى جەلتوقساندا 2006 جىلعى كەلىسىمگە وزگەرىستەر ەنگىزۋ تۋرالى حاتتاماعا قول قويىلدى.
جاڭا قۇجاتقا سايكەس, قازاقستان نىسانداردى رەكونسترۋكتسيالاۋدى 2029 جىلدىڭ 31 جەلتوقسانىنا دەيىن اياقتاۋعا مىندەتتەنەدى.
اتاپ ايتقاندا: «قازاقستان» شيپاجايى ءتورت جۇلدىزدى قوناق ءۇي دەڭگەيىنە دەيىن, «ۋنيۆەرسيتەت» جانە «سامال» - ءۇش جۇلدىزدى قوناق ءۇي دەڭگەيىنە دەيىن جاڭعىرتىلۋى ءتيىس, «وليمپ» تولىققاندى سپورت بازاسى بولىپ قايتا قۇرىلۋى ءتيىس.
«ەگەر بۇل شارتتار بەس جىل ىشىندە ورىندالماسا, نىساندار شىعىن وتەمىنسىز قىرعىزستاننىڭ مەنشىگىنە قايتارىلادى», - دەپ ءتۇسىندىردى قىرعىز شەنەۋنىگى.
ول سونداي-اق بۇعان دەيىن كەلىسىمدە قىرعىزستان ازاماتتارىنىڭ قايتا قۇرۋ ۇدەرىسىنە قاتىسۋى كوزدەلگەنىن اتاپ ءوتتى. باستاپقىدا جۇمىسشىلاردىڭ 80 پايىزى قىرعىزستاندىقتار بولۋى ءتيىس دەپ بولجانعان, الايدا ەنگىزىلگەن وزگەرىستەردەن كەيىن بۇل ۇلەس 90 پايىزعا دەيىن ۇلعايتىلدى.
قازاقستان ءۇشىن بازالاردى قالپىنا كەلتىرۋ جانە ءتۋريزمدى دامىتۋ مىندەتى تۇر. شارتتىڭ تالاپتارىنا سۇيەنە وتىرىپ, قازاقستان پانسيوناتتاردى رەتكە كەلتىرۋ مىندەتىن وزىنە الادى. بارلىق نىساندار جوندەلىپ, ءۇش-ءتورت جۇلدىزدى ساناتتاعى قازىرگى زامانعى قوناق ۇيلەر دەڭگەيىنە دەيىن قايتا جابدىقتالۋى ءتيىس.
سونىمەن قاتار, ولار تەك جاز ايلارىندا عانا جۇمىس ىستەمەي, جىل بويى تۋريستەردى قابىلداۋعا ءتيىس.
ياعني, عيماراتتار جىلىتىلادى, ينفراقۇرىلىم جاقسارادى, قوسىمشا جايلىلىق پايدا بولادى, ال دەمالىستىڭ ءوزى ەكى ەلدىڭ ازاماتتارى ءۇشىن ىڭعايلى ءارى قولجەتىمدى بولادى.
قازاقستان دا وسى نىسانداردى كۇتىپ ۇستاۋ مەن دامىتۋعا جاۋاپ بەرەدى جانە ەگەر ول كەلىسىم شارتتارىن ورىنداماسا, وندا پانسيوناتتار قىرعىزستاننىڭ باقىلاۋىنا قايتىپ ورالادى.
پانسيوناتتار ورتالىق ازيانىڭ ەڭ تانىمال كۋرورتتىق وڭىرلەرىنىڭ بىرىندە ورنالاسقان.
جىل سايىن كوپتەگەن قازاقستاندىقتار تازا اۋانى, جىلى سۋدى جانە كولدىڭ تابيعي سۇلۋلىعىن تاماشالاۋ ءۇشىن ىستىقكولگە دەمالۋعا اتتانادى.
